Ezekieli 46
46
Zipaizyo zyabuzuba bwa-Sabata, zyamwezi mupya azyamapobwe amwi
1 #
Is 66:23; Ezk 45:17; Heb 4:9,10 Mbuboobu mbwaamba Mwami Jehova. Mulyango walubuwa lwamukati uulangide kujwe unoojalwa mazuba aali musanu abumwi aakubeleka, pele unoojalulwa mubuzuba bwa-Sabata amubuzuba bwamwezi mupya. 2#Ezk 44:3; Mt 25:10Lino silutwe wacisi uyoonjila mulukonkono lwamulyango kuzwa anze, uyooima kumbali amunsende wamulyango, nkabela bapaizi bayoobamba zituuzyo azipaizyo zyakutontozya, elyo uyookomba kumbali lyacikunguzyo camulyango. Amane kukomba, unooya anze, pele mulyango tuukooyoojalwa mane kusikila igoko. 3#Int 100:4; Lk 1:10Abalo bantu banyika bayookomba kumanjililo aamulyango oyo kubusyu bwa-Jehova mubuzuba bwa-Sabata amubuzuba bwamwezi mupya. 4#My 28:5,9,11,12; Ezk 45:17Nceeci cipaizyo silutwe nceelede kuletela Jehova mubuzuba bwa-Sabata: tubelele tuli musanu akamwi tutajisi kampenda amugutu uutajisi kampenda. 5#My 28:12; Ezk 45:24Acipaizyo cabusu cileelede kuba cisuwo comwe kumugutu umwi aumwi, acipaizyo cabusu catubelele cileelede kuba kufumbwa ncakonzya kupa, acipanzi camusanu acimwi canongo yamafuta kucisuwo cimwi acimwi. 6Alimwi mubuzuba bwamwezi mupya uleelede kutuula kapoho katajisi kampenda, atubelele tuli musanu akamwi amugutu, zyoonse zitajisi kampenda. 7Nkabela uleelede kubamba cipaizyo cabusu, cisuwo comwe kukapoho, acisuwo comwe kumugutu, akutubelele kufumbwa ncakonzya kupa, acipanzi camusanu acimwi canongo yamafuta kucisuwo cimwi acimwi. 8Nasika silutwe wacisi, uleelede kunjila kunzila yakulukonkono lwamulyango akuzwa munzila eyo njiyonya.
9 #
Kul 23:14,17; Dt 16:16; Int 84:7 Abantu banyika nebayoosika kubusyu bwa-Jehova mumapobwe aabikidwe, kufumbwa uunjilila kumulyango wakunyika kukukomba uleelede kuzwida kumulyango wakumusanza, ayooyo uunjilila kumulyango wakumusanza uleelede kuzwida kumulyango wakunyika. Muntu teelede kupiluka kumulyango oyo nguwonya ngwaakanjilila, pe, uleelede kuzwida kumulyango uulangene. 10Banjila, silutwe wacisi alakwe uleelede kunjila akati kabo; bazwa, uleelede kuzwa alakwe.
11Alimwi mumapobwe aziindi zimwi zibikidwe cipaizyo cabusu cileelede kuba cisuwo comwe kukapoho kamwi akamwi, acisuwo kumugutu umwi aumwi, akutubelele kufumbwa ncakonzya kupa, acipanzi camusanu acimwi canongo yamafuta kucisuwo cimwi acimwi. 12#Lev 1:3; 23:37; My 29:39; Mt 20:28; Joh 10:18; Gal 2:20; Tit 2:14; Ezk 44:3Alimwi silutwe wacisi nayanda kubambila Jehova cipaizyo camoyo wakwe mwini, neciba cituuzyo neciba cipaizyo cakutontozya, lino uyoojulilwa mulyango uulangide kujwe. Uyoobamba zituuzyo zyakwe na zipaizyo zyakwe zyakutontozya mbubonya mbuli mbwacita mubuzuba bwa-Sabata. Amana, ulazwa, elyo mulyango ulajalwa musule lyakwe,
13 #
Kul 29:38; My 28:3 Alimwi uleelede kubamba kabelele kali amwaka omwe, katajisi kampenda, kabe cituuzyo ca-Jehova mazuba oonse. Cifumo acifumo uleelede kucita obo. 14Acalo cipaizyo cabusu, uleelede kucibamba cifumo acifumo, cipanzi camusanu acimwi cacisuwo, acipanzi catatu cakanongo kamafuta kukukandya busu, Mbucibede cipaizyo cabusu ca-Jehova. Ngooyo mulao waco walyoonse. 15Mbuboobo mbubeelede kubamba kabelele acipaizyo cabusu amafuta cifumo acifumo, kube cipaizyo calyoonse.
Makani aanyika yasilutwe
16Mbuboobu mbwamba Mwami Jehova. Silutwe na wapa umwi wabana bakwe cipo kuzwa kulukono lwakwe, ciyooba cabana bakwe; ndubono lwabo lwakukona. 17#Lev 25:9,10; Is 61:2Pele na wapa umwi wabazike bakwe cipo kuzwa kulukono lwakwe, ciyooba cakwe mane kusikila kumwaka wabulubusi, lino ciyoobweeda kulisilutwe, cibe lukono lwabana bakwe, bacikone. 18#Int 78:72; Jer 23:5,6; Ezk 45:8Silutwe teelede kubweza lukono lwabantu nekuba kubanyanzya lubono lwabo; uleelede kukonya bana bakwe lukono lwakwe mwini, kuti bantu bangu batamwaisigwi umwi aumwi kuzwa kulubono lwakwe.
Twaanda twakujikila zipaizyo
19Elyo wakandiinzya kumanjililo aali kulubazu lwamulyango, wandileta kutwaanda tusalala twabapaizi tulangide kunyika, nkabela ndabona busena kumagolelo aato aakumbo. 20#2 Mak 35:13; Lev 2:4-7; Ezk 44:19,29; 43:23,24; Kul 19:10; Heb 10:22Lino wakandaambila kuti, Ano bapaizi mpobajikila zipaizyo zyamilandu azipaizyo zyazibi, ampobajikila cipaizyo cabusu, aboobo tabazitoli kulubuwa lwaanze kukusalazya bantu.
21Mpawo wakandisisya kulubuwa lwaanze, wandiinzya kuzyooko zyone zyalubuwa, nkabela ndakabona kuti mucooko cimwi acimwi calubuwa muli kabuwa. 22Muzyooko zyoonse zyone zyalubuwa kamuli tubuwa; kamwi akamwi kakajisi bulamfu bwatukokola tuli makumi one abwaamba bwatukokola tuli makumi otatwe; toonse tone twakaleelene. 23Alimwi mukati kato toonse tone kamuli mindando yamabwe, akusule lyamindando kakuli zijikilo koonse koonse. 24#Rom 12:1; 15:16; Heb 13:16Lino wakandaambila kuti, Nzeezi zijikilo, basimilimo bantempele nkubajikila zipaizyo zyabantu.
Currently Selected:
Ezekieli 46: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
