Ezekieli 31
31
Farao ulakozyanisigwa amusamu mupati
1Lino mumwaka wakumi aumwi, mumwezi watatu, mubuzuba butaanzi bwamumwezi, ijwi lya-Jehova lyakandisikila, liti, 2O mwana amuntu, ambila Farao mwami wa-Egepita amakamu aabantu bakwe. Amba kuti, Nguni ngokozyene awe mubulemu bwako? 3#Nah 3:18; Zef 2:13Ncobeni ulikozyene amusamu wakedari waku-Lebano. Kojisi mitabi mibotu, amateu manji aakupa eenzule, abwiime bulamfu, nkabela mutwe wawo wakasika akumayoba. 4Maanzi akali kuulela, amuninga wakali kuukuzya, nkaambo wakali kweenzya tulonga twawo koonse koonse oko nkuwakazikidwe akukunkya magombela aawo kumisamu yoonse yamusokwe. 5#Int 37:35,36; Dan 4:11; Is 10:7-11,13Nciceeco bwiime bwawo ncibwakalampila kwiinda misamu yoonse yamusokwe. Mateu aawo akavula, amitabi yawo yakalampa, nkaambo kamaanzi manji. 6#Ezk 17:23; Dan 4:12Bayuni boonse bakujulu bakayaka ziteente zyabo mumitabi yawo, akunsi lyamateu aawo banyama boonse baansi mpobakazyalila. Muceenzule cawo moyakakede misyobo mipati yoonse yabantu. 7Wakabotesya mubwiime bwawo amubulamfu bwamitabi yawo, nkaambo miyanda yawo yakanjila mumaanzi manji. 8#Matl 2:9Misamu yakedari yamumuunda wa-Leza teeyakakonzya kuuinda, ayalo misamu yakupresi teeyakeelene amitabi yawo. Misigili yakali cintu buyo kumateu aawo. Taakwe musamu nuuba omwe mumuunda wa-Leza iwakeelene awo mubweebesi bwawo. 9#Kul 9:16; Int 75:6; Dan 4:22-24Ndime ndakaubotya amitabi yawo minji, aboobo misamu yoonse yamu-Edeni iyakali mumuunda wa-Leza yakaufwida munyono.
10 #
2 Mak 25:19; Job 40:11,12; Tus 16:18; Is 14:13-15; Ezk 28:17; Dan 5:20; Jak 4:6 Nkaambo kako mbuboobu mbwaamba Mwami Jehova. Nkaambo kakuti bwiime bwawo bwakalampisya, alimwi wasisya impela yawo amumayoba, alimwi moyo wawo wakalisumpula nkaambo kabulamfu bwawo, 11njoouaba mumaanza aasinguzu wabamasi, nkabela uyoouletela bulumbu bweelede bwabubi bwawo. Ndausowa. 12#Ezk 28:7; 32:5Bazwakule bantu bayoosya babamasi, bayoougonka akuusia. Mitabi yawo iyoowida ansi atala amalundu amumakuti oonse, amateu aawo ayootyokauka mumagombela oonse aanyika. Misyobo yoonse yabantu iyoozwa muceenzule cawo akuusia. 13#Is 18:6Bayuni boonse bakujulu bayookala amatongo aawo, abalo banyama boonse bamusokwe bayooba amateu aawo. 14#Int 82:7; Ezk 32:18Kuyooba obo kuti misamu imwi iili amaanzi italampi mubwiime bwayo nikuba kusisya mitwe yawo mumayoba, amisamu iinywa maanzi iteelani ayo mubwiime, nkaambo yoonse buyo yaabwa munguzu zyalufu azyanyika yakwacimvumwe akati kabana ba-Adamu baselukila mucilindi.
15Mbuboobu mbwaamba Mwami Jehova. Mubuzuba obo nuuselukila mucikalilo cabafu, njoocita kuti muninga wamaanzi ulile. Njoolesya tulonga twawo, amaanzi manji ayoosinkwa. Njoosizya Lebano nkaambo kanguwo, amisamu yoonse yamusokwe iyoopusama. 16#Ezk 26:15; 32:31; Is 14:8,15Lyamvwigwa buyo ijwi lyabuwe bwawo, njookankamya bamasi, nenzoouwaala mucikalilo cabafu antoomwe abaabo baselukila mucilindi. Lino misamu yoonse ya-Edeni, misamu mibotu iiyandika yaku-Lebano, yoonse buyo iinywa maanzi, iyooumuzigwa nkukonya oko kunyika yakwacimvumwe. 17#Malo 4:20Yoonse buyo iyooseluka antoomwe anguwo mucikalilo cabafu, nkobabede bantu ibakajazigwa ipanga. Boonse buyo ibakakede mucenzule cawo akati kabamasi bayoonyonyooka.
18 #
Ezk 32:19; 28:10 Ma! Nguni ngoelene awe mubulemu bwako amubupati bwako? Nguni ngoelene awe akati kamisamu ya-Edeni? Uyooselusigwa munyika yakwacimvumwe antoomwe amisamu yamusokwe. Uyoolala akati kabatapalwidwe bajazigwa ipanga. Mbwabede Farao, amakamu oonse aabantu bakwe, mbwaamba Mwami Jehova.
Currently Selected:
Ezekieli 31: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
