Isaya 2
2
Cilengano cabwami bwa-Leza
1Ngaaya majwi aa-Isaya mwana wa-Amozi, makani ngaakabona aa-Juda a-Jerusalemu.
2 #
Mik 4:1; Inc 2:17; Dan 2:35; Ciy 14:1 Kumamanino aaciindi cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela masi oonse anooya bukunka kulincico. 3#Zek 8:21; Lk 24:47Misyobo minji inooya bwaamba kuti, Atwiinke, tukaye kucilundu ca-Jehova, kuŋanda ya-Leza wa-Jakobo, elyo uyootwiisya inzila zyakwe, nkabela tuyooenda muziyanza zyakwe. Nkaambo mu-Ziyoni muyuozwa mulao, alyalo ijwi lya-Jehova liyoozwa mu-Jerusalemu. 4#Joel 3:10; Mik 4:3; Joh 5:22; Hos 2:18Nkabela uyoobeteka akati kamasi akukosola makani aamisyobo minji, Lino bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.
Leza mbwaazoobuka kukubeteka nyika
5 #
Inc 26:23
O luzubo lwa-Jakobo, amuboole, tweende mumumuni wa-Jehova. 6#Dt 18:14Nkaambo wabaleka bantu bako baluzubo lwa-Jakobo, nkaambo kakuti bazula ziyanza zyakujwe, alimwi mbasondi mbuli ba-Filisti, alimwi balatanga mulongo abana babeenzu. 7Nyika yabo ilizwide insiliva angolida; zintu zyabo ziyandisi tazibaliki. Nyika yabo ilizwide mabbiza, azyalo inkalaki zyabo tazibaliki. 8Nyika yabo ilizwide zikozyano zyamituni; balakomba milimo yamaanza aabo beni azintu minwe yabo beni nziyakapanga. 9Muntu mutengwana ulakotama, alakwe mupati ulalibombya. Nkaambo kako utabalubi. 10#Ciy 6:15; 2 Tes 1:9Njila mukati kamandomba, koyuba mulusuko, kuzwa kukuyoowegwa kwa-Jehova abulemu bwabupati bwakwe. 11#Is 12:1,4; 24:21-23; 25:9; 26:1; Jer 30:7,8; Joel 3:18; Am 9:11; Ob 1:8; Mik 5:10Kulisumpula kwamuntu kuyoobombesegwa, akulilemeka kwabantu kuyoosisigwa ansi. Jehova alike nguuyoolemekwa mubuzuba obo.
12Nkaambo boonse basicisapi abalikankaizya aboonse balisumpula bayoosikilwa buzuba bwa-Jehova, elyo bayoobombesegwa. 13Ayalo misamu yoonse yakedari yaku-Lebano iisumpulwa, amibanga yaku-Basani, 14azilundu zyoonse zilamfu, atulundu toonse tusumpulwa, 15amaanda oonse malamfu, amalambo oonse aabikilwa zilwisyo, 16amaato oonse aakuTarisi, azikozyano zyoonse zyeebesi, zyoonse buyo ziyoosikilwa buzuba. 17Kulisumpula kwa bantu kuyoobombesegwa, akulilemeka kwabantu balya maila kuyoosisigwa ansi, Jehova alike nguuyoolemekwa mubuzuba obo.
18Lino zikozyano zyamituni ziyoomaninina. 19#Hos 10:8; Lk 23:30; Ciy 6:16; 2 Tes 1:9; Int 7:6; Nah 1:3-6; Hab 3:6; Hag 2:6; Heb 12:26Nkabela bantu bayoonjila mumampangala aamumandomba amumalyango aamunyika nkaambo kakuyoowa Jehova abulemu bwabupati bwakwe naazoobuka kukutikimuna nyika. 20Mubuzuba obo muntu uyoosowa zikozyano zyakwe zyansiliva azikozyano zyakwe zyangolida nzibakalipangila kuti azikotamine. Ulazisowela basimalukwe abasimudima, 21kuti anjile mumalindi aamumandomba amumalyango aamumabwe, nkaambo kakuyoowa Jehova abulemu bwabupati bwakwe naazoobuka kukutikimuna nyika, 22#Tus 23:4Amuleke kusyoma muntu uuyooya mumansyono aakwe, Ulagwasya nzi?
Currently Selected:
Isaya 2: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
