Hebrayo 7
7
Mupaizi Melkisideke mbwaakapimpilizigwa a-Kristo Mupaizi Mupati
1 #
Matl 14:17-20
Nkaambo oyu Melkisideke, Mwami wa-Salema, mupaizi wa-Leza uuli kujulu kwinikwini, wakaswaana Abrahamu naakapiluka kukujaya bami, wakamulongezya, 2alimwi ngonguwe ngowakaabilwa coonse cimanyakumi kuli-Abrahamu, Izina lyakwe lilasaanguna kupandululwa kuti, Mwami wabululami, alimwi Mwami wa-Salema, nkokuti Mwami waluumuno. 3#Int 110:4Walo mbwaatakwe wisi, nobaba banyina, nobaba basyaanene bakwe, mbwatakwe naaba matalikilo naaba mamanino aabuumi bwakwe, pele wakalengwa mbwaakalengwa Mwana a-Leza, unooli mupaizi amuyamyaaka.
4Eno amuyeeye bupati bwamuntu oyu mbobubede, uwakapegwa kulisikale Abrahamu cimanyakumi calubono ndwaakaakusaala. 5#My 18:21Alimwi abo babana ba-Levi abacitwa bapaizi ncobeni balaililwa mu-Mulao, kuti basangilwe cimanyakumi kubantu, nkokuti kubanabakwabo, nokuboobo abalo mbazyalwa ba-Abrahamu, 6pele walo oyo uuteezeezegwa kuba wamukowa wabo wakapegwa cimanyakumi kuli-Abrahamu, wakamulongezya walo ngwaakasyomezya Leza. 7Eno takukwe uzumanana kuti muniini inga ulalongezegwa mupati, 8Alimwi sunu mbantu bafwa buyo mbabasangilwa cimanyakumi, kwalo oko omwe wakasangilwa ngowakabonwa kuti muumi. 9Mboiti walo Levi oyo uusangilwa cimanyakumi ulasangwa muli-Abrahamu. 10Nkaambo Levi wakacili mucikungu casyaanenaakwe kuciindi eco Melkisideke naakaswaangana Abrahamu.
11Alimwi kuti bupaizi bwabana-Levi nobwali kulomene (nkaambo kubupaizi obu bantu nkobakatambula Mulao), ino kai nkaambonzi ncokwakali kuciyandika musyobo umbi wabupaizi, ubuli mbuli bwa-Melkisideke nobutaambwa buyo kuti buli mbuli bwa-Arone? 12Nkaambo kuti bupaizi bwasandulwa, kweelede kuti awalo Mulao usandulwe, 13Oyo uupandululwa boobo ngwamusyobo umbi, eno kumusyobo oyo takukwe naba omwe uwakalisangide kucipaililo. 14#Matl 49:10; Is 11:1Nkaambo kulizibidwe kuti Mwami wesu wakazwida kuli-Juda, nkabela Musa taakwe naakabwaamba bupaizi kumusyobo oyo pe. 15Eno aya oonse alamvwikika cakwiinda na kwazwa mupaizi umbi uuli mbuli Melkisideke, 16uutacitwa Mupaizi kumulao wabantu baansi, pele uucitwa canguzu zyabuumi butakwe nobumana. 17#Int 110:4; Heb 5:6Nkaambo mbobuya mbwaakalungululwa kuti,
Nduwe mupaizi walyoonse,
Uuli mbuli Melkisideke.
18Eno Mulao wakusaanguna waloba nkaambo kakulengauka kwawo abuliwo bwawo, 19#Heb 9:9(nkaambo Mulao tuukwe cintu ncowakalondola), alimwi twalerelwa bumwi bulangizi bubotu ubutuswenya afwaafwi kuli-Leza. 20Eno eci cakacitilwa akukonka, 21#Int 110:4(Nkaambo bapaizi abo abakasaanguna tabakwe nobakakonkwa, bakacitwa buyo bapaizi, pele walo wakacitwa Mupaizi akukonka ukuzwa kulooyo uwakamwaambila kuti,
Jehova wakakonka, taakwe nati kasandule kumajwi ngaakaamba kuti,
Nduwe mupaizi walyoonse).
22 #
Heb 8:6; 12:24 Aboobo Mulongo ngwatutangila Jesu nguuinda kubota. 23Alimwi abo bakaba bapaizi banjibanji kukubalwa, nkaambo kakuti lufu lwakali kubakasya kuti kabacicita mulimo wabo, 24pele walo ulakalilila lyoonse, aboobo tajisi muntu uunga ulakala mucibaka cabupaizi bwakwe, 25#Rom 8:34; 1 Joh 2:1Nkaambo kaako, walo uli anguzu zitamani zyakubafutula abo abaswena kuli-Leza kujanza lyakwe, nkaambo lyoonse buyo mpali, ulabakombelezya.
26 #
Heb 4:14
Cali cibotu kuti tube amupaizi simutwe uuli bobuya, uusalala, uutakwe luuni, uutakwe kampenda, uupambukide kuzwa kulibasizibi akusumpulwa kwiinda ijulu. 27#Lev 9:7; 16:6,15Teelede kupaila zipaizyo mazuba oonse mbubonya mbuli abo bapaizi bapati, nkaambo balo bakali kusaanguna kupailila zibi zyabo beni, ulwabili kupailila zibi zyabantu, pele eci Jesu wakacicita lweendo lomwe naakalituula mwini. 28#Heb 5:1,2Nkaambo Mulao nguusala bantu mubulengausi bwabo kuti babe bapaizi bapati, pele lyalo ijwi lyakukonka ilyakacitwa munsi lya-Mulao ndelisala Mwana kuba Mupaizi uulomene amuyamyaaka.
Currently Selected:
Hebrayo 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
