Incito 24

Mbwaakalyaambilila kuli-Felike

1Munsi lyamazuba osanwe, kwakasika mupaizi simutwe Hananiya, antoomwe abapati, aumwi uutegwa Tertulo, sikusumpilila. Elyo bakaamba mulandu wa-Paulo kumweendelezi. 2Naakaitwa Tertulo wakasaanguna kumubika kaambo wati, O mwami mulemu Felike, mulinduwe tukede muluumuno, alimwi nkaambo kaluzibo lwako cisi cino ciya bululamikwa, 3munzila zyoonse amumasena oonse tulatambula akulumbisya. 4Pele, kuti intakukataazyi, ndakukumbila kuti muluzyalo lwako undiswiilile kumajwi maniini. 5Nkaambo oyu muntu twakamujana kuti ngusiŋunzuunzu, unyonyonganya ba-Juda munyika yoonse, ngosimutwe wenkamu yabaNazareta, 6alimwi wakasoleka kusampaula ntempele. Twakamujata, twakayanda kumubeteka amulao wesu, 7pele Lusiya musolozi mupati wakamugwisya mumaanza esu enguzu mpati, 8wakaambila abo abakamubika kaambo kuti baboole kulinduwe. Kukumubuzisya ulakonzya yebo kuziziba ezi zintu zyoonse nzotumubika kaambo. 9Abalo ba-Juda bakamuvumpa basinizya bati, Mbwaabede aya.

Paulo mbwaakalyaambilila

10Nkabela mweendelezi naakamoobola kuti aambe, Paulo wakavuwa wakati:

Oku ndilizi kuti kwaba myaaka minjiminji yebo koli mubetesi wacisi cino, aboobo ndilalyaambilila akubotelwa, 11Ulakonzya kuziba kuti aba buyo mazuba aali kumi mwaabili nkenyinkide kuyookomba ku-Jerusalemu. 12Tabanandijene nemuba muntempele ndilazumanana amuntu, nekuba kupyopyonganya bantu muzikombelo na mumunzi. 13Alimwi tabakonzyi kusinizya azintu ezi nzobandibika kaambo eno, 14Pele ndazumina oku kulinduwe kuti kunzila eyo njobaamba kuti ilaandeene, ndilamukomba mbubonya obo Leza wamatata, ndilasyoma oonse aakalembwa kumulao akubasinsimi. 15Ndijisi lusyomo kuli-Leza, abalo beni mbobasyoma, kuti kulaba kubuka kwabafu, akwabaluleme akwabataluleme. 16Nkaako ndilasoleka kuti lyoonse ndibe amoyo uutajisi mulandu, kuli-Leza akubantu, 17Eno munsi lyamyaaka minjiminji ndakasika kuleta zipego zyaluzyalo ezituuzyo kucisi cakwesu, 18nzobakandijanina muntempele ndasalazigwa, nkentajisi makamu aabantu na lupyopyongano. Pele kwakaliko ba-Juda bamwi bakuAsiya, 19abakeelede kuti kabaliwo kumbele lyako, akundibika kaambo anooli bajisi makani kulindime. 20Na aba abaliwo kabaamba mulandu ngobakajana nendakaimvwi alubeta, 21cita uwaleeli ijwi lyomwe ndendakoompolola nendakaimvwi akati kabo, ilyakuti, Ukubuka kulufu nkwembetekelwa sunu kulindinywe.

22Kwalo Felike mbwaakali kuzi kabotu Nzila eyo, wakababikilila wakati, Asika Lusiya musolozi mupati, ndizookosola makani aanu, 23Elyo wakalailila musunguli kuti Paulo alindilwe, pele ajatwe kabotu, alimwi kuti kutakasigwi beenzinyina kuzoomugwasya,

Felike a-Drusila mbobakamuswiilila

24Munsi lyamazuba amwi wakaboola Felike a-Drusila mukaintu wakwe, mu-Juda, Wakatumina Paulo, wakamumvwa aalusyomo lwa-Kristo. 25Naakacili kwaamba aabululami, akulijata, alubeteko uluza, Felike wakazyangama, wavuwa wati, Koya eno ndajana ciindi ndilakwiita. 26Kumwi wakali kulangila kuti ambweni ulapegwa mali kuli-Paulo kuti amwaangulule, ncaakamutumina lyoonse akwaambaula awalo. 27Pele nokwakainda myaaka yobile, Porkiyo Festo wakalya zina lya-Felike. Eno mbwaakali kuyanda kulumbwa ba-Juda, Felike wakamusia Paulo ulaangidwe.

Currently Selected:

Incito 24: Ibbaib63

Highlight

Copy