Deuteronomo 18

Zyaabilo zyeelede bapaizi aba-Levi

1 # My 18:8,9; 1 Kor 9:13 Bapaizi ba-Levi, nkokuti musyobo woonse wa-Levi, tabakooyooba acaabilo neluba lukono akati kaba-Israyeli, Zipaizyo zitentelwa Jehova azyeelelo zyakwe zimwi ziyooba zilyo zyabo. 2#My 18:20Tabakooyooba alukono akati kababunyina pe; Jehova ndolukono lwabo mbubonya mbwaakabaambila. 3#Lev 7:30Lino nceeci caabilo ceelede bapaizi, cizwa kubantu, nkokuti bantu boonse batuula cipaizyo, naba musune niiba imbelele, Bapaizi bapegwe mweendo wacamba, amaseya obile, afu. 4#Kul 22:29; My 18:12Akalo kabalwebalwe kamaila aanu akamasaansa aanu akamafuta aanu, akabalwebalwe kaboya bwakugelwa kwambelele zyanu, zyoonse nzizyabo. 5#Dt 10:8Nkaambo mbembabo Jehova Leza wanu mbaakasala akati kamisyobo yanu yoonse, kuti bacite milimo yabupaizi muzina lya-Jehova, balo abana babo mazuba oonse.

6 # My 35:2,3 Na mu-Levi walonga kuzwa muminzi yanu yamucisi ca-Israyeli, kufumbwa nkwakalakala, nkaambo moyo wakwe ulisukeme kuya kubusena mbwasala Jehova, 7acite milimo yabupaizi muzina lya-Jehova Leza wakwe mbubonya mbuli ba-Levinyina boonse bacita milimo yabupaizi kubusyu bwa-Jehova. 8#2 Mak 31:4; Neh 12:44Babe azyaabilo zyeelene zyakulya, kutaamba ezyo nzyaakaulisya.

Ziyanza zyabamasi zitondwa

9 # Lev 18:26; Dt 12:29 Mwasika buyo kunyika eyo Jehova Leza wanu njamupa, mutaiyi kucita zisesemyo zyabamasi bakooko. 10#Lev 19:26; Kul 22:18Kutajanwi akati kanu muntu uutenta mwanaakwe mulombe na musimbi mumulilo, nanka muntu uusonda, naba munanga, naba mulozi, naba mucape, 11#Lev 19:31naba simabibo, naba sibusangu, naba sibamooba, naba muntu uubuzya makani kubafu. 12#Lev 18:24Nkaambo kufumbwa muntu uucita ezi ncisesemyo kuli-Jehova, Nkaambo kazisesemyo ezi Jehova ncabatandila kubusyu bwanu. 13#Mt 5:48; Matl 17:1Amululame kumeso aa-Jehova Leza wanu. 14#2 Bam 21:6Nkaambo misyobo eyi njemuti tande balabika myoyo yabo kubananga akubasondi, pele nywebo, Jehova Leza wanu tamuzumizyi kucita obo.

Cisyomezyo camusinsimi uuboola

15 # Inc 3:22; 7:37; My 24:17; Is 11:1; 61:1; Mt 11:3; 21:11; Lk 2:25-34; 4:16-22; Lk 7:16; 24:19; Joh 4:19-26; 6:14; 7:40 Jehova Leza wanu ulamubusizya musinsimi, akati kabanabakwanu, uuli mbuli ndime. Amuswiilile nguwe. 16Mbubonya mbumwakakumbila kuli-Jehova Leza wanu ku-Horebu kubuzuba bwambungano, cakuti, Tutamvwi limbi ijwi lya-Jehova Leza wesu, nekuba kubona limbi oyu mulilo mupati, kuti tutafwi. 17Jehova wakandaambila kuti, Baamba kabotu. 18#Joh 1:45; Is 51:16; Joh 17:8; 4:25; 8:28; 12:49,50Njoobabusizya musinsimi, akati kababunyina uuli mbuli nduwe, Elyo njoobika majwi aangu mumulomo wakwe, nkabela uyoobaambila makani oonse ngendamulailila. 19#Inc 3:23Lino kufumbwa muntu uutaswiilili majwi aangu ngaamba muzina lyangu, mebo njoomupa mulandu. 20#Dt 13:5; Jer 14:14; Zek 13:3; Jer 2:8Pele musinsimi uulisumpula kukwaamba makani muzina lyangu ngentana kumulailila, ayooyo uuamba muzina lya-Leza umbi, oyo musinsimi ulafwa. 21Na mwaamba mumyoyo yanu kuti, Tuzibe byeni makani Jehova ngaatakaamba? 22#Jer 28:9Amubone! Na musinsimi waamba muzina lya-Jehova, pele makani taazuzikizigwi, taaboneki, nkokuti teensi makani ngaakaamba Jehova. Oyu musinsimi waamba cakulisumpula buyo; mutamuyoowi pe.

Currently Selected:

Deuteronomo 18: Ibbaib63

Highlight

Copy