Johane 17

Jesu mbwaakakomba masiku ngaakajatwa

1 # Joh 11:14; 13:1 Eno Jesu aambe buyo majwi aya, wakalungumana kujulu wakati, Taata, ciindi casika. Lemya Mwanaako kuti awalo akulemye. 2#Mt 11:27Mbubonya mbookamupa bwami kubantu boonse, kupa buumi ubutamani kulibaabo boonse mbookamupa. 3#1 Joh 5:20; 1 Tes 1:9Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo. 4#Joh 4:34Ndakakulemya ansi, ndazyulizya mulimo oyo ngookandipa kuti nkuucite, 5#Joh 1:1; 17:24; Flp 2:6Eno Taata, kondilemya antoomwe ayebo abulemu obo mbwendakali kujisi nkencili ayebo, inyika kiitanaanzwa, 6#Joh 17:9; Mt 6:9Ndakazibya zina lyako kubantu mbookandipa abali ansi, Bakali bako, nkabela wabapa ndime, abalo babamba ijwi lyako. 7Eno balizi kuti zyoonse nzookandipa zizwa kulinduwe, 8#Joh 16:30nkaambo majwi ngookandipa ndakaapa mbabo. Bakaatambula, bakazibisya kuti nkasimpe ndakazwa kulinduwe, bakasyoma kuti nduwe owakandituma, 9#Joh 6:37,44Ndabakombela, nsikombeli nyika pele balo mbookandipa, nkaambo mbabako. 10#Joh 16:15; Lk 15:31Zyoonse zyangu nzizyako, ezyako nzizyangu amebo ndalemezegwa mulimbabo. 11#Joh 10:30; Mt 6:13Nsicinoolimo limbi munyika, pele aba bacili munyika, mebo ndiza kulinduwe. Taata Oosalala, babambe muzina lyako abo mboondipede, kuti babe bamwi, mbuli mbotubede aswebo. 12#Int 41:9; 109:8; Joh 13:18; 6:39; 2 Tes 2:3Nendacili ambabo, ndali kubabamba muzina lyako ndookandipa, Ndali kubatabilila, eno taakwe omwe wabo uusweekede pele mwana uuingaila walo, kuti Magwalo azyulile, 13#Joh 15:11Pele eno ndiza kulinduwe, alimwi makani aya ndaamba ansi, kuti babe akukondwa kwangu ukuzyulide mulimbabo. 14#Joh 15:19Ndakabapa ijwi lyako, pele inyika yakabasula, nkaambo tabali banyika, mbuli mbwentali wenyika amebo. 15#2 Tes 3:3; 1 Joh 5:18; Mt 6:13; Lk 22:32Nsikumbili kuti ubagwisye munyika, pele kuti ubavune kulooyo mubi. 16Tabali banyika mbuli mbwentali wenyika amebo, 17#Joh 6:63Ubasalazye abwini bwako, ijwi lyako mbobwini, 18#Joh 20:21Mbuli mbookandituma munyika, amebo ndakabatuma munyika mbubonya. 19#Heb 10:10Ndalisalazya nkaambo kabo, kuti abalo basalazigwe mubwini. 20#Joh 17:9Tabali aba balo mbenkombela, pele abaabo boonse abandisyoma nkaambo kejwi lyabo, 21#Gal 3:28kuti boonse babe bamwi, mbuli nduwe Taata mboli mulindime, amebo mulinduwe, kuti abalo mbubonya babe mulindiswe, kuti inyika ikasyome kuti nduwe owakandituma. 22#Inc 4:32Abwalo bulemu mbookandipa ndabupa mbabo, kuti babe bamwi mbubonya mbotuli bamwi, 23#1 Kor 6:17; Gal 2:20mebo ndibe mulimbabo, ayebo mulindime, kuti bazuzigwe kuba bamwi, kuti inyika ikazibe kuti nduwe owakandituma, nduwe owakabayanda mbubonya mbookali kundiyanda amebo, 24#Joh 10:29; 12:26; Ef 1:4Taata ndiyanda kuti abo mbookandipa babe antoomwe amebo nkwembede, kuti babone bulemu bwangu mbookandipa, nkaambo wakali kundiyanda inyika kiitanaanzwa, 25Taata ooluleme, inyika teyali kukuzi, pele mebo ndali kukuzi, abaaba bali kuzi kuti nduwe owakandituma. 26Eno ndabazibya zina lyako, alimwi ndiyoolizibya kuti luyando ndookali kundiyanda andulo lukabe mulimbabo, amebo mulimbabo.

Currently Selected:

Johane 17: Ibbaib63

Highlight

Copy