Deuteronomo 17
17
1Tamweelede kutuulila Jehova Leza wanu munyama naba musune nekaba kabelele, uujisi kampenda na cintu cimwi cibi, nkaambo kucita obo ncisesemyo kuli-Jehova Leza wanu.
2Na kwajanwa akati kanu, mumunzi nuuba umwi waminzi Jehova Leza wanu njamupa, mwaalumi nanka mwanakazi uucita bubi mumeso aa-Jehova Leza wanu, uunyonyoona cizuminano cakwe, 3#Kul 22:20; Job 31:26; Jer 7:22iwakali kumanina baleza bambi milimo akubakomba, neliba izuba nuuba mwezi naaba makamu oonse aakujulu, makani ngentana kulailila, 4na mwalwiidwa makani, alimwi mwaamvwa muleelede kubuzisya loko, nkabela na cabonwa kuti makani ngakasimpe, na ncobeni cisesemyo cili boobo cacitika mucisi ca-Israyeli, 5#Lev 24:14; Jos 7:25muleelede kugwisya oyo muntu, naba mwaalumi naba mwanakazi, iwakacita cintu eci cibi, mumulete kumulyango wamunzi. Lino oyo muntu, naba mwaalumi naba mwanakazi, afuswe mabwe, afwe. 6#My 35:30; Dt 19:15; Mt 18:16; 2 Kor 13:1; 1 Tim 5:19; Joh 8:17Kumilomo yabakamboni bobile na botatwe muntu ulakonzya kujayigwa; pele muntu omwe alike takonzyi kuba kamboni wakujazya muntu. 7#1 Kor 5:13Maanza aabakamboni alataanguna kumufusa, lino musule bantu boonse bamufuse, Mbuboobo mbumweelede kunyonyoona bubi akati kanu.
8 #
2 Mak 19:10; Hag 2:11; Mal 2:7; Kul 21:13; My 35:11; Dt 12:5; 19:17; Int 122:5 Na mwajana makani mayumu kwaabeteka, makani aakujaya muziyanza zyaandeene, makani aankazyanyo zyamisyobo misyobo, makani aakuuma muziyanza zyaandeene, na makani amwi aabuka kuminzi yanu, amunyampuke, muye kubusena obo mbwasala Jehova Leza wanu, 9#Jer 18:18; Dt 19:17; Bab 4:5; 1 Bam 3:16; Ezk 44:24muye kubapaizi ba-Levi akumubetesi uubeteka kuciindi eco, mubabuzye, kuti bamupandulwide makani mbwaelede kubetekwa. 10Lino muleelede kucita mbubonya mbubamwaambila kubusena obo mbwasala Jehova. Amucenjele kuti mucite zintu zyoonse nzebamwiiyisya. 11Amucite mbubonya mbuli kulailila kwabo ambuli kukosola kwabo, Mutaleyi munzila njebamulailila, nikuba kululyo nikuba kulumwensi. 12#My 15:30; Ezr 10:8; Hos 4:4; Dt 18:5Kufumbwa muntu uulisumpula kukukaka kuswiilila mupaizi uucita milimo kubusyu bwa-Jehova Leza wanu nanka mubetesi, oyo muntu uleelede kufwa, Mbuboobo mbumweelede kunyonyoona bubi akati kaba-Israyeli. 13Lino bantu boonse bamvwa buyo, balayoowa akutalisumpula limbi.
Mwami wacisi mbwaelede kusalwa
14 #
1 Sam 8:5; 10:19; Hos 13:9 Mwasika buyo kunyika eyo Jehova Leza wanu njamupa, mwaivuba akukala mulinjiyo, na mwaamba kuti, Atulibikile mwami mbubonya mbuli bamasi boonse batuzyungulukide, 15#Jer 30:21mulabika. Pele amubike mwami ngwasala Jehova Leza wanu. Mwami ngumubika asalwe akati kababunyina; mutabiki muzwakule uutali wamusyobo wanu. 16#1 Bam 4:26; 10:28; 2 Mak 1:16; 9:28; Int 20:7; Is 31:1; Kul 13:17; My 14:3,4; Hos 11:5Pele teelede kulivuzizya imbizi, alimwi teelede kupilusya bantu ku-Egepita kuti bavuzye imbizi, nkaambo Jehova wamwaambila kuti, Tamukooyoopiluka limbi nkuko. 17#1 Bam 10:14-22,27; 11:1-8; 2 Mak 1:15; 9:27Alimwi teelede kulivuzizya banakazi, kuti moyo wakwe utaleyi munzila. Ayalo insiliva angolida, teelede kulivuzizya nzizyo.
18 #
2 Bam 11:12; Dt 31:9; 2 Bam 22:8 Lino naayookazikwa acuuno cabwami bwakwe, uleelede kulilembela ibbuku lyamilao eyi lili mbuli elyo lili mumaanza aabapaizi ba-Levi. 19#Jos 1:8; Int 119:97Lileelede kubambwa kulinguwe, abale majwi aalyo mazuba oonse aabuumi bwakwe, kuti aiye kulemeka Jehova Leza wakwe kukubamba majwi oonse aayooyu mulao, ambeta ezi, azicite; 20#Dt 5:32; 1 Bam 15:5kuti moyo wakwe utalisumpuli kwiinda babunyina, ataleyi kuzwa kumalailile nikuba kulumwensi nikuba kuluyo, kuti aongole mubwami bwakwe, walo abana bakwe, akati kabana ba-Israyeli.
Currently Selected:
Deuteronomo 17: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
