Incito 2
2
Imbungano mboyakabapatizigwa a-Muuya Uusalala
1Nobwakasika buzuba bwa-Pentekoste, bakali antoomwe boonse, 2Ndilyonya kwakazwa mujulu muzunzumina mbuli guwo ilyuungisya, wakazuzya ŋanda yoonse mobakakede. 3Kwakabasikila milaka; iili mbuli mulilo, yakabakala umwi umwi. 4Boonse bakazyula Muuya Uusalala, batalika kwaamba myaambo imbi, mbubonya mbwaakabaambya Muuya.
5Eno kwakaliko mu-Jerusalemu ba-Juda, bantu basyomi abakazwa kumasi oonse enyika. 6Nokwakamvwigwa muzunzumina oyo, akabungana makamu makamu aabantu, bazingwa nkaambo umwi umwi wakabamvwa balaamba mwaambo wakwe mwini. 7Baankamana, bayoowa bati, Sena aba abaamba tabali ba-Galilaya boonse? 8Kuli buti ino, twamvwa toonse mwaambo wesu ngotwakazyalilwa? 9Toba-Pati aba-Midi aba-Elami, tobamwi totukala ku-Mesopotamiya, ku-Judaya, aku-Kapadokiya, ku-Ponto aku-Asiya, 10ku-Frugiya aku-Pamfuliya, ku-Egepita ezisi zya-Libiya izibambene a-Kurene, tobeenzu totuzwa ku-Roma, toba-Juda antoomwe abakasanduka, 11toba-Krete aba-Arabiya, twabamvwa balaamba milimo mipati ya-Leza mumyaambo yesu, 12Nkabela boonse bakaankamana, bazingwa, babuzyanya kuti, Ino eci cili buti? 13Bamwi basabula bati, Bakuta mbote iilweela.
14Kwalo Petro wakaima abaapostolo abali ikumi muumwi wakoompolola, wakati, Nobaalumi baku-Judaya, anywebo nyoonse nomukala mu-Jerusalemu, azibwe ndinywe makani aya, muswiilile majwi aangu. 15Aba tabakoledwe pe, mbuli mbomuyeeya, ciindi cicili cacikasaalizi buyo. 16Pele eci ncencico ncaakaamba musinsimi joeli kuti,
17Leza ulaamba kuti, Kumazuba aakumana
Ndiyootila Muuya wangu atala lyabantu boonse,
Bana banu balombe abasimbi bayoosinsima,
Baalumi banu bapya bayoobona zilengaano,
Abanene banu bayoolota ziloto.
18Atala lyabacinkombwa bangu baalumi abakaintu,
Ndiyootila Muuya wangu kumazuba ayo,
Bayoosinsima.
19Ndiyootondezya malele mujulu,
Azitondezyo ansi,
Bulowa, amulilo, asikunku wabusi.
20Izuba liyoosanduka kusia,
Amweezi uyoosanduka bulowa,
Kabutanasika buzuba bwa-Jehova,
Obo bupati bulemu.
21Kuyooba kuti umwi umwi uukomba muzina lya-Jehova uyoofutulwa.
22Nobaalumi ba-Israyeli, amuswiilile majwi aya, Ngaa-Jesu wa-Naza-reta, mwaalumi ngomwakatondekelwa Leza, emilimo mipati amalele azitondezyo, Leza nzyaakacita anguwe akati kanu, mbubonya mbuli mbomuzi nobeni. 23Walo wakaabwa, mbubonya mbuli Leza mbwaakakanzide akuziba, nywebo mwakamubambuzya akumujazya maanza aabatakwe mulao. 24Pele Leza wakamubusya, wamwaangulula kumapenzi aalufu, nkaambo taakwe lwali kukonzya kuti lumujate. 25Davida ulaamba aanguwe kuti,
Ndakabona Jehova lyoonse uli kubusyu bwangu,
Uli kululyo lwangu kuti entazunganizigwa.
26Aboobo moyo wangu wabotelwa,
Mulaka wangu wasekelela,
Alimwi mubili wangu unookede alulangililo,
27Nkaambo tokooyoosia muuya wangu kucikalilo cabafwa,
Tokooyooaba Uusalala wako kuti abone kubola.
28Wandizibya nzila zyabuumi,
Uyoondizuzya akubotelwa kubusyu bwako.
29Nobaalumi bakwesu, ndimulungulwide aamupati Davida, kuti wakafwa akuzikwa, cuumbwe cakwe nkocili kulindiswe asunu, 30Aboobo mbwaakali musinsimi, wakali kuzi kuti Leza wakakonka kulinguwe acikonko cakuti, kubana bakwe kuyoozwa umwi uuti kakale acuuno cakwe cabwami, 31eno mbwaakabona obo, wakaamba aakubuka kwa-Kristo kuti muuya wakwe tuukasiidwe kucikalilo cabafwa, mubili wakwe tuukabolede. 32Oyu Jesu Leza wakamubusya, swebo toonse tuli bakamboni bamakani aya. 33Mbwaakasumpwidwa kujanza lyalulyo lya-Leza, alimwi mbwaakatambula kuli-Wisi cisyomezyo ca-Muuya Uusalala, watila eci ncomubona ancomwamvwa. 34Nkaambo Davida takainkide kujulu, pele ulaamba mwini kuti,
Jehova wakaambila Mwami wangu wati,
Kala kujanza lyangu lyalulyo.
35Mane nkacite basinkondonyoko
Babe citandabalilo camatende aako.
36Aboobo iŋanda yoonse ya-Israyeli izibisye kuti oyu Jesu nguwenya ngomwakabambula, Leza wamucita abe Mwami a-Kristo.
37Nobakamvwa obo bakayaswa kumyoyo, bati kuli-Petro akulibamwi baapostolo, Nobaalumi bakwesu, ino tucite buti? 38Ndilyonya Petro wakabaambila kuti, Amusanduke, mubapatizigwe umwi umwi muzina lyaJesu Kristo, mujatilwe zibi zyanu, nomwati tambule cipego ca-Muuya Uusalala. 39Nkaambo cisyomezyo cili kulindinywe, akubana banu, akuliboonse abali kule, mbati kaite Mwami Leza wesu, 40Amakani amwi manjimanji wakabakananina akubakombelezya wati, Amulifutule kulibasunu ababisya.
41Mpoonya abo abakatambula makani aakwe bakabapatizigwa, mbubonya buzuba obo bakayungililwa bantu bati kabe myaanda iili makumi otatwe, 42Balo bakacilisungweede mukwiisya kwabaapostolo, amukuswaana muuya, amukukomona mukamu, amukukomba.
43Bantu boonse bakasikilwa kuyoowa. Malele azitondezyo zinjizinji zyakacitwa baapostolo. 44Boonse basyomi bakali antoomwe, basanganya zyoonse nzobali kujisi, 45bauzya lubono lwabo ezintu zyabo, baabana boonse mbuli kubula kwaumwi umwi. 46Mazuba oonse bakali kusungweede amoyo omwe muntempele, akukomona mukamu mumaanda aabo, balya zilyo zyabo akubotelwa amyoyo iituba, 47balalumba Leza akukonda bantu boonse, Mazuba amazuba Mwami wakabayungilila abo abali kufutulwa.
Currently Selected:
Incito 2: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
