2 Bami 23

Josiya mbwaakaboozya bantu munzila ya-Leza

1 # 2 Mak 34:29,30 Mpawo mwami wakatumina bapati boonse ba-Juda aba-Jerusalemu, nkabela bakabungana kulinguwe. 2#2 Bam 22:8Alakwe mwami wakasika kuŋanda ya-Jehova, abantu boonse ba-Juda aboonse ibakakede mu-Jerusalemu bakeza awe, abapaizi abasinsimi, abantu boonse nibaba baniini nibaba bapati. Elyo kwakabalwa mumatwi aabo majwi oonse aabbuku lyacizuminano ilyakajanwa muŋanda ya-Jehova. 3#2 Bam 11:14; Jer 4:2Nkabela mwami wakaima kucilende, watanga cizuminano kubusyu bwa-Jehova cakutobela Jehova acakubamba milumbe yakwe amilao yakwe ambeta zyakwe camoyo woonse acamiyeeyo yoonse, akuzuzya majwi aacizuminano eci cilembedwe mubbuku eli. Abalo bantu boonse bakazumina cizuminano.

4 # 2 Bam 21:3,7 Lino mwami wakalailila Hilikiya mupaizi mupati abapaizi babili abasikulanga mulyango kuti bagwisye muntempele ya-Jehova zibelesyo zyoonse izyakacitilwa Baala a-Asera amakamu oonse aakujulu, nkabela wakazitenta anze a-Jerusalemu kumyuunda ya-Kidroni, atwe lyazyo wakazitola ku-Beteli. 5#Hos 10:5; Zef 1:4; 2 Bam 21:3Abalo bapaizi bamituni wakabagwisya, bami ba-Juda mbibakabikide kuti batente tununkilizyo kuzipaililo zyakuzilundu muminzi ya-Juda amumasena aaengelede aa-Jerusalemu, abaabo ibakali kutenta tununkilizyo twakukomba Baala azuba amwezi anyenyeezi amakamu oonse aakujulu. 6#2 Mak 34:4Acikozyano ca-Asera cakali muŋanda ya-Jehova wakacitola anze lya-Jerusalemu kukalonga ka-Kidroni, wacitenta nkukonya oko kukalonga ka-Kidroni, wacipwayaula mane kwasyaala lusuko buyo, elyo lusuko lwaco wakalusowa kutubanda twabantu. 7#1 Bam 14:24; 15:12; Ezk 16:16Alimwi wakamwaya maanda aabaalumi basibwaamu aakali muŋanda ya-Jehova, banakazi mobakali kupesela Asera masani. 8#1 Bam 15:22Nkabela wakagwisya bapaizi boonse muminzi ya-Juda, akusofwaazya zipaililo zyakuzilundu bapaizi nkubakali kutenta tununkilizyo, kuzwa ku-Geba akusikila ku-Bceriseba. Alimwi wakamwaya zipaililo zyakumilyango izyakali kumanjililo aa-Joshua mulangi wamunzi kujanza lyalumwensi kumulyango wamunzi. 9#Ezk 44:10; Mal 2:8; 1 Sam 2:36Nekubaboobo bapaizi bazipaililo zyakuzilundu teebakeza kucipaililo ca-Jehova mu-Jerusalemu; bakali kulya zinkwa zitakwe bumena akati kababunyina. 10#Is 30:33; Jer 19:6; Jos 15:8; Lev 18:21; Ezk 23:37Alimwi wakasofwaazya Tofeti mumumpata wamwana wa-Hinomo, kuti kutabi muntu uutenta mwanaakwe mumulilo kukupaizya Moleki. 11#Dt 4:19; 2 Mak 14:5; Job 31:26; Ezk 8:16Aalo mabbiza bami ba-Juda ngebakapede izuba kumanjililo aaŋanda ya-Jehova wakaagwisya, kumbali lyakaanda ka-Natanimeleki muzibe kali mukati. Azyalo inkalaki zyazuba wakazitenta mumulilo. 12#Jer 19:13; Zef 1:5; 2 Bam 21:5; 2 Mak 33:3,15Azipaililo zyaatala lyaŋanda yakujulu ya-Ahazi, bami ba-Juda nzibakayakide, azipaililo Manase nzyaakayakide mumbanza zyobile zyaŋanda yaJehova, zyoonse buyo mwami wakazityolaula akusowa lusuko lwazyo mukalonga ka-Kidroni. 13#1 Bam 11:7; Neh 13:26Azipaililo zyazilundu izyakali kujwe lya-Jerusalemu kululyo lyacilundu calunyonyooko, Solomoni mwami waIsrayeli nzyaakayakila Asitoreti cisesemyo caba-Sidoni a-Kemosi cisesemyo ca-Moabu a-Milikomu cisesemyo cabana ba-Amoni, zyoonse mwami wakazisofwaazya. 14#Kul 23:24; 32:20; My 33:52; Dt 7:5,25; 12:3Nkabela wakapwaya zilende akutema zisamu zya-Asera, amoonse mubusena bwazyo wakazuzya zifuwa zyabantu.

