Incito 4

Petro a-Johane mbobakajatwa

1Eno nobakacili kwaamba kubantu, kwakabasikila bapaizi, asilumamba wacikombelo, aba-Saduki, 2bali bakali nkaambo baiisya bantu, balaamba kubuka kwa-Jesu kubafu, 3Nkabela bakabajata, bababika muntolongo mane bwaca, nkaambo kwali kumazuba, 4Kwalo banjibanji abakamvwa makani bakasyoma, eno mweelwe wabaalumi wati kabe makumi osanwe emyaanda.

5Nobwakaca kwakabungana mu-Jerusalemu beendelezi abaalu abalembi, 6a-Ana mupaizi mupati, a-Kayafa, a-Johane, a-Alesandro, ambabo boonse basazinyina mupaizi mupati, 7Nobakabaimika akati kabo, bakababuzya kuti, Ino ninguzunzi, ndizinanzi ndomwakacitya ceeci nywebo? 8Mpoonya Petro mbwaakazywide Muuya Uusalala wati kulimbabo, Nywebo nobami bacisi, anobapati baba-Israyeli, 9notubetekwa sunu aakucita kubotu nkwaacitilwa oyu muntu cilema mbwaaponyegwa, 10akuzibwe nywebo nyoonse, acisi coonse ca-Israyeli, kuti muzina lya-Jesu Kristo wa-Nazareta, ngomwakabambula, ngwaakabusya Leza kubafu, muzina eli oyu ncaimvwi kumbele lyanu uliponede. 11Oyu ndibbwe ilyakasampaulwa ndinywe nomuyaka, ilyacitwa mutwe wacooko. 12Takukwe lufutuko kuluumbi naba omwe pe, nkaambo takukwe zina limbi ansi ilipegwa bantu, ndotweelede kufutulwa andilyo,

13Nobakabona camba ca-Petro a-Johane, anu baziba kuti mbantu buyo abatakaiya, bayoowa, babaziba kuti bali kweenda a-Jesu. 14Eno nobabona muntu oyo uwakaponyegwa uliimvwi ambabo babula ncobakazya, 15Noba-kabalailila kuti bazwe alubeta, babuzyanya ulwabo beni bati, 16Ino tukaba-cite buti bantu aba? Nkaambo kwalibonya kulimbabo boonse abali mu-Jerusalemu, kuti malele mapati akacitwa mbabo, eno aswebo tatukonzyi kucikazya. 17Pele kuti citacimwaike akati kabantu atubaamhilisisye kuti bataambili muntu naba omwe mulileeli zina, 18Nobakabaita bakalailila kuti bataambi akaniini pe nekuba kukambauka muzina lya-Jesu, 19Kwalo Petro a-Johane babavuwa kuti, Na kuliluleme kumbele lya-Leza kuswiilila ndinywe kwiinda Leza, amulisalile. 20Nkaambo tatukonzyi swebo kutaamba nzotwakabona akumvwa. 21Nkabela nobakabaambilisisya alimwi babaleka, tabakajene cintu cakuti babaume nkaambo kabantu, nkaambo boonse bali kulumbaizya Leza aceeco icakacitwa, 22Nkaambo oyo muntu uwakacitwa malele aya aakuponyegwa wakaindide kale myaka iili makumi one.

Leza mbwaakayumya basikwiiya

23Nobakalekwa bakabweeda kubeenzinyina, balungulula oonse ngobakabaambila bapaizi bapati abaalu, 24Balo nobakamvwa bakoompolola kuliLeza ejwi lyamoyo omwe bati, Osimatwangeesu, owakaanza ijulu enyika alwizi, azyoonse izili mulindulo, 25owakaamba a-Muuya Uusalala kumuloma wamuzike wako Davida kuti,

Nkaambonzi ncobatingilala bamasi?

Bantu bayeeyelanzi zyabuyo?

26Bami baansi bakalibamba.

Beendelezi babungana antoomwe,

Kulwanya Jehova a-Kristo wakwe.

27Nkasimpe muluuno munzi kwakabungana ba-Heroda a-Ponto Pilato, antoomwe abamasi, abantu ba-Israyeli, kuti balwanye Jesu, Mwanaako Uusalala ngookananika, 28bacite zyoonse zili buti izyakakanzidwe kujanza lyako akuluyando lwako, kuti zibewo. 29Lino Jehova, bona inkonkomwezyo zyabo, ugwasye bazike bako, baambe makani aako akaanzambwene kanji. 30Kovungununa ijanza lyako kukuponya, kuti kucitwe zitondezyo amalele muzina lya-Mwanaako Uusalala Jesu. 31Lino nobakamana kukomba, cibunganino cabo cakazungaanizigwa, elyo boonse bakazuzigwa Muuya Uusalala, nkabela bakatalika kwaamba makani aa-Leza akaanzambwene.

Mbubakavwelanya imbono zyabo

32Nkabela inkamu yoonse yabasyomi kiili amoyo omwe amuuya omwe. Kakutakwe muntu akati kabo uwakaamba kuti, Zintu nzenjisi nzizyangu ndemwini, pele zyoonse zyakali zyabanamaleya. 33Nkabela baapostolo bakali kulungulula canguzu loko makani aabubuke bwa-Mwami Jesu, alimwi luzyalo lupati lwakali abo boonse. 34Lino kakutakwe muntu akati kabo uwakabula cintu, nkaambo kakuti boonse abakajisi myuunda na maanda bakazyuuzya, 35bakaleta mali aamakwebo, baabika kumaulu aabaapostolo, elyo umwi aumwi wakaabilwa mbubonya mbwaakabulide.

36Lino Josefa, uwakaulikwa kubaapostolo izina lya-Barnaba (nkukwaamba kuti Mwana waluumbulizyo), mu-Levi uuzwa kucisi ca-Kupro, 37mbwaakajisi muunda, wakauuzya, wakaleta mali aawo, waabika kumaulu aabaapostolo.

Currently Selected:

Incito 4: Ibbaib63

Highlight

Copy