Incito 1

1Teofilo, mulugwalo lutaanzi ndakalungulula zintu zyoonse nzyaakasaanguna kucita Jesu akwiisya, 2mane kusikila kubuzuba, mbwaakata mbulwa kujulu, kamanide kale kubalailila, a-Muuya Uusalala, baapostolo mbaakasalide, 3Munsi lyakupenga kwakwe wakalitondezya kulimbabo, muumi, ezitondezyo zinjizinji, wakali kubonwa mbabo mazuba aali makumi one, ulaamba makani aa-Bwami bwa-Leza. 4Naakali kubungene ambabo, wakabalailila kuti, Mutazwi mu-Jerusalemu, pele mucilindilile cisyomezyo ca-Taata, eco ncomwakamvwa kulindime. 5Nkaambo ncobeni Johane wakabapatizya amaanzi, kwalo nywebo muyoobapatizigwaa-Muuya Uusalala kaatanainda mazuba manjimanji.

Jesu mbwaakabweeda kujulu

6Nobakabungene bakamubuzya kuti, O mwami, sena ulabweedezya bwami ku-Israyeli kuliceecino ciindi? 7Wakati kulimbabo, Takuli kwanu kuziba ziindi, naaba mazuba ngaabika Taata kubwami bwakwe mwini. 8Kwalo muyootambula nguzu, wasika alindinywe Muuya Uusalala, muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika. 9Naakaamba obo, kabacimulangilide, wakasumpulwa, ikumbi lyamutambula, teebakacili kumubona, 10Nkabela nobakacili kuululala kujulu, naakacili kuya, baalumi bobilo bakaima abalo, balisamide masani aatuba. 11Bati, Nywebo nobaalumi ba-Galilaya, mwiimvwinzi akulanga kujulu? Oyu Jesu uwatolwa kujulu uwazwa kulindinywe, uyooboola mbubonya mbomwamubona ulaya kujulu.

12Elyo bakabweeda ku-Jerusalemu, bazwa kucilundu icitegwa Elaioni, icili kufwaafwi ku-Jerusalemu, kubaanga lweendo lwa-Sabata. 13Eno nobakanjila, bakatanta muŋanda yamujulu, mwakakede ba-Petro, a-Johane, Jakobo, a-Andreya, Filipo a-Tomaso, Bartolomayo a-Matayo, Jakobo wa-Alifayo a-Simoni mu-Zelote, a-Judase wa-Jakobo. 14Aba boonse bakajatisya kukomba amoyo omwe, bakali antoomwe abakaintu, a-Mariya banyina Jesu, abanabakwabo Jesu.

Baapostolo mbobakaliyungilila

15Kumazuba ayo Petro wakanyamuka, waima akati kababunyina. Bantu abakabungene awo bati kabe mwaanda uuli amakumi obile. 16Wati, Nobaalumi bakwesu, kwali kweelede kuti kuzyulile Lugwalo ndwaakaamba Muuya Uusalala kumulomo wa-Davida, olo uluamba Judase, uwakali musololi wabaabo abakajata Jesu. 17Nkaambo wakali kubalwa aswebo, wakatambula caabilo cakwe kumulimo oyu. 18Eno walo wakaula muunda acivolo cabubi bwakwe, wakalikankata akukwamuka akati, kwakafwesuka mala aakwe oonse. 19Oku kwakamvwigwa kulimbabo boonse abakali kukala mu-Jerusalemu, mane oyo muunda wakategwa Akeldama mumwaambo wabo, nkokuti, Muunda wabulowa. 20Nkaambo kulilembedwe mubbuku lyantembauzyo kuti,

Iŋanda yakwe alibe tongo,

Kutakali muntu kulindilyo.

Alimwi,

Ubusena bwakwe abukale umbi.

21Nkaambo kaako kuleelede kuti tusale omwe wabaalumi mbotwakali abo ciindi coonse Mwami Jesu ncali kwiilingana aswebo, 22kuzwa kulubapatizo lwa-Johane, mane kusikila kubuzuba mbwaakagwisigwa kulindiswe, kuti abe kamboni wakubuka kwakwe antoomwe aswebo. 23Ndilyonya bakabika bobile: Josefa uutegwa Barsaba, limwi zina lyakwe ngu-Justo, a-Matiya, 24Bakakomba bati, Yebo O mwami, oozi myoyo yaboonse, tutondezye ngowasala kulibaaba bobile, 25kuti atole busena kumulimo oyu wabwaapostolo, mbwaakaleya Judase, naakaya kubusena bwakwe mwini. 26Nkabela bakawaala cisolo, icisolo camuwida Matiya, elyo wabalwa abaapostolo abali kumi muumwi.

Currently Selected:

Incito 1: Ibbaib63

Highlight

Copy