15 # 1 Bam 12:28,33; 14:16; 2 Bam 10:31 Lino cipaililo icakali ku-Beteli ncaakayaka Jeroboamu mwana waNebati iwakacitya ba-Israyeli zibi-cipaililo eco acalo akalundu kaco wakacimwaya, akupwayaula mabwe aaco mane kwakasyaala lusuko buyo. Nkabela wakatenta cikozyano ca-Asera. 16#1 Bam 13:2Lino Josiya naakacebuka, wakabona tubanda itwakali oko kucilundu, nkabela wakatuma kuti bagwisye zifuwa omo mutubanda, wazitenta acipaililo, aboobo wakacisofwaazya, mbubonya mbuli ijwi lya-Jehova ndyaakaamba oyo muntu wa-Leza iwakasinsima aya makani. 17Elyo wakabuzya kuti, Ino ncinzi eciya ciimikidwe neembona? Bantu bamunzi bakamuvwiila kuti, Nkekabanda kamuntu wa-Leza iwakazwa mucisi ca-Juda akusinsima makani aya ngocitide okuno kucipaililo ca-Beteli. 18Wakati, Bamuleke. Kutabi uuputanya zifuwa zyakwe, Aboobo bakaleka zifuwa zyakwe azifuwa zyamusinsimi oyo iwakazwa mu-Samariya. 19#2 Mak 34:6Atukombelo toonse twakuzilundu twamuminzi yaSamariya, bami ba-Israyeli ntubakayakide cakukalazya Jehova, toonse Josiya wakatugwisya, akutucitila mbubonya mbwaakacita ku-Beteli. 20#Kul 22:20; 1 Bam 18:40; 2 Bam 11:18; 2 Mak 34:5Nkabela wakajaya bapaizi boonse bazipaililo zyakuzilundu ibakajanwa nkukonya kuzipaililo, akutenta zifuwa zyabantu alinzizyo. Amane kucita obo, wakapiluka ku-Jerusalemu.

21 # 2 Mak 35:1; Kul 12:3; Lev 23:5; My 9:2; Dt 16:2 Mpawo mwami wakalailila bantu boonse kuti, Amulye ipobwe lyaPasika cakusekelela Jehova Leza wanu, mbubonya mbukulembedwe omu mubbuku lyacizuminano. 22Nkaambo ipobwe lya-Pasika talikwe nilyakabambwa obo kuzwa kumazuba alya babetesi nibakali kubeteka ba-Israyeli, nimuba mumazuba oonse aabami ba-Israyeli abami ba-Juda, 23pele ipobwe eli lya-Pasika lyakaligwa mumwaka wakumi amusanu aitatu lyamwami Josiya cakulumba Jehova mu-Jerusalemu.

