Incito 25

Mbwaakabetekwa kuli-Festo, ambwaakalisisya kuli-Kaisara

1Festo naakanjila mubwami bwakwe, munsi lyamazuba otatwe wakazwa mu-Kaisareya, wakaya ku-Jerusalemu. 2Ndilyonya bapaizi basimu twe abapati baba-Juda bakabejelezya Paulo kulinguwe, bamukombelezya, 3bakumbila cintu anguwe, cakuti amwiite aboole ku-Jerusalemu. Bakakanza kumulindilila kuti bamujaye munzila. 4Festo wakavuwa kuti, Paulo ulijiswi ku-Kaisareya, akuti, Amebo ndemwini ndaya nkuko kaba kaindi. 5Wakati, Aboobo abali abwami akati kanu katuya abalo, anooli kuli mulandu kumuntu ulya, bakamubike kaambo.

6Naakakala abo mazuba aatakali kwiinda musanu mwaatatu naaba ikumi, wakainka ku-Kaisareya. Mpoonya nobwakaca wakakala acuuno cakubetekela, walailila kuleta Paulo. 7Naakasika walo, ba-Juda bakazwa ku-Jerusalemu, bakamwiiminina mumbali, bamubika milandu minjiminji milemu njobatakonzya kusinizya, 8Anu Paulo kukulyaambilila wakati, Nsikabisizye cintu, nuuba mulao waba-Juda, nemuba muntempele, naba Kaisara. 9Pele Festo mbwaakayanda kulumbwa ba-Juda, wakavuwa Paulo wakati, Sena ulayanda kwiinka ku-Jerusalemu, ukabetekelwe nkuko kumbele lyangu emilandu eyi? 10Paulo wakati, Ndiliimvwi kumbele lyacibetekelo ca-Kaisara, kuleelede kuti ndibetekwe mpoonya. Nsibisizye cintu kuba-Juda, oku ulizi kabotu ayebo. 11Anooli ndakabisya akucita cintu iceelede kufwa, nsikaki kufwa pe. Kwalo na taawo makani aya ngobandibika kaambo, taakwe muntu uukonzya kundyaaba kulimbabo. Ndalisisya kuli-Kaisara. 12Ndilyonya Festo, naakaambaula abasilubeta, wakavuwa kuti, Walisisya kuli-Kaisara, ndazumina ulainka kuli-Kaisara.

Mbwaakalyaambilila kuli-Agripa a-Bemike a-Festo

13Nokwakainda mazuba amwi, Mwami Agripa a-Bemike, bakasika kuKaisareya, bazooanzya Festo. 14Eno mbobakakala oko mazuba manji, Festo wakaambila mwami makani aa-Paulo wakati, Nkwali muntu ngwaakasia Felike ulaangidwe. 15Nendakali ku-Jerusalemu, bapaizi basimutwe abapati baba-Juda bakamubika kaambo, bakakumbila kuti apegwe mulandu. 16Ndakabavuwa kuti, Tacili ciyanza caba-Roma kwaaba muntu uubikwa kaambo, katana kulangana abaabo abamubika kaambo, akujana ciindi cakulyaambilila mulandu ngobamupede. 17Aboobo nobakabungana okuno nsikamukide, pele nobwakaca ndakakala acibetekelo, ndalailila kuti bamulete oyo mwaalumi. 18Eno nobakanyamuka abo abamubika kaambo tabakaambide mulandu wazibi mbuli nzendakali kweezeezya. 19Pele bakamwaamba emibuzyo imwi yenkombelo yabo beni, eyamuntu uutegwa Jesu, mufu ngwasinizya Paulo kuti muumi. 20Eno mebo, mbwendakazingwa kubuzisya makani aali boobo, ndakabuzya na ulayanda kuya ku-Jerusalemu kuyoobetekelwa nkuko makani aya, 21Pele Paulo naakakumbila kuti asisigwe kulubeta lwamwami mupati, ndakalailila kuti alindilwe, mane nkamutumine kuli-Kaisara, 22Agripa wakati kuli-Festo, Amebo ndayanda kumumvwa oyo muntu. Wateeti, Ijunza mulamumvwa.

23Nobwakaca Agripa a-Bemike bakasika abulemu bupati, bakanjila omo muswiilililwa, antoomwe abasilumamba bapati abaalu bamumunzi, nkabela Festo wakalailila kuti bakamulete Paulo. 24Mpoonya Festo wakateeti, O mwami Agripa, anywebo nyoonse nobaalumi nomuli aswebo ano, mwamubona oyu muntu ngwendakakumbilwa boonse ba-Juda, aku-Jerusalemu akookuno, bakoompolola bakati, Teelede kuti kacipona, 25Pele mebo ndakajana kuti taakwe ncaakacita iceelede lufu, alimwi mwini mbwaakalisisya kumwami mupati ndakakanza kumutuma, 26Eno nsijisi ijwi ilisinizizye lyakulembela mwami aanguwe. Ncendamuletela kumbele lyanu, akapati kumbele lyako O mwami Agripa, kuti mwamubuzisisya ndijane cakulemba. 27Nkaambo ndati mbufubafuba kutuma mwaange, kotalungulwide milandu niabikilwa.

Currently Selected:

Incito 25: Ibbaib63

Highlight

Copy