Incito 3

Muntu uwakatyokede mbwaakaponyegwa

1Eno kuciindi cakukomba, cacikasaalizi, Petro a-Johane bakanjila muntempele, 2Umwi mwaalumi uwakali kutyokede kuzwa mwida lyabanyina wakali kunantulwa, balamubika mazuba oonse amulyango wentempele, uutegwa Mubotu, kuti akumbile zipego kulibaabo abanjila muntempele. 3Walo naakabona Petro a-Johane nobati njile muntempele, wakabakumbila kuti apegwe. 4Nkabela Petro wakamulangisya, awalo Johane, wakati, Tulange, 5Wakabalanga, wakayeeya kutambula cintu kulimbabo. 6Ndilyonya Petro wakati kulinguwe, Insiliva niiba ngolida nsijisi pe, kwalo neenjisi ndakupa, Muzina lya-Jesu Kristo wa-Nazareta, nyamuka, uende. 7Wakamujata ejanza lyalulyo, wamwiimikizya. Ndilyonya maulu aakwe engo zyakwe zyakajana nguzu, 8wanyamuka, waima, weenda, wanjila abalo muntempele, bweenda akusotauka akulumbaizya Leza, 9Abantu boonse bakamubona uleenda akulumbaizya Leza, 10bamuziba kuti ngonguwe uwakali kukalila kupegwa ku-Mulyango Mubotu wentempele, baankamana akuyoowa kuliceeco icakacitika kulinguwe.

Petro mbwaakakambaukila ba-Juda

11Eno naakacili kujatilila ba-Petro a-Johane, bantu boonse bakababunganina mukota litegwa lya-Solomoni, bakaankamanisya. 12Petro naakabona obo wakabavuwa wakati, Nobaalumi ba-Israyeli, ino muyoowelanzi aceeci? Mutulangisisyanzi mboiti oyu muntu twamweenzya munguzu zyesu na kukululama kwesu? 13Leza wa-Abrahamu, awa-Izaka, awa-Jakobo, Leza wamatateesu, walemya Jesu Mwanaakwe, ngomwakaaba, mwakamukazya kubusyu bwa-Pilato, walo naakali kukanza kumwaangulula, 14Kwalo mwakamukazya Uusalala Uululeme, mwakakumbila kupegwa muntu mujayi. 15Anu Mwami wabuumi mwakamujaya, ngwaakabusya Leza kulibasikufwa, ncotuli bakamboni swebo, 16Eno nkaambo kakusyoma zina lyakwe, oyu muntu ngomubona, ngomuzi, lyamuyumya zina lyakwe, ii, lusyomo uluzwa kulinguwe lwamupa kupona oku kumbele lyanu nyoonse, 17Eno bakwesu, ndilizi kuti mwakacita obo mukutaziba, abalo bami banu mbubonya, 18Pele Leza wakazyulizya oko nkwaakaambide amilomo yabasinsimi boonse, kuti Kristo wakwe uleelede kupenga. 19Aboobo amweempe, musanduke, kuti zibi zyanu zijatilwe, kusike ziindi zyakulyookezya izizwa kubusyu bwaJehova, 20atume Kristo ngomwakaimikizizigwa, nguwe Jesu, 21uuelede kutambulwa julu mane kube ziindi zyakubukulusya zintu zyoonse, nzyaakaamba Leza kumilomo yabasinsimi bakwe basalala kuzwa kumalengelo aanyika, 22Ncobeni Musa wakateeti, Jehova Leza uyoomubusizya musinsimi kubanabakwanu uuli mbuli ndime, muyoomuswiilila walo kumakani oonse kufumbwa ngati kaambe kulindinywe. 23Eno kuyooba kuti muntu woonse uutakooyooswiilila musinsimi oyo uyoofwidilila, takoonoociliko kubantu, 24Ii, basinsimi boonse kuzwida kuli-Samueli akulibaabo abakatobela, boonse abakali kwaamba, bakasinsima mazuba aya. 25Nywebo muli bana babasinsimi, abacizuminano ncaakacita Leza kumauso aanu naakaambila Abrahamu kuti, Masi oonse aanyika ayoolongezegwa kubana bako. 26Leza naakabusya Mwanaakwe, wakasaanguna kumutuma kulindinywe, kuti amulongezye kukumusandula nyoonse kuzibi zyanu.

Currently Selected:

Incito 3: Ibbaib63

Highlight

Copy