24 # 2 Bam 21:6; 1 Mak 10:13; 1 Sam 19:13; Hos 3:4; Lev 19:31; 20:27; Dt 18:11; 2 Bam 22:8-13; 2 Mak 34:14-19 Nkabela basibusangu abalozi azikozyano zyamizimu azifwanikisyo azisesemyo zyoonse izyakaboneka mucisi ca-Juda amu-Jerusalemu, Josiya wakazitenta, kuti azuzikizye majwi aamulao aalembedwe mubbuku Hilikiya mupaizi ndyaakajana muŋanda ya-Jehova. 25#2 Bam 18:5Katakwe mwami naba omwe iwakamutaangunina iwakeelene awe kukupiluka kuli-Jehova camoyo woonse acamiyeeyo yakwe yoonse acanguzu zyakwe zyoonse, kukuzuzikizya mulao woonse wa-Musa, alimwi katakwe naba omwe iwakamutobela cakweelana awe,

26 # 2 Bam 21:11; 24:3; Jer 15:4 Nekubaboobo Jehova taakwe naakaleka bukali bwakwe bupati mbwaakakalalila ba-Juda nkaambo kancito zyoonse zyakunyemya Manase nzyaakamunyemya. 27#2 Bam 17:18; 1 Bam 8:29; 9:3Jehova wakati, Ba-Juda abalo njoobatanda kuzwa kubusyu bwangu mbubonya mbundakatanda ba-Israyeli, nkabela njoosowa munzi oyu Jerusalemu, ngundakasalide, aŋanda eyi njindakaamba kuti, Mulinjiyo moliyookala izina lyangu.

Lufu lwa-Josiya, Bwami bwa-Joahazi abwa-Joyakimu

28Lino makani amwi aa-Josiya, ancito zyakwe zyoonse, sa taalembedwe mubbuku lyamakani aaciindi aabami ba-Juda? 29#Bab 1:27; 5:19; 1 Bam 4:12; 2 Bam 9:27; Zek 12:11; 2 Bam 14:8Kuciindi cakwe Faraoneko mwami wa-Egepita wakaya kuyoolwisya mwami wa-Asuri kulwizi lwa-Firate, Nkabela mwami Josiya wakainka kuyoomulwisya, pele Faraoneko amubone buyo, wakamujaya oko ku-Megido. 30#2 Bam 14:21; 21:24; Jer 22:11Lino balanda bakwe bakaleta mutunta wakwe munkalaki kuzwa ku-Megido, bamusisya kuJerusalemu, bamuzika mumavwiko aakwe. Mpawo bantu bacisi bakabweza Jehoazi mwana wa-Josiya, bamunanika mafuta aabwami kuti alye izina lyawisi.

31 # 2 Bam 24:18 Jehoazi kajisi myaka iili makumi obile aitatu naakaba mwami, nkabela wakeendelezya mu-Jerusalemu myezi yotatwe, Izina lyabanyina bakali Hamutala mwana musimbi wa-Jeremiya waku-Libina. 32Nkabela wakacita bubi mumeso aa-Jehova mbubonya mbuli bamawisi mbubakacita. 33#My 34:11; 2 Bam 25:6; Jer 52:27Lino Farao-neko wakamwaanga ku-Ribila munyika ya-Hamati, kuti atabi mwami mu-Jerusalemu, alimwi wakatezya cisi mutelo, matalenta aansiliva aali mwanda atalenta lyangolida, 34#2 Bam 24:17; Dan 1:7; Mt 1:11; Jer 22:11; Ezk 19:3,4Mpawo Farao-neko wakabika bwami mumaanza aa-Eliyakimu mwana wa-Josiya, kuti alye izina lyawisi josiya, alimwi wakasandula izina lyakwe akumuulika izina lya-Joyakimu. Pele Jehoazi wakamutolelela ku-Egepita, nkukonya oko nkwaakafwida. 35#Tus 11:11; 15:6Lino insiliva angolida yoonse Joyakimu wakazipa Farao, Wakatezya bantu bacisi kuti ajane mali aakupa mbwaakalailila Farao. Umwi aumwi wakabikila mutelo wakwe, kuti zijanwe insiliva angolida zyakupa Farao-neko.

36Joyakimu kajisi myaka iili makumi obile amusanu naakaba mwami, nkabela wakeendelezya mu-Jerusalemu myaka iili ikumi alimwi. Izina lyabanyina bakali Zebida mwana musimbi wa-Pedaya waku-Ruma. 37Nkabela wakacita bubi mumeso aa-Jehova mbubonya mbuli bamawisi mbubakacita.

Currently Selected:

2 Bami 23: Ibbaib63

Highlight

Copy