2 Ba-Korinto 12

Zilengano zya-Paulo aziyubunuzyo zyakwe

1Lino kulikankaizya takugwasyi pe, nekubaboobo ndisinikizisidwe, aboobo ndayanda kwaamba makani aazilengano aziyubunuzyo zya Mwami. 2Ndizi umwi muntu uuli muli-Kristo, nkabela kuzwa kumyaaka iili ikumi amyaaka yone oyo muntu wakakwempelwa kujulu lyatatu. (Nsizi na kali amubili nanka kazwide mumubili, Leza nguuzi), 3Ndizi kuti oyo muntu (na kali amubili nanka kazwide mumubili nsizi mebo, Leza nguuzi mbwaakabede) 4#Lk 23:43; Ciy 2:7wakakwempelwa ku-Paradaiso, wakaswiilila makani aataambiki aatondwa kwaambwa kumulomo wamuntu. 5#2 Kor 11:30Muntu uuli boobo ndakonzya kulikankaizizya nguwe, pele nsikonzyi kulikankaizizya lwangu ndemwini pe, nkutaamba kuti kulikankaizizya makompami aangu, 6#2 Kor 10:8; 11:16Ninjanda kulikankaizya, nindataba mufubafuba pe, nkaambo nindaamba makani aaliwo, nekubaboobo ndalikasya, nkaambo nsiyandi kuti muntu ayeeye kuti ndainda eco ciboneka kumeso aakwe na kumatwi aakwe. 7#Job 2:6Lino nkaambo kaziyubunuzyo zipati zigambya nzindakayubunwidwa, kuti nkasigwe kulisumpula cakwiinda, ndakapegwa cisongozyo cakuyasa mubili wangu, mutumwa wa-Saatani wakundidinkaula, kuti ntakainde kulisumpula. 8Nkabela ndakakumbila kotatwe ku-Mwami nkaambo kacintu eci, kuti cindizwide, 9pele wakandaambila kuti, Lulakuzulila luzyalo lwangu, nkaambo inguzu zyangu zilaswiililika loko mukati kabukompami. Aboobo ndalikankaizizya makompami aangu cakukondwa, kuti inguzu zya-Kristo zindipopele. 10#Flp 4:13Kaako makompami azyuumo amapakasyo amapenzi amamanikizi, ezi zyoonse buyo ndazibotelwa nkaambo ka-Kristo, ikuti ciindi ncinkompeme nciconya ncindi singuzu,

Zitondezyo zyabuapostolo bwinibwini mbuzibonwa muli-Paulo

11 # 2 Kor 11:5 Lino ndaba mbuli mufubafuba, pele ndinywe mwandisinikizya. Nkaambo ndaleelede kulubululwa ndinywe. Ikuti nsityompokezegwi nibuba buniini kubaapostolo bapati cakwiinda, nintali muntu. 12#Rom 15:19Ncobeni zitondezyo zyabuapostelo zyoonse zyakacitwa akati kanu calukakatilo, zitondezyo amalele amilimo yanguzu. 13#2 Kor 11:19Ino sa kuli cintu niciba comwe ncimubisizidwe kwiinda imbungano zimwi? Cita ceeci, cakuti mebo ndemwini teendakamulemena. Amundilekelele mulandu oyu.

Ulayanda kubaswaya lwatatu

14 # 2 Kor 13:1 Amubone, olu ndwatatu ndundalibambila kuza kumuswaya, nkabela nsikooyoomulemena pe, nkaambo teensi imbono zyanu nzinjanda, ndinywe nubeni. Nkaambo bana tabeelede kuyobweda bazyali babo, pe, bazyali mbibeelede kuyobweda bana. 15#Flp 2:17Mbubo mebo cilandibotezya kusowa zintu zyangu zyoonse akulisowa ndemwini nkaambo kamyuuya yanu. Lino na luyando ndunjanda ndinywe ndupati cakwiinda, sa luyando lulakonzya kuceya

Paulo a-Tito tabalemeni bantu

16Mbubo, teendakamulemena pe. Pele kulaambwa kuti ndakali mupyungi, aboobo ndakamunyanga calweeno. 17Sa mbukubede? Sa ndakamunyanzya cintu kumaanza aabantu abo mbundakamutumina? 18#2 Kor 8:6,16-18Ndakakumbila Tito kuti amuswaye, alimwi antoomwe anguwe ndakatuma oyo mukwesu umwi, Sa Tito wakamunyanzya cintu? Aswebo sa teetwakeenda awe mu-Muuya omwe nguwenya? Sa teetwakeenda antaamo zyomwe?

Nzyayanda kujana kulimbabo

19Lino mulayeeya kuti kumajwi aya manji ndalikankaizya buyo sa? Pe, tulaamba muli-Kristo kubusyu bwa-Leza, nkabela makani oonse ngotwaamba, nubayandwi, ngaakumuyaka. 20#2 Kor 10:2; 1 Kor 4:6Nkaambo ndayoowa kuti ciindi ncinti sike nzoojana kuti tamuli mbuli mbunjanda, ambebo ndemwini muzoondijana kuti nsili mbuli mbumuyanda nywebo, Ndayoowa kuti nzoojana lukazyanyo, ibbivwe, manyeme, mipampo mipampo, mavwiyi, majubi, kamikami, mapyopyongano, 21#2 Kor 2:1; 13:2Ndayoowa kuti ciindi ncenti sike Leza wangu uzoondifwisya bweeme kulindinywe, nkaambo nzoolilila bantu banji ibakacita zibi kalekale pele tabana kweempelwa busofwaazi abumambi azisusi zibi nzibakali kucita.

Currently Selected:

2 Ba-Korinto 12: Ibbaib63

Highlight

Copy