Ezekieli 43

Cilengano ca-Jehova mbwaakaboola kuntempele

1 # Ezk 10:19 Lino wakandisisya kumulyango, nkukuti mulyango uulangide kujwe, 2#Is 6:3; Ezk 3:23; 9:3; 10:3-4,18-19; 11:22-23; Ciy 1:15; 18:1nkabela ndakabona bulemu bwa-Leza wa-Israyeli bulazwa kujwe. Ijwi lyakwe lyakali mbuli cikwala camaanzi aavuuma, anyika yakamwesegwa abulemu bwakwe. 3#Ezk 1:4; 3:23; Jer 1:10Cilengano ncindakabona cakali mbuli cilengano eco, ncindakabwene naakasika kuzoonyonyoona munzi, mbuli cilengano ncindakabona kumulonga wa-Kebara. Mpawo ndakavundama ansi. 4#Ezk 10:19Lino bulemu bwa-Jehova bwakanjila muŋanda, bweza kumulyango uulangide kujwe. 5#Ezk 3:12; 1 Bam 8:10Nkabela muuya wakandibweza, wandisisya kulubuwa lwamukati, nkabela bulemu bwa-Jehova bwakazuzya intempele.

6 # Ezk 40:3 Lino ndakamvwa muntu ulandaambila kuzwa muntempele, alimwi kakuli muntu iwakaimvwi kulubazu lwangu. 7#Int 99:1,5; 68:16; 1 Mak 28:2; Kul 25:8; Lev 26:12,30; Ezk 39:7; Jer 16:18Wakandaambila kuti, O mwana amuntu, mboobuno busena bwacuuno cangu cabwami abusena bwazituta zyamaulu aangu, nkonzookala akati kabana ba-Israyeli lyoonse. Lino bantu baluzubo lwa-Israyeli tabakooyoosofwaazya limbi izina lyangu lisalala, balo nebaba bami babo, kubumambe bwabo amitunta yabami babo; 8#2 Bam 16:14kukubika zilyatililo zyabo kufwaafwi kuzilyatililo zyangu azikunguzyo zyabo kumbali lyazikunguzyo zyangu, abulambo bulike mbobutwaanzaanya, Basofwaazya izina lyangu lisalala kuzisesemyo zyabo nzebacita. Nciceeco ncendabanyonyweeda mubukali bwangu. 9Basowele kule bwaamu bwabo amitunta yabami babo kuzwa kulindime, lino njookala akati kabo lyoonse mane kukabe kutamani.

10 # Ezk 40:4 Lino yebo, O mwana amuntu, ambila luzubo lwa-Israyeli iŋanda mbwiibede, kuti bafwe bweeme nkaambo kamilandu yabo. Beeleke bube bwayo. 11#Ezk 44:5,6; Mt 28:20Lino na bafwa bweeme nkaambo kazintu zyoonse nzebakacita, lemba iŋanda mbwiibede, mazwido aayo amanjililo aayo abube bwayo boonse, alimwi kobazibya milazyo yayo amilao yayo yoonse akwiilemba mumeso aabo, kuti babambe milao yayo aziyanza zyayo. 12#Int 93:5; Ezk 40:2; Ciy 21:27Ngooyu mulao waŋanda, Atala lyacilundu nyika yoonse iyeengelede iyoosalalisya. Bona! Ngooyu mulao waŋanda,

13 # Ezk 40:5; Kul 27:1-2; 2 Mak 4:1 Lino mbuboobu cipaililo mbucibede. Kweelekwa, ceelekwa atukokola tupati, (kakokola nkokuti kakokola abwaamba bwajanza). Matako aaco ayooba kakokola komwe mubulamfu akakokola komwe mubwaamba, amoombe waco uyooba cisela cakakokola koonse koonse. Mbuboobo matako aacipaililo mbwaabede. 14Alimwi bwiime kuzwa ansi kusikila kucaanzikilo citaanzi bwakali tukokola tobile, abwaamba bwakali kakokola komwe, alimwi kuzwa kucaanzikilo ciniini kusikila kucaanzikilo cipati bwakali tukokola tone, abwaamba kakokola komwe. 15Aciko cacipaizyo ciyooba tukokola tone, alimwi kuzwa kuciko kuyooba meja one aaimvwi. 16Nkabela ciko ciyooba tukokola tuli ikumi atubili mubulamfu atukokola tuli ikumi atubili mubwaamba; ciyooba azyooko zyone zyeelene. 17#Kul 20:26Acaanzikilo ciyooba tukokola tuli ikumi atune mubulamfu atukokola tuli ikumi atune mubwaamba, cili azyooko zyone zyeelene; cilaba amoombe koonse koonse, uli abwaamba bwacisela cakakokola, atako lyaco lili akakokola komwe koonse koonse. Amatantilo aacipaililo ayoolanga kujwe.

18 # Lev 1:5; Heb 9:18-22; Kul 29:35-37 Lino wakandaambila kuti, O mwana amuntu, mbuboobu mbwaamba Mwami Jehova. Njeeyi milao yacipaililo. Mubuzuba obo neciyooyakwa kukutuula zipaizyo akukusansaila bulowa, 19#1 Bam 2:27,35; Is 61:5; Jer 33:18; Ezk 40:46; Kul 29:10; Lev 8:14,15uleelede kupa bapaizi baLevi, basilunyungu ba-Zadoki, baswena kulindime kukundikutaukila, mbwaamba Mwami Jehova, mupoho wacipaizyo cazibi. 20Lino uleelede kubweza bulowa bwakwe akulamba-lamba ameja one aacipaililo akuzyooko zyone zyacaanzikilo akumoombe koonse koonse. Mbuboobo mbomweelede kucisalazya akucitontozya. 21#Kul 29:14; Heb 13:11Alimwi uleelede kutola mupoho wacipaizyo cazibi akumutenta mubusena bweelede anze lyabusena busalalisya. 22Lino mubuzuba bwabili uleelede kutuula simujembwe uutakwe kampenda, abe cipaizyo cazibi, aboobo cipaililo cilasalazigwa mbubonya mbocakasalazigwa amupoho. 23Umane buyo kucisalazya, uleelede kutuula mupoho waŋombe uutakwe kampenda amugutu wambelele uutakwe kampenda. 24#Lev 2:13Aba uleelede kubatuula kubusyu bwa-Jehova, nkabela bapaizi baleelede kubalunga munyo akubatuula babe cipaizyo kuli-Jehova. 25#Kul 29:35Mazuba aali musanu aabili uleelede kubamba impongo yacipaizyo cazibi buzuba bumwi abumwi, alimwi baleleede kubamba mupoho waŋombe amugutu wambelele, boonse batakwe kampenda. 26Mazuba aali musanu aabili baleelede kutontozya cipaililo akucisalazya akucibamba. 27#Lev 9:1; Job 42:8Bamane mazuba aali musanu aabili, lino kutalika mubuzuba bwamusanu aatatu bapaizi banootuula zipaizyo zyanu azituuzyo zyanu zyakutontozya acipaililo, nkabela njoomuswiilila, mbwaamba Mwami Jehova.

Currently Selected:

Ezekieli 43: Ibbaib63

Highlight

Copy