Incito 23

1Walo Paulo wakabalangisisya basilubeta wakati, Nobakwesu, ndakeenda amoyo mubotu kumbele lya-Leza mane kusikila buzuba buno. 2Mpoonya Hananiya, mupaizi mupati, wakalailila mbaakaimvwi abo kuti bamuume kumulomo, 3Elyo Paulo wakati kulinguwe, Leza ulakuuma yebo obwaanda butubye, Sena ulakala kundibeteka camulao, kumwi ulailila kuti ndyuumwe icitali camulao? 4Abakaimvwi mpawo batateeti, Sena utukila mupaizi mupati wa-Leza? 5Paulo wakaamba kuti, Nsendali kuzi, bakwesu, kuti ngomupaizi mupati, nkaambo kwakalembwa kuti, Utaambi bubi amweendelezi wacisi cakwanu. 6Pele Paulo naakabona kuti bamwi mba-Saduki abamwi mba-Farisi, wakoompolola mulubeta wakati, Nobakwesu, ndili mu-Farisi mebo, mwana aba-Farisi, ndabetekwa nkaambo kakusyoma bubuke bwabafu. 7Naakaamba obo, kwakaba kukazyanya akati kabaFarisi aba-Saduki, embungano yakaandaana, 8nkaambo ba-Saduki bati, Takukwe kubuka kulufu, nobaba baangelo, nuuba muuya, kwala ba-Farisi bazumina oonse aya. 9Ndilyonya kwakaba kuyoba kupati, bamwi balembi bakuba-Farisi bakanyamuka, bakazya bati, Tatujene bubi kumuntu oyu. Anooli muuya uwaamba kulinguwe, na angelo, makaninzi? 10Elyo nokwakaba kuzwangana kupati, musolozi oyo mupati, mbwaakayoowa kuti Paulo balamukwamuna, wakalailila basilumamba kuti bainke bakamugwisye cenguzu kulimbabo, akumutola mukati.

11Eno nokwakaba masiku Mwami wakamwiiminina wakati, Kojatisya, mbuli mbokandilungulula mu-Jerusalemu, mbubonya obo uyoondilungulula aku-Roma.

Ba-Juda mbobati kamufumpe

12Nobwakaca ba-Juda bakabungana, balyaanga akukonka kuti tabakoolya akunywa kabatana kumujaya Paulo. 13Abo abakalyaanga obo bakainda kumakumi one. 14Nkabela bakainka kubapaizi basimutwe akubapati bakati, Twalyaanga akukonka kuti tatukooyoolabila cintu, katutana kumujaya Paulo. 15Nkaako eno nywebo, antoomwe abasilubeta, mukumbile musolozi mupati kuti akamulete kulindinywe, kubaanke kuli ncomuyanda kumubuzisya kabotu, aswebo katanaswena afwaafwi tunoolibambilide kumujaya. 16Pele mwana amucizi wa-Paulo wakabamvwa akumulindila kwabo, wakainka wanjila omo mwaakabede, waambila Paulo, 17Ndilyonya Paulo wakaita umwi wabasunguli wakati, Tola mulombe oyu kumusolozi mupati, nkaambo ujisi makani aakumwaambila. 18Elyo wakamubweza, wamutola kumusolozi mupati wati, Paulo mwaange wandiita, wakumbila kuti ndilete mulombe oyu kulinduwe, ujisi makani aakukwaambila. 19Mpoonya musolozi mupati wakamujata ejanza, wamutola, wamubuzya kumbali kuti, Ino makaninzi ngojisi kundyaambila? 20Walo wakateeti, Ba-Juda bakazuminana kukumbila kulinduwe kuti ijunza umutole Paulo kulubeta, mbuli kuti bali ncobayanda kumubuzisya kabotu, 21Pele utabazuminini yebo, nkaambo kulimbabo kuli baalumi abainda makumi one, abamulindilide, abakalyaanga akukonka kuti tabakoolya akunywa, kabatana kumujaya. Aneeno balilibambilide, balalangila cisyomezyo cako. 22Nkabela musolozi mupati wakaleka mulombe oyo, wamulailila kuti, Utaambili muntu kuti wandizibya makani aya, 23Mpoonya awo wakaita basunguli bobile wakati, Amululamike basilumamba abali myaanda yobile, abasimbizi abali makumi aali musanu mwaabili, abasimasumo abali myaanda yobile, kuti bainke kuKaisareya kuciindi caciizizyo, 24mubape embelesa, kuti bamutantike Paulo, bakamusisye kabotu kuli-Felike mweendelezi. 25Nkabela wakalemba lugwalo lwakuti,

26Klaudiyo Lusiya nguulembela Felike, mweendelezi mulemu. Ndakwaanzya. 27Oyu mwaalumi wakajatwa ba-Juda. Bati kamujaye, pele ndakasika abasilumamba ndamuvuna, nendakamvwa kuti mu-Roma. 28Mbwendakali kuyanda kuziba kaambo nkobamubika, ndakamutola kulubeta lwabo. 29Oko ndakajana wabikwa kaambo kamibuzyo yamulao wabo, pele tajisi mulandu uuelede kufwa na kwaangwa. 30Nendakamvwa kuti bavwiyana kufumpa oyu muntu, ndilyonya ndamutumina kulinduwe, ndalailila abo abamubika kaambo kuzooamba mulandu wakwe kulinduwe. Kosyaala kabotu.

Basilumamba mbobakasisya Paulo ku-Kaisareya

31Aboobo basilumamba, mbuli mbobakalaililwa, bakamubweza Paulo bamutola masiku ku-Antipatri, 32Nobwakaca balo bakabweeda kumunzi, basia basimbizi kuti bainke awe.

33Nobakasika ku-Kaisareya bakamupa lugwalo mweendelezi, baimika Paulo kubusyu bwakwe. 34Mweendelezi naakabala lugwalo wakabuzya kuti, Ino ngwecisinzi? Naakamvwa kuti ngwaku-Kilikiya, 35wakati, Ndiyoomvwa kabotu makani aako, basika abakubika kaambo. Nkabela wakalailila kuti alindilwe muŋanda yabwami ya-Heroda.

Currently Selected:

Incito 23: Ibbaib63

Highlight

Copy