Ezekieli 32
32
Nyimbo azimwi zyakulila Farao
1Lino mumwaka wakumi aibili, mumwezi wakumi aibili, mubuzuba butaanzi bwamumwezi, ijwi lya-Jehova lyakandisikila, liti, 2#Ezk 27:2; 19:3,6; 29:3; 34:18O mwana amuntu, imba lwiimbo lwakulizya Farao mwami wa-Egepita. Umwaambile kuti, Wayeeya kuti, Ndime mulavu akati kabamasi. Anukuti uli mbuli intale yamumaanzi. Ulasotoka mumilonga yako, ulavundaanya maanzi azituta zyako akusofwaazya milonga yabo. 3#Ezk 12:13Mbuboobu mbwaamba Mwami Jehova. Njookuvumbya buzamba bwangu, antoomwe amakamu makamu aabantu, nkabela bayookuzuba mukoombe kangu. 4#1 Sam 17:44-46; Is 14:19; Jer 8:2; Ezk 29:5; 39:4Lino njookuwaala ansi, njookusowela antangalala, njoocita kuti bayuni boonse bakujulu bakale alinduwe, abalo banyama boonse baansi bayookuta kukukulya. 5#Ezk 31:12Njoobika nyama yako atala lyazilundu, amakuti njooazuzya mutunta wako. 6Nyika yoonse akusikila kuzilundu, njooinywisya bulowa bwako, atulonga tuyoozula nduwe. 7#Joel 2:31; Am 8:9; Is 13:10; Mt 24:29; Mk 13:24-25; Lk 21:25; Ciy 6:12-13; 8:12Nenjookuzimya, njoovumba ijulu akusizya inyenyeezi zyalyo, Njoovumba izuba amayoba, awalo mwezi tuukooyoomunika. 8Mimuni yoonse iimweka mujulu, njooisizya amutwe wako, akukubika mumudima munyika yako, mbwaamba Mwami Jehova.
9Njoopenzya myoyo yabantu banji nenjookutola mubuzike akati kabamasi, munyika zimbi nzotezi. 10#Ezk 27:35; 26:16Njoocita kuti misyobo minji yabantu igambe nkaambo kako, abami babo bayookankama kukukubona nenzoovuumya ipanga lyangu kumeso aabo. Bayookankama cakutaleka, nkaambo balayoowa kuswekelwa maumi aabo, mubuzuba bwabuwe bwako. 11#Jer 46:26Nkaambo mbuboobu mbwaamba Mwami Jehova. Ipanga lyamwami wa-Babuloni liyookusikila. 12#Ezk 28:7; 29:19Makamu aabantu bako, njoobawisya boonse kuma panga aabasintaze, bantu bayoosya akati kabamasi. Bayoomanisya kulisumpula kwacisi ca-Egepita akunyonyoona makamu makamu aabantu baco. 13#Ezk 29:11Njoonyonyoona iŋombe zyabo zyoonse zili kumbali lyamaanzi manji. Zituta zyabantu tazikooyooavundaanya limbi, azyalo insumba zyaŋombe tazikooyooavundaanya. 14Aboobo njoonjolomya maanzi aabo, amilonga yabo njoocita kuti ikunke mbuli mafuta, mbwaamba Mwami Jehova. 15#Kul 7:5; Int 9:16; Ezk 6:6,7Lino nenzoosaala nyika ya-Egepita kuti ibe matongo, nenzoosaala nyika azintu zyoonse mulinjiyo, nenzoouma bantu boonse bakede mulinjiyo, bayooziba kuti ndime Jehova.
16 #
2 Sam 1:17; 2 Mak 35:25; Ezk 26:17 Ndoolo lwiimbo lwakulizya. Bana basimbi babamasi bayoolwiimbya. Bayoolwiimbya cakulila cisi ca-Egepita amakamu makamu aabantu baco, mbwaamba Mwami Jehova.
