2 Samuele 5
5
Davida mbwaakapegwa bwami bwamikowa yoonse ya-Israyeli
1 #
1 Mak 12:23; Matl 29:14 Elyo mikowa yoonse yaba-Israyeli yakasika kuli-Davida ku-Hebroni, yakati, Langa! Tuli zifuwa zyako anyama yako. 2#1 Sam 18:13; 16:1; 2 Sam 7:7; Int 78:71Alimwi kuciindi eco Saulo ncakacili mwami, nduwe owakali kusololela ba-Israyeli akubaboozya, nkabela Jehova wakakwaambila kuti, Uleelede kweembela bantu bangu ba-Israyeli, uleelede kuba simalelaabo ba-Israyeli. 3#1 Mak 11:3; 2 Bam 11:17; Bab 11:11; 1 Sam 23:18Lino boonse bapati baba-Israyeli bakasika kumwami ku-Hebroni, nkabela mwami Davida wakatangana abo cizuminano nkukonya oko ku-Hebroni kubusyu bwa-Jehova, aboobo bakananika Davida kuti abe mwami wa-Israyeli.
4 #
1 Bam 2:11; 1 Mak 3:4; 29:27; 26:31 Davida wakali amyaaka iili makumi otatwe naakapegwa bwami, nkabela kali mwami myaaka iili makumi one. 5Mumunzi wa-Hebroni wakali abwami bwamusyobo wa-Juda myaaka iili musanu aibili amyezi iili musanu aumwi, alimwi mu-Jerusalemu wakali abwami bwaba-Juda abwaba-Israyeli boonse myaaka iili makumi otatwe amyaaka yotatwe.
Davida mbwaakazunda Jerusalemu
6 #
Jos 15:63; Bab 1:21; 19:11 Lino mwami abantu bakwe bakaya ku-Jerusalemu kuyoolwana abaJebusi ibakali acisi. Mpawo bakaambila Davida kuti, Tokonzyi kunjila omuno pe, Ncobeni boofu abalema bazookonzya kukutanda. Nkaambo bakali kuyeeya kuti Davida takonzyi kunjila omuno. 7Nekubaboobo Davida wakazunda mampangala aa-Ziyoni, ngaonya ngumunzi wa-Davida. 8#1 Mak 11:6Nkabela obo buzuba Davida wakati, Kufumbwa muntu uuma ba-Jebusi, asowele mumulinga abo balema aboofu mbasula Davida mumoyo wakwe. Nkaambo bakaamba bati, Boofu abalema mpobali. Davida takonzyi kunjila muŋanda. 9#Bab 9:6,20; 1 Bam 9:24; 11:27; 2 Mak 32:5Elyo Davida wakaakukala mumonya mumampangala, nkabela wakaamba kuti ngumunzi wa-Davida. Lino Davida wakayaka koonse koonse kuzwa ku-Milo kusikila mukati. 10Nkabela Davida wakali kuya bukomena lyoonse, alimwi Jehova Leza wamakamu makamu wakali awe.
11 #
1 Bam 5:2; 1 Mak 14:1 Mpawo Hiramu mwami wa-Turo wakatuma batumwa kuli-Davida, amisamu yakedari ababezi abasikuyasyamabwe, nkabela bakayakila Davida iŋanda. 12#1 Bam 10:9; 2 Mak 2:11; Es 4:14; Is 45:4Lino Davida wakazibisya kuti Jehova ulimwiimikide nji mbuli mwami waba-Israyeli, alimwi kuti wasumpula bwami bwakwe nkaambo kabantu bakwe ba-Israyeli.
13 #
Matl 25:5,6; Dt 17:17 Elyo Davida wakalibwezela abamwi basimamambe abanakazi kuJerusalemu naakamana kuzwa ku-Hebroni, nkabela wakazyala abamwi bana balombe abasimbi. 14Ngaaya mazina aabana mbaakazyala mu-Jerusalemu: Samua, a-Sobabu, a-Natana, a-Solomoni, 15a-Ibara, a-Elisua, a-Nefegi, a-Jafiya, 16a-Elisama, a-Eliada, a-Elifeleti.
Davida mbwaakalwana aba-Filisti
17 #
1 Mak 11:16; 2 Sam 23:14 Lino ba-Filisti nibakamvwa kuti bananika Davida mbuli mwami wabaIsrayeli, ba-Filisti boonse bakainka kuyoomuyandaula Davida, nkabela Davida naakamvwa obo wakaseluka kuya kumampangala. 18#Jos 15:8; Is 17:5Lino baFilisti bakasika kuzoolimwaisya mumumpata wa-Refaimu. 19#My 27:21; Jos 9:14; 1 Sam 23:2,4; 2 Sam 2:1Mpawo Davida wakabuzya kuli-Jehova kuti, Sa nje kuyoolwana aba-Filisti? Sa uyoobaaba mumaanza aangu? Nkabela Jehova wakaambila Davida kuti, Ee, koya, nkaambo ncobeni ndaaba ba-Filisti mumaanza aako. 20#Is 28:21Elyo Davida wakasika ku-Baalaperazimu, wakabakoma nkukonya oko, nkabela wakati, Jehova wasotokela basinkondoma kumeso aangu mbubonya mbwasotoka maanzi. Nciceeco oko kuntu ncikwakaulikwa izina lya-Baalaperazimu. 21Nkabela zikozyano zyabo bakazisia nkukonya oko, elyo Davida abantu bakwe bakeza kuzoozitola.
22Lino ba-Filisti bakaboola lwabili kuzoolimwaisya mumumpata waRefaimu. 23Mpawo Davida naakabuzya kuli-Jehova, wakaambilwa kuti, Utainki kuyoolwana pe, Kosaanguna kuzyunguluka musule lyabo akusika nkubabede kufwaafwi kumakunka. 24Lino wamvwa buyo musoso wakweenda kumpela amakunka, ndilyonya noelede kunyamuka, nkaambo kuciindi eco Jehova waya kunembo lyako kuyookoma basinkondo baba-Filisti. 25Elyo Davida wakacita mbubonya obo mbwaakamulailila Jehova, nkabela wakabazunda ba-Filisti kuzwa ku-Geba akusikila ku-Gezeri.
Currently Selected:
2 Samuele 5: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
