Matayo 6

Makani aakwaabila zipo

1 # Mt 23:5 Amucenjele kuti mutaciti milimo yanu iiluleme kumeso aabantu kuti mweebelwe ambabo. Mwacita boobo, tamukwe bulumbu kuli Usowanu uuli kujulu.

2Nkaambo kaako ciindi ncoabila bantu zipo utasibi impeta kubusyu bwako mbuli mbubacita basikuupaupa ameso muzikombelo amumigwagwa, kuti batembaulwe kubantu. Ncobeni ndamwaambila kuti balijene kale bulumbu bwabo. 3#Mt 25:37-40; Rom 12:8Pele webo, ciindi ncoabila bantu zipo, ijanza lyako lyacimwensi litazibi mbulicita lyalulyo, 4kuti zipo zyako zibe kumbali, lino Uso uubonena kumbali uzookulumbula.

Makani aakukomba

5 # Lk 18:10-14; Mt 23:5,6 Alimwi ciindi ncomukomba mutabi mbuli basikuupaupa ameso, nkaambo balayanda kukomba bwiimvwi muzikombelo amuzyooko zyamigwagwa mipati, kuti babonwe kubantu. Ncobeni ndamwaambila kuti balijene kale bulumbu bwabo. 6#2 Bam 4:33Webo ciindi ncokomba, njila mucimpetu cako, ulijalile kumulyango, ukombe kuli-Uso uuli kumbali, lino Uso uubonena kumbali uzookulumbula. 7#Is 1:15Alimwi, mukukomba kwanu mutaindululi mbuli mbubacita bamasi, nkaambo balayeeya kuti balaswiililwa kukubwanta kwabo. 8#Mt 6:32Mutakozyani abo, nkaambo Usowanu ulizi zintu nzimubula kamutana kumubuzya. 9#Lk 11:2-4; Joh 17:6Mbuboobu mbumweelede kukomba:

Taateesu ooli kujulu,

Alilemekwe izina lyako,

10 # Mt 7:21; Lk 22:42 Abuze Bwami bwako,

Alucitwe luyando lwako,

Ansi ano mbubonya mbuli kujulu.

11Utupe sunu zilyo nzitubula,

12 # Mt 14:15; 18:21-35 Utulekelele milandu yesu, mbubonya mbuli mbutubalekelede aswe bali amilandu kulindiswe,

13 # 1 Mak 29:11-13; Joh 17:11,15 Utatweenzyi mukutepaulwa,

Utuvune kumubi,

Nkaambo Bwami mbubwako, anguzu abulemu, mane kukabe kutamani.

Ameni.

14 # Mk 11:25-26 Nkaambo mwalekelela bantu milandu yabo, alakwe Usowanu uuli kujulu ulamulekelela anywe, 15pele mwatalekelela bantu milandu yabo, alakwe Usowanu takooyoomulekelela milandu yanu pe.

Makani aakuliimya zilyo

16 # Is 58:5-9 Alimwi, ciindi ncomuliimya kulya, mutabi mbuli basikuupaupa ameso, nkaambo balo balaungumana, balabisya masyu aabo, kuti baboneke kubantu mbubaliimya kulya, Ncobeni ndamwaambila kuti balijene kale bulumbu bwabo. 17Pele ciindi ncoliimya kulya webo, unanike mutwe wako akusamba kumeso aako, 18kuti kuliimya kwako kutaboneki kubantu pele kuli-Uso uuli kumbali, lino Uso uubonena kumbali uzookulumbula.

Makani aalubono

19 # Jak 5:2-3 Mutaliyobwedi lubono ansi ano, mpaabisya mapempya ankalaya, ababbi mpobatulula kuti babbe. 20#Mt 19:21; Lk 12:33,34; Kol 3:1,2Amuliyobwede lubono kujulu, nkwaatabisyi mapempya ankalaya, ababbi nkubatatululi kuti babbe. 21Nkaambo lubono lwako nkulubede, nkukonya oko nkuubede moyo wako, 22#Lk 11:34-36Ilampi lyamubili ndiliso. Nkaambo kaako liso lyako kuti kalili sibuuya, mubili wako woonse ulazula mumuni. 23#Mt 20:15Anukuti liso lyako kuti kalili litavu, mubili wako woonse ulasia. Lino mumuni uuli mulinduwe wakuli mudima, mudima oyo ulasia mbi. 24#Lk 16:9,13Taakwe muntu uukonzya kumanina bami bobile milimo, nkaambo ulasula umwi, ulayanda umwi, na ulakakatila umwi, ulasampaula umwi. Tamukonzyi kubelekela Leza antoomwe alubono. 25#Lk 12:22-31#Flp 4:6; 1 Pet 5:7; 1 Tim 6:6; Heb 13:5Nkaambo kaako ndamwaambila kuti, Mutalibiliki kubuumi bwanu, kuti, Tukalyenzi? Tukanywenzi? nikuba kumibili yanu kuti, Tukasamenzi? Sa buumi tabwiindi zilyo, awalo mubili sa tuuindi zyakusama? 26#Mt 10:29-31Amulange bayuni bakujulu, nkaambo tababyali, tabatebuli, tabayoboli mumatala, nekubaboobo Usowanu uuli kujulu ulabasanina. Sa inywe tamuyandiki kwiinda mbabo? 27Nguni akati kanu uulibilika uukonzya kukomezya ciimo cakwe nikaba kakokola komwe?

28Alimwi nkaambonzi mulalibilikila zyakusama? Amuyeeyesye impana zyamusokwe mbuzimena. Tazibeleki, taziluki, 29#1 Bam 10:4-7; 2 Mak 9:3-6pele ndamwaambila kuti naba Solomoni mubulemu bwakwe boonse teewakasamide mbuli imwi akati kanzizyo. 30Lino Leza kuti kasamika boobo mani aamusokwe, aaliko sunu pele junza alasowelwa muciko, sa takaindi loko kumusamika anywebo nuba silusyomo-luniini. 31Nkaambo kako mutalibiliki cakwaamba kuti, Tukalyenzi? Tukanywenzi? Tukasamenzi? 32#Mt 6:8Nkaambo nzeezi zyoonse nzibayandaula bamasi, alimwi Usowanu uuli kujulu ulizi kuti zintu ezi zyoonse zilayandwa kulindinywe. 33#Rom 14:17; 1 Bam 3:13,14; Int 37:4,25Pele amusaangune kuyandaula Bwami bwaLeza abululami bwakwe, elyo zintu ezi zyoonse mulaziyungizizigwa azyalo. 34#Kul 16:19Nkaambo kaako mutalibilikili zyajunza, nkaambo bwajunza bulalibilikila bwini. Buzuba bwasunu bulizulide mapenzi aabo bwalo.

Currently Selected:

Matayo 6: Ibbaib63

Highlight

Copy