Cilengano caba-Egepita mbubayooselukila mucikalilo cabafu
17Lino mumwaka wakumi aibili, mumwezi mutaanzi, mubuzuba bwakumi amusanu bwamumwezi, ijwi lya-Jehova lyakandisikila, liti, 18#Jer 1:10; Ezk 26:20O mwana amuntu, kolila makamu aabantu bacisi ca-Egepita. Kociselusya, calo abana basimbi babamasi balemu, munyika yakwacimvumwe, antoomwe abaabo baselukila mucilindi: 19#Ezk 31:2; 28:10Sa nkwali naba omwe ngoinda mububotu bwaciwa cako? Seluka, ukalale abatapalwidwe. 20Bayoowa akati kabajayidwe apanga. Makamu makamu aabantu bakwe, boonse buyo bayoolala awe. 21Bapati babasinguzu bayoomwaambila, walo abasikumugwasya, kuzwa mucikalilo cabafu mobabede. Baseluka, balilede, aba batapalwidwe, balijayidwe apanga.
22Asuri nkwali, Uli ambungano yakwe yoonse. Tubanda twabo tulizyungulukide. Boonse buyo balijayidwe. Ipanga ndelyakabawisya. 23Tubanda twabo tulibikidwe kumagolelo aacilindi. Imbungano yabantu bakwe, boonse balizyungulukide kabanda kakwe. Boonse balijayidwe. Ipanga ndelyakabawisya, aba boonse ibakali kuyoosya munyika yabaumi.
24Elamu nkwali. Uli ambungano yakwe yoonse. Balizyungulukide kabanda kakwe, Boonse buyo balijayidwe, Ipanga ndelyakabawisya. Baselukila munyika yakwacimvumwe kabatapalwidwe, aba ibakali kuyoosya munyika yabaumi. Batolelela insoni zyabo antoomwe abaabo baselukila mucilindi. 25Bamuyalila bulo akati kabajayidwe. Makamu makamu aabantu bakwe, tubanda twabo tulimuzyungulukide. Boonse balijayidwe apanga, kabatapalwidwe. Nkaambo mbombabo bakali kuyoosya munyika yabaumi, aboobo batolelela insoni zyabo antoomwe abaabo baselukila mucilindi. Balilazikidwe akati kabajayidwe.
26Meseki a-Tubala nkubali, ankamu zyabo zyoonse. Tubanda twabotulizyungulukide. Boonse balijayidwe apanga, kabatapalwidwe, nkaambo mbombabo bakali kuyoosya munyika yabaumi. 27Tabakoolala abaalumi basintaze bakalekale ibakajayidwe, ibakaselukila mucikalilo cabafu azilwisyo zyabo zyankondo, ibakabikilwa mapanga aabo kumitwe, antobo zyabo zyakabikwa atala azifuwa zyabo. Nkaambo baalumi basintaze bakali kuyoosya munyika yabaumi. 28Ayebo uyootyolwa akulila akati kabatapalwidwe, abaabo bajayidwe apanga.
29Edomu nkwali, abami bakwe abasilutwe bakwe boonse. Bakali basinguzu, nekuboobo abalo balilazikidwe abaabo bajayidwe apanga. Balilede antoomwe abatapalwidwe abaabo baselukila mucilindi.
30Bapati bacisi cakunyika nkobali boonse, aba-Sidoni boonse. Bakali kuyoosya bantu kunguzu zyabo, nekubaboobo abalo baseluka cansoni abajayidwe. Balilede kabatapalwidwe antoomwe abaabo bajayidwe apanga, batolelela insoni zyabo abaabo baselukila mucilindi.
31Farao ababone buyo, uyoolyuumuzya nkaambo kamakamu aabantu bakwe ibakajayidwe apanga, Farao ampi yakwe yoonse, mbwaamba Mwami Jehova. 32Nkaambo wakali kuyoosya bantu munyika yabaumi, aboobo uyoolazikwa akati kabatapalwidwe abaabo bajayidwe apanga, nkokuti Farao amakamu oonse aabantu bakwe, mbwaamba Mwami Jehova.
Currently Selected:
Ezekieli 32: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
