Jeremiya 6
6
Munzi mbuuyoosinkinizigwa
1 #
Jos 18:28; Bab 1:21; Neh 3:14 Nubana ba-Benjamini, amucije kuzwa ku-Jerusalemu. Amulizye mweembo mu-Tekoa akusumpula indembela ku-Beti-hakeremu, nkaambo mapenzi alaboneka kuzwa kulubazu lwakunyika alunyonyooko lupati. 2Mwana musimbi wa-Zioni, simacece uuebeka, njoomunyonyoona. 3#2 Bam 25:1Beembeli bayoosika kulinguwe amatanga aabo, bayooyaka zilao zyabo cakumuzyunguluka, akucezya matanga aabo umwi aumwi mubusena bwakwe. 4Amulibambe kumulwisya! Amunyamuke twiinke ciindi casikati! Maawe! Izuba lilatubbilila, azyenzule zyakumazuba zilaya bulampa! 5Amunyamuke, twiinke masiku, tunyonyoone maanda aakwe aabwami. 6#2 Bam 21:16Nkaambo mbuboobu mbwaamba Jehova wamakamu. Amugonke misamu, muyake citantaala cavu cakulwisya Jerusalemu. Nguwo munzi uuelede kukomwa; moonse mukati kawo mulizwide lunyansyo. 7#Int 55:9-11; Jer 20:8; Ezk 7:11; Mik 7:2,3Mbuli kasensa mbukatuntumusya maanzi aako cakutayuminina, ulatuntumusya bubi bwawo mbubonya, Mukati kawo mulamvwigwa lunyansyo alunyonyooko, Malwazi amabunda mpaali lyoonse kumeso aangu. 8#Ezk 23:18; Hos 9:12Kolayigwa, O Jerusalemu, kuti moyo wangu utaleki kukuyanda, ntakubiki mbuli matongo, nyika iibula bantu.
Jehova ncaakalalila
9Mbuboobu mbwaamba Jehova wamakamu. Vulula ba-Israyeli basyeede mbubonya mbuli musaansa mbuuvulululwa. Ijanza lyako liboole alimwi kwiinda kumitabi mbubonya mbwacita sikucela. 10#Kul 6:12; Jer 7:26; 20:8; Lk 11:45; 2 Tim 4:3,4Mbobani mbonkonzya kwaambila akubacenjezya kuti baswiilile? Ncobeni matwi aabo taapalwidwe, tabakonzyi kuswiilila. Ncobeni ijwi lya-Jehova lyababeda cintu cisampaulwa, tababotelwi ndilyo pe. 11#Jer 8:10; Zef 1:13Nkaambo kako ndizwide bukali bwa-Jehova, ndakataala kulikasya. Tulula moyo wako kubana bamumigwagwa akubasankwa nkubabungene. Bayoojatwa baalumi abanakazi boonse, bapati abacembele. 12#Jer 8:10-12; Zef 1:13Maanda aabo ayoosandulwa kuba mumaanza aabambi, myuunda yabo abanakazi babo boonse, nkaambo njootandabika ijanza lyangu kukuuma bantu bakede munyika, mbwaamba Jehova. 13#Is 56:11; Mik 3:5Nkaambo boonse buyo balayandisya kunyanzya-nyanzya, nibaba bapati nibaba baniini, abasinsimi abapaizi boonse balacita cakubeja. 14#Ezk 13:10Balasilika-silika mibunda yabantu bangu amajwi aabo aakuti, Muli aluumuno, muli aluumuno! anukuti taakwe luumuno pe. 15#Jer 3:3Sa bakausa insoni nibakacita zisesemyo? Ne! Teebakafwa insoni. Kufwa bweeme tabakuzi pe. Nkaambo kako bayooba akati kabaabo bawide mulufu. Kuciindi eco ninzoobakoma bayoonyonyooka, mbwaamba Jehova.
Kuswiilila ncintu cipati kwiinda zipaizyo
16 #
Jer 18:15; Mal 4:4; Lk 16:29; Is 28:12; Mt 11:29 Mbuboobo mbwaamba Jehova. Amwiime munzila, mubone, mubuzye inzila zyaciindi, nzenzizyo ziindika kabotu, Amweende mumonya, elyo myoyo yanu iyoojana cilyokezezyo. Pele bati, Tatukooyooenda mumo pe. 17#Is 21:11; Jer 25:4; Hab 2:1Ndakamubikila balindizi. Ndakaamba kuti, Amuswiilile ijwi lyamweembo, Pele bati, Tatukooyooswiilila pe. 18Nkaambo kako, amuswiilile nubamasi. Amuzibe, nubantu babungene, citi sike kulimbabo. 19#Tus 1:31Swiilila, O nyika, Ncobeni mebo ndaletela bantu aba bubi, nkukuti micelo yamiyeeyo yabo, nkaambo tabana kuswiilila majwi aangu, amulao wangu baukaka. 20#Is 66:3; 60:6; Mik 6:6Tulijisi milimonzi kulindime tununkilizyo tuzwa ku-Se ba, amisale mibotu iizwa kunyika yakule? Zituuzyo zyanu tazitambuliki, azipaizyo zyanu tazindibotezyi pe. 21#Job 5:12; Is 8:14; Jer 13:16Nkaambo kako mbuboobu mbwaamba Jehova. Bona! Ndabikila bantu aba zifumpuzyo, nkabela bayoolifumpula kulinzizyo bamawisi abana babo boonse, amuntu amweenzinyina boonse bayoonyonyooka antoomwe.
Mapenzi aazwa kulubazu lwakunyika
22Mbuboobu mbwaamba Jehova. Kulazwa bantu mucisi cakulubazu lwakunyika. Kulabuka musyobo mupati kuzwa kumagolelo aanyika. 23#Is 5:30Balabweza mata amasumo. Mbayumumyoyo, tabajisi luzyalo pe, Ijwi lyabo lilavuuma mbuli lwizi. Balitantide amabbiza, balilibambide mumindando yabo mbuli basilumamba kuti bakulwisye, O mwana musimbi waZioni. 24#Int 48:6; Is 21:3; Jer 4:31; 13:21; 30:6; 49:24Twamvwa impuwo, Maanza esu alebuka. Atujata mapenzi amacise mbuli macise aamwanakazi mutumbu. 25#Bab 5:6Utainki musokwe, utanooendi munzila, nkaambo basinkondonyoko balijisi mapanga, azintu ziyoosya nkuzili koonse koonse. 26#Is 32:11; Jer 4:8; Mik 1:10; Zek 12:10O mwana musimbi wabantu bangu, sama zisani zyamasaka, alabana mukati katwe, lila mbubonya mbuli muntu mbwalila mwanaakwe simuzyalwaalike, omoka cakupengesya, nkaambo sikusaala woongomoka kutulwisya,
27Ndakubika kuti ube sikulingula akati kabantu bangu, ukalingule inzila zyabo akuziba mbuzibede. 28#Ezk 22:18Boonse buyo mbasicinguni loko, Balaya bulengelela beenzinyina twaambo. Mbayumu mbuli mundalila na butale. Boonse buyo balabisya. 29Mavuba alafulida canguzu, lubulo lweenzunuka mumulilo, pele kusalazya nkwabuyo, basizibi tabazwi pe. 30#Hos 9:17; Zek 11:8Balaambwa kuti ninsiliva iikakidwe, nkaambo Jehova wabakaka.
Currently Selected:
Jeremiya 6: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
