2 Bami 21
21
Mwami Manase mbwaakabisya
1Manase kajisi myaka iili ikumi aibili naakaba mwami, nkabela wakeendelezya mu-Jerusalemu myaka iili makumi osanwe amusanu. Izina lyabanyina bakali Hefiziba, 2#2 Bam 16:3Nkabela wakacita bubi mumeso aa-Jehova cakutobela zisesemyo zyabamasi Jehova mbaakatanda kubusyu bwabana baIsrayeli. 3#2 Bam 18:4; 1 Bam 16:32; Dt 4:19; 17:3; 2 Bam 17:16Wakayakulula zipaililo zyakuzilundu Hezekiya wisi nzyaakamwayide, alimwi wakayakila Baala zipaililo, akucita zifwanikisyo zyamituni mbubonya mbwaakacita Ahabu mwami wa-Israyeli, akukomba makamu oonse aakujulu akwaamanina milimo. 4#Jer 32:34; 2 Sam 7:13; 1 Bam 8:29; 9:3Nkabela wakayaka zipaililo munanda ya-Jehova, njenjiyo Jehova njaakaamba kuti, Mu-Jerusalemu monjoobika izina lyangu. 5Wakayakila makamu oonse aakujulu zipaililo mumbanza zyobile zyaŋanda ya-Jehova. 6#Lev 18:21; 20:2; 2 Bam 16:3; 17:17; 2 Mak 28:3; 33:6; Lev 19:26,31; Dt 18:10Wakatuuzya mwana wakwe mumulilo, wakali kuwaazya akusonda, wakali kubelesya basibusangu abalozi, akucita milimo mibi minji mumeso aa-Jehova yakumukalazya. 7#1 Bam 8:29; 9:3; 2 Bam 23:27; Int 132:13,14; Jer 32:34Acikozyano caAsera ncaakafulidwe wakacibika muŋanda eyo njiyonya Jehova njaakaambila Davida a-Solomoni mwanaakwe kuti, Muŋanda eyi amu-Jerusalemu, ngundakasala kuzwa kumisyobo yoonse ya-Israyeli, monjoobika izina lyangu mane kukabe akutamani. 8Nkabela nsikooyootuntulisya limbi maulu aabana ba-Israyeli kuzwa munyika eyi njindakapa bamawisi, na baanzika myoyo yabo kukucita zintu zyoonse nzindibalailide amulao woonse Musa mulanda wangu ngwaakabalailila. 9#1 Bam 14:16; 2 Mak 33:9; Tus 29:12Pele tabakwe nibakaswiilila, alakwe Manase wakabapambusya akubacitya bubi kwiinda bamasi Jehova mbaakanyonywede kubusyu bwabana ba-Israyeli,
10Lino Jehova wakaamba kumilomo yabalanda bakwe basinsimi kuti, 11#2 Bam 23:26; 24:3,4; Jer 15:4; 1 Bam 21:26; Ezk 16:3,45; 1 Pet 4:3; Ciy 21:8Manase mwami wa-Juda mbwacita zisesemyo zili boobu akubisya kwiinda ba-Amori ibakamutaangunina, ambwacitya ba-Juda zibi kumituni yakwe, 12#1 Sam 3:11; Jer 19:3lino mbuboobu mbwaamba Jehova Leza wa-Israyeli, Ncobeni njooletela Jerusalemu a-Juda mapenzi aagambya. Kufumbwa muntu uuswiilila, matwi aakwe oonse obile alapakamana. 13#Is 34:11; Malo 2:8; Am 7:7,8Njoololweda Jerusalemu ceelesyo ca-Samariya acipimyo caluzubo lwa-Ahabu, nkabela njoopukuta Jerusalemu mbubonya mbuli muntu mbwapukuta mutiba, ulapukuta akusandamuna. 14#2 Bam 19:30Njoosowa bantu bacaabilo cangu bacisyeede akubaaba mumaanza aabasinkondonyina, nkabela bayoosaalwa akunyonyoonwa kulibasinkondonyina boonse. 15Nkaambo bacita bubi mumeso aangu, bandikalazya ciindi coonse kuzwa kubuzuba obuya nindakagwisya bamawisi munyika ya-Egepita akusikila sunu.
16 #
Matl 9:6; 2 Bam 24:4; Int 10:2,8; 106:38; Tus 6:16,17; Is 59:3,7; Jer 2:34; 19:3,4; Malo 4:13,14; Ezk 9:9; 22:1-27; Mik 3:9-12; Joel 3:19 Nkabela Manase wakatila bulowa bwabantu banjibanji ibatakajisi mulandu, mane Jerusalemu wakazula bulowa kuzwa kumagolelo amwi akusikila kumagolelo ambi, Eci cakali atala lyazibi nzyaakacitya ba-Juda mukucita bubi mumeso aa-Jehova.
17 #
2 Mak 33:11-19
Lino makani amwi aa-Manase, azyoonse nyizyaakacita, azibi zyakwe nzyaakabisya, sa taalembedwe mubbuku lyamakani aaciindi aabami ba-Juda? 18#Jer 22:19; 2 Mak 33:20Elyo Manase naakafwa, wakazikwa mumuunda waŋanda yakwe, mumuunda wa-Uza, nkabela Amoni mwanaakwe wakalya izina lyakwe.
Bwami bwa-Amoni
19 #
2 Mak 33:21-23
Amoni kajisi myaka iili makumi obile aibili naakaba mwami, nkabela wakeendelezya mu-Jerusalemu myaka yobile. Izina lyabanyina bakali Mesulemeti mwana wa-Haruzi waku-Jotiba. 20Nkabela wakacita bubi mumeso aa-Jehova mbubonya mbwaakacita wisi Manase. 21Wakeenda munzila eyo njiyonya njaakeenda wisi, kukukomba mituni njaakali kukomba wisi akwiikotamina. 22#Dt 32:15; Bab 2:12; 1 Bam 11:33Wakasiya Jehova Leza wabamawisi. Taakwe naakeenda munzila ya-Jehova pe.
23 #
2 Bam 12:20; 14:19; 2 Mak 33:24,25 Lino balanda ba-Amoni bakamuvwiya, bajaya mwami muŋanda yakwe. 24Mpawo bantu bacisi bakajaya bantu abo ibakavwiyide mwami Amoni. Nkabela bantu bacisi bakabika bwami bwakwe mumaanza aamwanaakwe Josiya. 25Lino makani amwi aa-Amoni ancito zyakwe, sa taalembedwe mubbuku lyamakani aaciindi aabami ba-Juda? 26#Mt 1:10Nkabela bakamuzika mumavwikilo aakwe mumuunda wa-Uza, elyo Josiya mwanaakwe wakalya izina lyakwe.
Currently Selected:
2 Bami 21: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
