Johane 21

Jesu mbwaakalibonya kulibasikuniya bakwe kulwizi

1Munsi lyakooko Jesu wakalibonya alimwi kulibasikwiiya kulwizi lwa-Tiberiya, mboobu mbwaakalibonya, 2#Joh 1:45Kwakali antoomwe Simoni Petro, a-Tomaso uutegwa mwana wamayanga, a-Natanayeli wakuKana mu-Galilaya, abalo bana ba-Zebedayo, abamwi bobile babasikwiiya bakwe, 3#Lk 5:5Simoni Petro wakabaambila kuti, Ndiya kukuzela, Bamwaambila kuti, Aswebo tulaya ayebo. Mpoonya bakainka, bakanjila mubwaato, eno masiku ayo takukwe ncobakaca, 4#Joh 20:14; Lk 24:16Pele nobwakali kuya buca, Jesu wakaima ankomwe, nokubaboobo basikwiiya tabali kuzi kuti ngu-Jesu, 5#Lk 24:41Nkaambo kaako Jesu wakabaambila kuti, Nobana, sena mulijisi cakulya? Bakamuvuwa kuti, Pe, pe, 6#Lk 5:6Nkabela wakabaambila kuti, Amuwaale lusabwe kululyo lwabwaato, eno mulaca, Aboobo bakaluwaala nkuko, eno bakakakilwa kulukwela nkaambo kanswi zinjizinji. 7#Joh 13:23Nkaambo kaako sikwiiya oyo Jesu ngwaali kuyanda wakaamba kuli-Petro kuti, Ngo-Mwami, Simoni Petro naakamvwa kuti ngo-Mwami, wakasama cibaki cakwe (nkaambo wakali ecinswe), wakasotokela mulwizi. 8Pele basikwiiya bamwi bakeza mubwaato buniini (nkaambo tokwali kulekule ankomwe, pele mbuli ntaamo izili mwaanda), bali kuza bukwela lusabwe uluzywide nswi. 9Nobakaakusika kunkomwe, bakabona mulilo wamasizi awo, enswi zilibikidwe mpoonya, ensima. 10Jesu wakabaambila kuti, Amulete nswi nzomwaca eno. 11Simoni Petro wakatanta kuyookwelela kunkomwe lusabwe uluzywide nswi mpati, zyali mwaanda uuli amakumi osanwe muzitatu, nokubaboobo nezivula boobo, tazikazapwide lusabwe pe. 12Jesu wakabaambila kuti, Amuboole mulye. Takukwe uwakalimba moyo wakumubuzya kuti, Nduweni? mbobali kuzi kuti ngo-Mwami. 13#Joh 6:11Jesu waboola, wabweza nsima wabapa, enswi mbubonya. 14#Joh 20:19,26Eci nceciindi catatu ncaakalibonya Jesu kulibasikwiiya bakwe, kabukide kulibafwide.

Jesu mbwaakabuzya Petro kuti, Sena ulandiyanda?

15 # Joh 1:42 Nobakamana kulya, Jesu wakabuzya Simoni Petro kuti, Simoni omwana a-Jona, sena ulandiyandisya kwiinda aba? Wakamuvuwa kuti, Ii, Mwami, ulizi kuti ndilakuyanda. Wakamwaambila kuti, Sanina tubelele twangu, 16#1 Pet 5:2,4Alimwi wakamubuzya alwabili kuti, Simoni, omwana a-Jona, sena ulandiyandisya? Wakati kulinguwe, Ii, Mwami, ulizi kuti ndilakuyanda. Wakamwaambila kuti, Embela mbelele zyangu. 17#Joh 13:38; 16:30Wamwaambila alwatatu kuti, Simoni, omwana a-Jona, sena ulandiyanda? Petro wakausa nkaambo wakamubuzya alwatatu kuti, Sena ulandiyanda? Wakamwaambila kuti, O mwami, ulizi zintu zyoonse, ulizi kuti ndilakuyanda, Jesu wamwaambila kuti, Sanina mbelele zyangu, 18#Mt 16:22; 26:39Ncobeni ndakwaambila kasimpe, Nowacili mulombe, wakalyaanga omwini, wakali kweenda mbowali kuyanda. Pele waakuba munene, uyoololola maanza aako, umbi uyookwaanga akuyookutola nkotayandi, 19#Joh 13:36Wakaamba obo kutondezya lufu ndwati kalemye Leza andulo. Naakaamba obo wakamwaambila kuti, Ndicilila. 20#Joh 13:23Eno Petro acebuke, wabona sikwiiya oyo Jesu ngwaali kuyanda, wali kubacilide, Ngonguwe uwakayaama acamba ca-Jesu kuciindi cakulalila, naakabuzya kuti, O mwami, nguuli uuti kwaabe? 21Petro naakamubona wakabuzya Jesu kuti, Mwami, ino oyu akacite buti? 22Jesu wakamuvuwa kuti, Antela ndanooyanda kuti akandilindilile mane nkaboole. Ino ayo makani aako na? Ndicilila buyo yebo. 23Majwi aya akabusya mpuwo akati kabeenzinyina, kuti oyo sikwiiya takooyoofwa. Nokubaboobo Jesu taakwe naakaamba kuti takooyoofwa, pele kuti, Antela ndiyanda kuti andilindilile mane nkaboole, ino ayo makani aako na?

24 # Joh 15:27 Ngonguwe sikwiiya oyo uulungulula makani aya, nguwakaalemba. Tulizi kuti kulungulula kwakwe nkwakasimpe.

25 # Joh 20:30 Mpozili azintu zimwi zinjizinji nzyaakacita Jesu, Kuti na zyalembwa zyoonse, ndasyoma kuti inyika neyatakonzya kwaamana mabuku aayoolembwa.

Currently Selected:

Johane 21: Ibbaib63

Highlight

Copy