Incito 26

1Agripa wakaambila Paulo kuti, Nkooko wazumininwa kulyaambilila. Ndilyonya Paulo wakatambika janza lyakwe, walyaambilila wati:

2O mwami Agripa, ndati ndi sicoolwe kuti ndalyaambilila sunu kumbele lyako, atwaambo toonse ntobandibika ba-Juda, 3akapati nkaambo wazibisya ziyanza emibuzyo yoonse iili mukati lyaba-Juda. Nkaako ndakumbila kuti undiswiilile kabotu, 4Ba-Juda boonse bakali kuzi kweenda kwangu kuzwida kubwana bwangu, mbokwaakabede kuzwa kumatalikilo mukati kacisi cakwesu amu-Jerusalemu, 5bakandiziba kuzwa kumatalikilo, na bayanda kulungulula, kuti ndakali mu-Farisi wamunkamu eyo yenkombelo yesu iijatisya. 6Aneeno ndaima kubetekwa nkaambo kakulangila cisyomezyo Leza ncaakasyomezya matateesu. 7Ncenciceeco nciilangila mikowa yesu iili kumi mwiibili, nobakomba Leza masiku esikati amoyo omwe, Nkaambo kakulangila obo neembikilwa kaambo kuba-Juda, O mwami. 8Nkaambonzi, mukuyeeya kwanu, ncokutasyomeki kuti Leza ulababusya bafu? 9Amebo ncobeni ndakayeeya kuti ndakeelede kucita zinjizinji izilwanya zina lya-Jesu wa-Nazareta, 10Mbubonya mbwendakali kucita mu-Jerusalemu, abasalala banjibanji ndakabanjizya muntolongo, mbwendakapedwe nguzu kubapaizi bapati, anobakali kujayigwa amebo ndakazumina. 11Ndakali kubapenzya lyoonse muzikombelo zyoonse, ndabasungilizya kuti batukile Leza, ambwendakali kubakalalilisya ndakabatanda mane muminzi yamasi. 12Eno nendakali kuya ku-Damasko kumulimo uyo, nkenjisi bwami abutume bwabapaizi bapati, 13elyo amutwe esikati, O mwami, munzila ndakabona mumuni uuzwa kujulu uuinda kumweka kwezuba, wakamweka cakundizinguluka mebo abaabo mbotwakali kweenda abo. 14Notwakawida ansi toonse, ndakamvwa ijwi ilyaamba kulindime mumwaambo waci-Hebrayo lyati, Saulo, Saulo, undipenzezyanzi? Nciyumu kulinduwe kusansa cibinzyo. 15Ndakabuzya kuti, Ino nduweni O mwami? Mwami wakati, Ndime Jesu ngopenzya. 16Pele buka, uime amatende aako, nkaambo ndalibonya kulinduwe, kuti ndikubike ube similimo asikulungulula wazeezi zintu moondibwenene, azeezyo nzenjoolibonya azyo kulinduwe. 17Ndinookuvuna kubaJuda akulibamasi, mbenkutumina, 18kuti ukajule meso aabo, basanduke kuzwa mukusia, baye mukusalala, akuzwa mubwami bwa-Saatani kuya kuli-Leza, kuti bajane kujatilwa kwazibi alukono akati kabaabo abasalazigwa kukusyoma ndime. 19Aboobo, O mwami Agripa, nsikwe nendakakazya cilengano cakujulu, 20pele kusaanguna mu-Damasko, aku-Jerusalemu, amucisi coonse ca-Judaya, akulibamasi ndakali kukambauka kuti beempe basandukile kuli-Leza, bacite milimo iielede kusanduka. 21Ncenciceeco ncobakandijatila ba-Juda muntempele, bati kandijaye. 22Pele mbwendakajana kugwasigwa kuzwa kuli-Leza, ndiciimvwi asunu, ndilalungulula kubaniini akubapati, kutaamba limbi ijwi pele ayo ngobakaamba basinsimi a-Musa kuti alacitika, 23kuti Kristo uleelede kupenga, akuti nguuelede kusaanguna kubuka kubafu, aambile ba-Juda abamasi makani aamumuni.

24Naakacili kulyaambilila obo, Festo wakaamba ejwi pati kuti, Paulo, wasondoka, ukuliiya kwako kupati kulakusondosya, 25Pele Paulo wakati, Festo omulemu, nsisondokede, pele ndaamba majwi aakasimpe akuziba, 26Mwami Agripa ulyeezi aya ngemwaambila ecamba. Ndasyoma kuti kumakani aya oonse taakwe ngaatabwene, nkaambo eci tacikacitidwe kumbali pe, 27O mwami Agripa, sena ulabasyoma basinsimi? Ndilizi kuti ulasyoma. 28Agripa wakati kuli-Paulo, Kukucikombelezya kuniini ulandisandula kuba mu-Kristo, 29Paulo wakati, Na nkuniini na nkupati, ndilakomba kuli-Leza kuti, kutabi nduwe olike pele boonse abandiswiilide sunu, babe mbuli ndime kutaamba nketani ezi.

30Ndilyonya kwakanyamuka mwami, amweendelezi, a-Bemike, abaabo mbobakakede abo, 31nobakazwa balike, bakabandisyanya bati, Oyu muntu tacitide cintu iceelede lufu nekuba kwaangwa. 32Nkabela Agripa wakaambila Festo kuti, Oyu muntu kuti naatakalisisya kuli-Kaisara, naangununwa.

Currently Selected:

Incito 26: Ibbaib63

Highlight

Copy