Lwa-Jakobo 4

Inkondo mbuzibisizya buumi akupambukanya bantu a-Leza

1 # Rom 7:23; 1 Pet 2:11 Zizwa kuli inkondo? Azwa kuli maambani akati kanu? Sa tazizwi kumisalo yaansi iilwana mumibili yanu? 2Mulasukama pele tamukwe cintu. Mulajaya akufwa ibbivwe, pele tamukonzyi kujana. Mulaambana akulwana, pele tamulijanini cintu nkaambo kakutakumbila kuli-Leza. 3Mulakumbila zimwi, pele tamupegwi, nkaambo kukumbila kwanu takweensi kwamuciyanza cibotu, Mulakumbila zintu kuti muzisowe kumisalo yanu.

4 # Lk 6:26; Rom 8:7; 1 Joh 2:15 Nywebo nobasimamambe, sa tamuzi kuti kutangana buzwalani anyika, nkokulwana a-Leza? Eno kufumbwa muntu uulisalila kuba muzwalani wanyika walicita sinkondonyina a-Leza. 5#Kul 20:3,5; Mt 6:24; Gal 5:17Sa muyeeya kuti magwalo aamba buyo aamba kuti, Muuya ngwaakakalika mukati kesu ulizwide ibbivwe. 6#Tus 3:34; Job 22:29; Mt 23:12; 1 Pet 5:5Pele ulapa aluzyalo luya buvula. Nkaambo kaako kulaambwa kuti,

Leza ulabakazya basikulisumpula,

Pele batete-myoyo ulabapa luzyalo.

7 # Ef 6:12; 1 Pet 5:8,9 Eno amulibombye kuli-Leza. Amumukazye Saatani, uyoomucija. 8#Zek 1:3; Is 1:16Amuswenenene kuli-Leza, elyo alakwe ulamuswenenena. Amusanzye maanza aanu, anywebo nobasizibi. Amulisalazye kumyoyo, nywebo nobasimyoyo-yobile. 9Amoomoke akuungumana akulila. Kuseka kwanu akusanduke kulila, alwalo lukondo lwanu alusanduke kuungumana. 10#1 Pet 5:6Amukalibombye kumeso aa-Mwami, akamusumpule.

Makani aakubetekana

(Matayo 7:1-5; Ba-Roma 2:1-3)

11Bakwesu, mutavwiyani, nkaambo uuvwiya mweenzinyina, naba uubeteka mweenzinyina, wabisya mulao, wabeleka mulao, eno mbowabeteka mulao toli sikubamba mulao, pe, uli silubeta buyo, 12#Mk 7:1; Rom 2:1; 14:4Kuli umwi uulenga milao, uubeteka, ngonguwe uukonzya kufutula akufwidilizya. Ino nduweni yebo obeteka mweenzinyoko?

Tatweelede kulisumpwida ajunza

13 # Tus 27:1 Ikaka nywebo nomwaamba kuti, Sunu na junza ndaya kuli banyomfwi, tukakale oko mwaka woonse, tukasambale, tujane impindu. 14#Lk 12:20; Int 39:5,11Anukuti tamucizi ciyooba junza. Ino buumi bwanu ninzi? Ningubi buyo iibonwa kaindi kaniini, ndilyonya yamana, 15#Inc 18:21Cintu ncimweelede kwaamba nceeci cakuti, Na Mwami wayanda, tulapona, tulacita bobuya abobuya. 16Ani eno mulalikankaizizya kulisumpula kwanu. Kulikankaizya kuli bobuya koonse nkubi. 17#Lk 12:47; Rom 14:23Lino oyo uuzi kucita kabotu, nekubaboobo taciti, wabisya.

Currently Selected:

Lwa-Jakobo 4: Ibbaib63

Highlight

Copy