Isaya 19
19
Makani aasinsimwa aa-Egepita
1 #
Jer 46:2-26; Ezk 29:1–32:32 Ngaaya makani aasinsimwa aa-Egepita. Amubone! Jehova uleza ulitantide ajoba lyaluno, ulanjila mu-Egepita, elyo zikozyano zyamituni zya-Egepita ziyookankama kubusyu bwakwe, nkabela moyo wa-Egepita uyooenzunuka mukati kaco. 2#Bab 7:22; 1 Sam 14:16; 2 Mak 20:23Nkabela njoobusya ba-Egepita kuti balwisye ba-Egepitanyina. Bayoolwana, umwi aumwi amuzyalwenyina, umwi aumwi amweenzinyina. Munzi uyoolwisya munzinyina, acisi ciyoolwisya cisinyina. 3Moyo wa-Egepita uyooata mucamba cakwe, amakanze aakwe oonse njooapilinganya. Elyo bayoobika myoyo yabo kumituni akubasondi akubasibusangu akubalozi. 4Lino njooaba ba-Egepita mumaanza aamwami muyumu. Mwami mukali uyoobaendelezya, mbwaamba Mwami Jehova wamakamu. 5#Jer 51:36; Ezk 30:12Elyo maanzi aakulwizi ayoomana, amulonga uyooleka kweenda, uyooyuminina. 6#2 Bam 19:24Milonga iyoonunka. Tulongalonga twa-Egepita tuyoomaninwa maanzi mane tukayuminine. Matete amalelebu oonse ayoobola. 7Mafulo aakulwizi, kunkomwe yalwizi, azyoonse zibyalidwe kulwizi, zyoonse ziyooyuminina, ziyootandwa mane tazikooyooba limbi. 8Abalo basikuzuba bayoolila, aboonse bawaala tulobyo mulwizi bayoopenga, abaabo bateya tunyandi mumaanzi bayoofwaba. 9Abo babeleka milimo yabutonje abaabo bapesa masani aatuba, boonse bayoousa insoni. 10Minsemu yakwe iyoopwayaulwa, aboonse babelekela mali bayoousa mumyoyo yabo. 11Basilutwe ba-Zoani mbafubafuba buyo. Basinkuta bacenjede ba-Farao, lulayo lwabo lwasampuka. Uyooambila buti Farao kuti, Ndi mwana wabasongo, mwami wabami baciindi. 12#Is 41:22,23; Inc 7:22; 1 Kor 1:20No bali kuli basongo bako? Bakulwiide, bazibe makani Jehova wamakamu ngaakanzide aa-Egepita. 13#Jer 2:16; Hos 9:6Basilutwe ba-Zoani bafubaala, basilutwe ba-Nefi baenwa. Bami bamikowa yakwe mbobamuleesya Egepita munzila. 14Jehova wavwelenganya miyeeyo yamyoyo yabo alweeno, aboobo balaleesya Egepita mumilimo yakwe yoonse mbubonya mbuli mukolwi mbwapampalika mukuluka kwakwe. 15Takukoosyaalilwa Egepita milimo niiba imwi iikonzya kucitwa kumuntu, nuuba mutwe nuuba mucila, nituba tukunka naaba matete.
16 #
Int 48:6; Is 30:17; Jer 30:5,7; Nah 3:13 Mubuzuba obo ba-Egepita bayooba mbuli banakazi. Bayooyoowa akukankama nkaambo kakuzungaanya kwajanza lya-Jehova wamakamu ndyazungaanya kulimbabo. 17Nkabela nyika ya-Juda iyoobeda ba-Egepita ciyoosya. Kufumbwa muntu uuambilwa izina lyayo uyooyoowa, nkaambo kamakanze aa-Jehova wamakamu ngaakanzide kulinjiyo.
18Mubuzuba obo kuyooba minzi yosanwe munyika ya-Egepita ilaamba mwaambo wa-Kanana akukonka muzina lya-Jehova wamakamu, Umwi uyooambwa kuti Munzi wazuba,
19 #
Matl 12:7; Kul 24:4; Jos 22:10; Heb 13:10 Mubuzuba obo kuyooba cipaililo ca-Jehova mukati kanyika ya-Egepita, akwalo kumugaano waya kuyooyakilwa Jehova musemu. 20#Jos 4:20; Is 55:13Ciyoobeda Jehova wamakamu citondezyo abukamboni mucisi ca-Egepita, nkaambo bayookwiilila Jehova nkaambo kabasikupenzya, elyo uyoobatumina mufutuli, muvuni, uyoobafutula. 21#Mal 1:11Jehova uyoozibwa kuba-Egepita, abalo baEgepita bayooziba Jehova mubuzuba obo. Bayookomba akuleta cipaizyo acituuzyo, Bayoolumbila Jehova cilumbizyo, alimwi balacicita mbubonya. 22Nkabela Jehova uyoouma Egepita, uyoouma akuponya. Bayoopiluka kuli-Jehova, elyo uyookombelezegwa kulimbabo akubaponya.
23 #
Is 11:15
Mubuzuba obo kuyooba mugwagwa uuzwa ku-Egepita kuya ku-Asuri. Ba-Asuri bayoosika ku-Egepita, abalo ba-Egepita bayoosika ku-Asuri, nkabela ba-Egepita bayookomba antoomwe aba-Asuri.
24Mubuzuba obo musyobo wa-Israyeli uyooba watatu a-Egepita a-Asuri. Bayooba coolwe mukati kanyika, 25#Int 100:3; Hos 2:23; Rom 3:29; Ef 2:10; Flp 1:6nkaambo kakuti Jehova wamakamu wabapa coolwe, wati, Babe acoolwe bantu bangu ba-Egepita, aba-Asuri milimo yamaanza aangu, aba-Israyeli lukono lwangu.
Currently Selected:
Isaya 19: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
