Jeremiya 5
5
Zibi zya-Jerusalemu
1 #
Ezk 22:30; Mik 7:2; Int 12:1 Amweendeende mumigwagwa ya-Jerusalemu, kuti mukabone akuziba makani. Amuyandaule muzisambalilo zyawo, mubone na kulajanika muntu naba omwe uucita bululami akubika moyo wakwe kulusinizyo, kuti nkaulekelele zibi zyawo. 2Balaamba kuti, Jehova mbwali muumi, nekubaboobo kukonka kwabo ncobeni nkwalweeno. 3O Jehova, sa meso aako taalindili lusinizyo? Wakabauma, pele tabakwe nibakausa insoni. Wakabamanisya, pele bakakaka kutambula lulayo. Bakayumya masyu aabo nta kwiinda ibbwe, bakaka kupiluka. 4Lino ndakaamba kuti, Ncobeni aba mbantu batengwana buyo, balifubeede, nkaambo tabazi inzila ya-Jehova niziba imbeta zya-Leza wabo. 5Njiinke kubapati, nkabaambile, nkaambo mbombabo bezi inzila ya-Jehova ambeta zya-Leza wabo. Pele boonse buyo balyeelene, boonse balityolede ijokwe akudunsaula zyaanzyo zyabo. 6Nkaambo kako mulavu wamulusaka uyoobauma, aumpe wamunkanda uyoobajaya. Siluwe ulalindila minzi yabo; kufumbwa uuzwa mulinjiyo uyoozapaulwa; nkaambo milandu yabo yavula, andeyo zyabo nzinji. 7Nkamulekelele buti? Bana bako balinditakatide, balakonka muzina lyabaabo batali baleza, Nindakabakutya, bakacita bumambe, bakayoboloka boonse kumaanda aabwaamu. 8Bakalikozyene ambizi iineneede incende; umwi aumwi wakali kulila mukamweenzinyina. 9Sa nsikooyoobauma nkaambo kamakani aya? mbwaamba Jehova. Sa nsikooyooliya inkoto kumusyobo uuli boobo?
Bazwakule mbubazookona Jerusalemu
10Koya bweenda akati kamindando yamisaansa yakwe, ukanyonyoone pele utamaninizyi. Kosola mitabi yakwe, nkaambo tayeensi ya-Jehova. 11Nkaambo luzubo lwa-Juda aluzubo lwa-Israyeli loonse, tabana kusyomeka kulindime abuniini, mbwaamba Jehova. 12Baamba cakubeja aa-Jehova, bati, Taakwe makani; tatukooyoosikilwa mapenzi, tatukooyoobona ipanga niiba inzala pe. 13Basinsimi balizwide muuwo buyo, ijwi talili mukati kabo. Mbuboobu mbubayoocitilwa! 14Lino mbuboobu mbwaamba Jehova Leza wamakamu. Nkaambo kamajwi aya ngebaamba, bona! Majwi aangu aali mumulomo wako njooasandula kuba mulilo, abantu aba bayooba inkuni, nkabela uyoobasukutya. 15Amubone, nuluzubo lwa-Israyeli, mbwaamba Jehova. Njoomuletela musyobo uuzwa kule, musyobo moongozi, musyobo wakalekale, musyobo uuli amwaambo ngomutezi, alimwi tamumvwisyi mbubaamba. 16Inkomo yamivwi yabo ili mbuli kabanda kajulukide. Boonse buyo mbaalumi basintaze. 17Bayoolya maila aako acilyo cako coonse. Bayoolya bana bako balombe abana bako basimbi. Bayoolya imbelele zyako aŋombe zyako. Bayoolya misaansa yako ankuyu zyako. Aminzi yako iili amabaya njosyoma balaimwazya ipanga.
18Nekubaboobo amumazuba ayo nsikooyoomumaninizya, mbwaamba Jehova. 19Pele babuzya buyo kuti, Ino nkaambonzi Jehova Leza wesu watuletela mapenzi aya oonse? lino uleelede kubaambila kuti, Mbubonya mbumwakanditakata akumanina baleza bambi milimo munyika yanu, anywebo muyoobelekela bambi mbubonya munyika iitali yanu.
Basizibi bacenjezegwa kuyoowa Jehova
20Kolungulwida luzubo lwa-Jakobo aya makani, akwaakambauka mucisi ca-Juda. Amba kuti, 21#Is 6:9-10; Ezk 12:2; Mk 8:18; Mt 13:14; Joh 12:40; Inc 28:26Amuswiilile nubantu bafubafuba babula bongo, inywe nomujisi meso aataboni amatwi aataswiilili. 22#Ciy 15:4; Job 26:10; Tus 8:29; Job 38:8-11Sa tamuyoowi ndime? mbwaamba Jehova. Sa tamukankami kubusyu bwangu? Ndime ndakabika musenga kuti ube mugaano walwizi, ngumulao uutamani nguluta-konzyi kusotoka. Mayuwe aalo alatengauka, pele taakonzyi kuzunda; alavuuma, pele taakonzyi kusotoka. 23Pele bantu aba balijisi moyo muyumu uukataazya; baleya, bainka kumbi. 24#Mt 5:45; Joel 2:23; Matl 8:22Tabana kwaamba mumyoyo yabo kuti, Atuyoowe Jehova Leza wesu uutuwisizya imvula, imvula yakutanga amvula yamiyoba yoonse kuciindi cayo, akutubambila insondo zyeelede zyakutebula. 25Milandu yanu njeyakasya zintu ezi, azibi zyanu zyamusinkinizizya zintu zibotu. 26Nkaambo kwajanwa basizibi akati kabantu bangu. Balalindila mbuli bavwimi mbubalindila, balateya inkole, balaca bantu. 27Mbuli cizangala mbucizwide bayuni, maanda aabo alizwide lweeno mbubonya, Nciceeco ncibabeda bapati abavubi. 28#Int 73:12Balineneede akubungusana, Balainda kucita milimo mibi. Kubeteka tababeteki kabotu makani aabamucaala kuti bajane coolwe, aalo makani aabatengwana tabaakosoli kabotu. 29#Mal 3:5Sa nsikooyoobauma nkaambo kamakani aya? mbwaamba Jehova. Sa nsikooyooliya inkoto kumusyobo uuli boobo?
30Ma! Cintu ciyoosya cuusya insoni caba munyika. 31#Ezk 13:6; Is 30:10Basinsimi balasinsima cakubeja, abapaizi baleendelezya mbubabalailila, abalo bantu bangu balayandisya makani aali boobo. Pele muyoocitanzi kumamanino aawo?
Currently Selected:
Jeremiya 5: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
