Lwa-Jakobo 3

Makani aalulimi

1 # Jak 1:19 Bakwesu, mutalibiki bafundisi banjibanji, amuyeeye kuti swebo tobafundisi tuyoojana kubetekwa kuyumu kwiinda, 2#Jak 1:26Nkaambo toonse tulalubya muziyanza zinji, pele, na kuti muntu uutalubya kukwaamba, oyo ngomuntu mulondosi, nguukonzya kukoma mubili wakwe woonse. 3Bona, twabika tomu mukanwa kambizi, kuti ituswiilile, elyo tulapilaula amubili woonse. 4Alimwi amubone maato! Mapati loko, alatontwa amyuuwo mikali, nekubaboobo alapilaulwa ankasi iniini, kufumbwa nkwakanza sikweenzya. 5Mbubonya obo, alwalo lulimi ncizo ciniini buyo, pele lulalilumbaizya kumakani mapati. Amubone kalilo kaniini mbukaumpa cisaka cipati! 6#Mt 15:11,18,19; 12:36,37Alwalo lulimi mulilo. Ninsi yabubi akati kazizo zyamibili yesu. Lulabisizya mubili woonse, eno lulaumpa isokwe lyesu lyoonse, alwalo lwini lulatomekwa mugehena. 7Nkaambo misyobo yoonse yabanyama ayabayuni ayabauka ayazinyama zikala mulwizi ilabombezegwa, yakabombezegwa kale kubantu, 8#Int 140:3pele taakwe muntu uukonzya kubombya lulimi pe. Mbubi butakonzya kuzundwa, lulizwide musamu uujaya. 9#Matl 1:26Ndondulo ndotulumbya Mwami Taateesu, alimwi ndulonya ndotutukizya bantuma abakalengwa mucikozyano ca-Leza, 10Mumulomo omwe mulazwa kulumba akutukila, Bakwesu, makani aali boobo taaelede kubawo. 11Sa mukasensa komwe mulazwa maanzi mabotu amaanzi aalula? 12Bakwesu, sa bukuyu inga bulazyala insikili, nuuba musaansa inga ulazyala inkuyu? Aalo maanzi aalula taakoozwa antoomwe amabotu.

Busongo buzwa kujulu mbububede

13 # Jak 2:18; 1 Pet 2:12 Nguni muntu musongo akati kanu? Nguni uuli amaanu? Atondezye mbwiibede milimo yakwe kukweenda kabotu, alimwi abe amoyo mubombe wabusongo. 14#Ef 4:31Pele kuti mwanoojisi ibbivwe alukazyanyo mumyoyo yanu, mutalilumbaizyi ankuko nekuba kubejezya lusinizyo. 15#Jak 1:5,17Obo tabweensi busongo buzwa kujulu, mbwaansi buyo, mbwabunyama, mbubwabadaimona. 16Nkaambo nkulibede ibbivwe alukazyanyo, nkukonya oko nkulujanwa lupyopyongano amilimo mibi yoonse, 17#Heb 12:11Pele busongo buzwa kujulu, lutaanzi bulasalala, alimwi mbwaluumuno, bulatontola, bulibombede, bulizwide lweetelelo amicelo mibotu, tabujisi lwaanzaano lwamoyo niluba luupaupo ameso. 18#Is 32:17; Mt 5:9Alimwi basiluumuno basyanga muluumuno balatebula micelo yabululami.

Currently Selected:

Lwa-Jakobo 3: Ibbaib63

Highlight

Copy