2 Ba-Korinto 5

Banakristo balalangila iŋanda iitamani yakujulu

1 # Job 4:19; 2 Pet 1:13,14 Nkaambo tulizi kuti, caakumwaika cilao cesu ncitukala ansi ano, tulijisi buyaki buzwa kwa-Leza, ŋanda iitacitwi amaanza aabantu, iitamani, iili kujulu. 2#Rom 8:23Omuno mutubede tulalisinsimukila, nkaambo tulasukama kusamikwa abukalo bwesu buzwa kujulu, 3kuti nitwalivumbya boobo tutakajanwi mbuli basicintanda. 4#1 Kor 15:53Nkaambo swebo nitucili omuno mucilao cesu tulalisinsimukila cakulemenwa. Teensi kwaamba kuti tulayanda kusamununwa, pe, pele tulayanda kusamikwa ajulu, kuti cifwisi cimenenenwe kubuumi. 5#2 Kor 1:22; Ef 1:13; Rom 8:16,23Nkabela oyo uutubambila cintu eco ngu-Leza, nguwenya uutupa Muuya mbuli citondezyo. 6#Heb 11:13Nkaambo kaako tulasyoma lyoonse mumoyo, Tulizi kuti ciindi ncitucili mumubili tatuko ku-Mwami, 7#1 Kor 13:12Nkaambo nkulusyomo nkutweenda, takweensi kukubona pe, 8#Flp 1:23Aboobo moyo wesu tuupengede, pele tulayandisya kupola kumubili akukala kuMwami, 9#Int 39:12Nciceeco ncitupangika moyo kuti tumukonde lyoonse, nanka nitucili mumubili nanka nitutamo. 10#Rom 2:16; 14:10; Inc 17:31Nkaambo toonse buyo tuleelede kuboneka kubetekelo lya-Kristo, kuti tukatambule umwi aumwi cakuvola ceelede camilimo yesu njitucita mumibili yesu, niiba mibotu niiba mibi.

Milimo yaluyanzano

11 # 2 Kor 4:2 Lino tulizi mbukweelede kulemeka Mwami, aboobo tulakombelezya bantu. Kumeso aa-Leza tulabonwa kabotu mbutubede, nkabela ndasyoma kuti kumanjezeezya aanu aalo tulabonwa mbubonya. 12#2 Kor 3:1Tatuli mukuboola kulikankaizya kulindinywe, pe, tulamupa kaambo kakutulumbaizya, kuti muvwiizye abo balilumbaizya kumakani aaboneka kumeso buyo, aatali aamoyo, 13Nkaambo na tulisondokede, nkikaambo kamakani aa-Leza, nanka tulyeenzene, nkikaambo kandinywe. 14Nkaambo kuyanda Kristo nkokutusinikizya, ikuti tulabeteka obo, kuti omwe wakafwida boonse, aboobo boonse bakafwa. 15#1 Tim 2:6; Rom 14:7,8Nkabela wakabafwida boonse kuti abo bapona bataciliponene beni pele baponene oyo iwakabafwida akubuka.

16Nkaambo kaako, kuzwa sunu tatwaambi muntu naba omwe kuti muntu buyo, Nikuha kuti twakalizi Kristo mbuli muntu nekubaboobo sunu tatucimuzi boobo pe, 17#Rom 8:1,10; Gal 6:15; Ciy 21:5; Is 43:18; 65:17Aboobo kuti muntu waba muli-Kristo, waba mulenge mupya. Zintu zikulukulu zyamaninina, zyoonse zyaba zipya. 18#Rom 5:10Aya makani oonse azwa kuli-Leza, nguwe uutuyanzanya kwakwe mwini muli-Kristo akubika mumaanza esu milimo yaluyanzano, 19#Rom 3:24,25; Kol 1:19,20nkukuti milimo yakwaambila bantu Leza mbwaakalibonya muli-Kristo kuti aliyanzanisizye bantu boonse, nkabela mbwatabaelezezyi milandu yabo, alimwi mbwaabika mumaanza esu inkombe yaluyanzano.

20 # Is 52:7 Lino tuli bangambela ba-Kristo nkukuti Leza ulamukumbila kumaanza esu. Tulamukombelezya muzina lya-Kristo kuti, Amuyanzanye a-Leza, 21#Joh 8:46; Heb 4:15; Gal 3:13; 1 Kor 1:30; Flp 3:9; 1 Pet 2:22Oyo iwatakazi zibi Leza wakamucitya kuti abe zibi nkaambo kandiswe, kuti swebo tube bululami bwa-Leza mulinguwe.

Currently Selected:

2 Ba-Korinto 5: Ibbaib63

Highlight

Copy