Incito 5

Hananiya a-Safira

1Pele mwaalumi umwi uutegwa Hananiya, abanakwe Safira, wakauzya lubono. 2Eno amwi mali ngaakauzya wakaasisa, abanakwe abalo bakazumina, amwi waaleta, waabika kumatende aabaapostolo. 3Ndilyonya Petro wakaamba wati, Hananiya, nkaambonzi Saatani ncaazuzya moyo wako kuti ucenge Muuya Uusalala, usise amwi mali ngookauzya muunda? 4Nowacikede sena towakali wako? Anowauzigwa, sena towali kunguzu zyako? Ino wayeeyelanzi makani ayo mumoyo wako? Tobejede kubantu pe, wabejela Leza. 5Hananiya naakamvwa majwi ayo, wakawida ansi, wafwa. Nkabela bakayoowesya boonse abakamvwa makani. 6Elyo bakanyamuka baalumi, bamuvunga, bamutola, baakumuzika.

7Nokwakati inde maola otatwe mukaintu wakwe wakanjila, katezi icakacitwa, 8Petro wamwaambila kuti, Ndyaambila na mwakauzya muunda mali aali boobu? Wakavuwa kuti, Ii, ali boobo. 9Petro wakati kulinguwe, Mwazumininanzi kusunka Muuya wa-Mwami? Bona matende aabaabo abaakuzika mwaalumaako ali amulyango, bazookutola ayebo. 10Ndilyonya wawa kumatende aakwe, wafwa, Baalumi banjila, bamujana ulifwide, bamutola, baakumuzika kumwaalumaakwe. 11Eno kwakasika kuyoowa kupati mumbungano yoonse, akulimbabo boonse abakamvwa makani aya.

12Kumaanza aabaapostolo kwakali kucitwa zitondezyo amalele manjimanji akati kabantu, boonse bakali amoyo omwe mukota lya-Solomoni. 13Kwalo tokwakali muntu umbi uwakalimba camba cakukakatila kulimbabo, nokubaboobo bantu bakabalemya. 14Basyomi bakaindilila kuyungililwa ku-Mwami, makamu makamu aabaalumi abakaintu, 15aboobo bakatola balwazi munzila, bababika amalo amasalu, kuti ainda Petro, muzinzimwa wakwe ukabeenzye bamwi. 16Alimwi kwakabungana makamu makamu aamuminzi iizingulukide Jerusalemu, balaleta baciswa abapenzegwa myuuya mibi, boonse bakaponyegwa.

Baapostolo mbobakajatwa alimwi

17Elyo kwakanyamuka mupaizi mupati ambabo boonse abakali anguwe (nkokuti ninkamu yaba-Saduki), bakazywide bbivwe, 18bajata baapostolo, babanjizya muntolongo. 19Kwalo masiku angelo wa-Mwami wajula milyango yantolongo, wabagwisya wati, 20Kamuya mwiime mucikombelo, mwaambile bantu boonse makani aabuumi obu, 21Nobakamvwa obo, bakanjila mucikombelo cifumofumo, baiisya. Elyo kwakasika mupaizi mupati ambaakali abo, wakaita bantu alubeta antoomwe abapati boonse babana ba-Israyeli, batumina kuntolongo kuyoobaleta. 22Pele nobakainka bamapulisa, baakujana tabamo muntolongo, baboola baamba, 23bati, Twaakujana ntolongo ilijalidwe kabotu, abalindilila baliimvwi amilyango, pele notwajula, tatujene muntu mukati pe. 24Eno silumamba wentempele abapaizi bapati nobakamvwa majwi aya, bakazingwa na alagolela kuli makani. 25Mpoonya kwakasika umwi wabaambila wati, Mumvwe, baalumi mbomwakanjizya muntolongo baliimvwi mucikombelo, balaiisya bantu. 26Ndilyonya wakainka silumamba abamapolisa, waakubaleta, pele kacitali caluciso, nkaambo bakayoowa bantu kufuswa mabwe, 27Nobakabaleta, babaimika mulubeta, mupaizi mupati wababuzya, 28wati, Twamulailila akumulailila kuti mutacaambi mulileeli zina, neembo? Eno amulange, mwazuzya Jerusalemu akwiisya kwanu, mulayanda kutujanya mulandu wabulowa bwayooyu muntu, 29Kwalo wakavuwa Petro abaapostolo bati, Tuleelede kumvwa Leza kwiinda bantu, 30Leza wamatateesu wakabusya Jesu, ngomwakajaya, mwakamwaanzika acisamu. 31Oyu, Leza wakamusumpulisya kujanza lyakwe lyalulyo, abe Mwami a-Mufutuli, ape Israyeli kweempa akujatilwa kwazibi. 32Swebo tuli bakamboni bamakani aya, awalo Muuya Uusalala, ngwapa Leza kulibamumvwa,

33Pele balo nobakamvwa obo yakabacisa myoyo, bakanza kubajaya. 34Ndilyonya kwakaima umwi mulubeta, mu-Farisi uutegwa Gamaliyeli, mwiiyi wamulao, uwakali empuwo mucisi coonse, Walailila kuti baapostolo bagwisigwe anze kaindi. 35Wateeti kulimbabo, Nobaalumi ba-Israyeli, amucenjele abantu aba mbomuti cite. 36Nkaambo munsi lyamazuba aya kwakasika Teuda, uwakalipa bupati. Bakaswaangana awe bantu ababa anga myaanda yone, kwalo wakajayigwa, abaabo boonse abakamuswiilila bakamwaika, bakamana. 37Munsi lyayooyo muntu kwakasika Juda, mu-Galilaya, kumazuba aakulembwa, wakabasolwedela bantu banji, bamucilila. Wakajayigwa awalo, abakamuswiilila bakamwaika. 38Aboobo ndati kulindinywe, Amuzwe kubantu aba, mubaleke, nkaambo kwiisya oku amulimo oyu anooli ngwabantu ulamwaika. 39Kwalo na nguwa-Leza, tamukookonzya kuumwaya, ambweni mulajanwa kuti mulwanya Leza, 40Nkabela bakazumina kulinguwe. Bakaita baapostolo, babauma, babalai-lila kuti batacaambi muzina lya-Jesu, babaleka. 41Aboobo bakazwa mulubeta balabotelwa kuti kwakategwa baleelede kunyansigwa nkaambo kezina lyakwe. 42Mazuba oonse tabakalekede kwiisya akukambauka muntempele amumaanda kuti Jesu ngo-Kristo.

Currently Selected:

Incito 5: Ibbaib63

Highlight

Copy