2 Makani 36
36
Jehoahazi mbwaakaba mwami
1 #
2 Bam 23:30; 2 Mak 26:1; 33:25 Lino bantu bacisi bakabweza Jehoahazi mwana wa-Josiya, bamupa bwami mucibaka cawisi mu-Jerusalemu. 2Jehoahazi kajisi myaka iili makumi obile aitatu naakaba mwami, nkabela wakeendelezya mu-Jerusalemu myezi yotatwe. 3Pele mwami wa-Egepita wakamugwisya mu-Jerusalemu akutezya cisi mutelo wamatalenta aansiliva aali mwanda atalenta lyangolida. 4#Ezk 19:3Nkabela mwami wa-Egepita wakabika munyina Eliyakimu kuti abe mwami wa-Juda awa-Jerusalemu, wasandula izina lyakwe, wamuulika izina lyaJehoyakimu. Lino Jehoahazi mupati wakwe, Neko wakamutola, wamusisya ku-Egepita.
Bwami bwa-Jehoyakimu
5 #
2 Bam 23:36,37; Jer 36:1,27-32 Jehoyakimu kajisi myaka iili makumi obile amusanu naakaba mwami, nkabela wakeendelezya mu-Jerusalemu myaka iili ikumi aumwi. Nkabela wakacita bubi mumeso aa-Jehova Leza wakwe. 6#2 Bam 24:1,6; Ezk 19:8,9; Dan 1:1,2; Hab 1:6,10Lino kwakeza kuzoomulwisya Nebukadinezara mwami wa-Babuloni, wamwaanzya inkeetani akumutola ku-Babuloni. 7#Dan 1:1Azyalo zimwi zibelesyo zyaŋanda ya-Jehova, Nebukadinezara wakazileta ku-Babuloni, wazibika muntempele yakwe mu-Babuloni. 8#1 Mak 3:16Lino makani amwi aa-Jehoyakimu, azisesemyo nzyaakacita amilandu iyakajanwa mulinguwe, alilembedwe mubbuku lyabami ba-Israyeli aba-Juda, Elyo Jehoyakini mwanaakwe wakulya izina lyakwe.
Bwami bwa-Jehoyakini
9 #
2 Bam 24:8
Jehoyakini kajisi myaka iili musanu aitatu naakaba mwami, nkabela wakeendelezya mu-Jerusalemu myezi yotatwe amazuba aali ikumi aane. Nkabela wakacita bubi mumeso aa-Jehova. 10#Dan 1:1Lino mumwaka mupya Nebukadinezara wakatuma, wamuleta ku-Babuloni, antoomwe azibelesyo ziyandisi zyaŋanda ya-Jehova. Nkabela Zedekiya mupati wakwe wakamulisya bwami bwa-Juda abwa-Jerusalemu.
Bwami bwa-Zedekiya. Buzike bwaku-Babuloni
11 #
2 Bam 24:17; Jer 52:1 Zedekiya kajisi myaka iili makumi obile aumwi naakaba mwami, nkabela wakeendelezya mu-Jerusalemu myaka iili ikumi aumwi. 12Nkabela wakacita bubi mumeso aa-Jehova Leza wakwe. Takwakalibombya kubusyu bwa-Jeremiya musinsimi naakaamba majwi aazwa kumulomo wa-Jehova. 13#Kul 17:15; Jer 52:3; Ezk 17:11-20; 2 Bam 17:14; Neh 8:16,17Alimwi wakapapila mwami Nebukadinezara iwakamukonkezya muzina lya-Leza. Wakayumya insingo yakwe akusumpula moyo wakwe kukukaka kupiluka kuli-Jehova Leza wa-Israyeli. 14Abalo bapati boonse babapaizi abantu bakabisya loko akucita milimo iisesemya yabamasi. Bakasofwaazya iŋanda ya-Jehova njaakasalazya mu-Jerusalemu. 15#Jer 25:3; Hos 11:8Jehova Leza wabamawisi wakabatumina kumulomo wabatumwa, wafumisya kubatuma, nkaambo wakafwida bantu bakwe acikalilo cakwe luzyalo. 16#2 Mak 30:10; Int 35:16; 74:1; Jer 5:12; 32:3; Tus 1:25; Lk 16:14Pele bakali kuseka batumwa ba-Leza, akusampaula majwi aakwe, akubisizya basinsimi bakwe, mane lumwi bukali bwa-Jehova bwakabukila bantu bakwe, elyo katakwe iwakakonzya kubaponya. 17#Dt 28:49; 2 Mak 33:11; Ezr 9:7Nkabela wakasisya kulimbabo mwami wabaKasidi, wajazya bakubusi babo ipanga muŋanda yacikombelo cabo. Takwakafwida muntu luzyalo, naba mukubusi naba musimbi, naba mudala naba mucembele. Boonse buyo wakabaaba mumaanza aakwe. 18#2 Bam 25:13Azyalo zibelesyo zyoonse zyaŋanda ya-Leza, niziba zipati niziba ziniini, azintu ziyandisi zyaŋanda zya-Jehova, azintu ziyandisi zyamwami abapati bakwe, wakazigwisya zyoonse, wazitola ku-Babuloni. 19Lino bakatenta iŋanda ya-Leza akumwaya bulambo bwa-Jerusalemu. Amaanda oonse aabwami bakaatentya mulilo, akunyonyoona zibelesyo ziyandisi zyao zyoonse. 20Abaabo ipanga mbolyakaleka, wakabatola boonse mubuzike ku-Babuloni. Bakaba bazike bakwe, walo abana bakwe, mane lumwi bwakabuka bwami bwa-Persia. 21Mbuboobu mbulyakazuzigwa ijwi lya-Jehova ndyaakaamba kumulomo wa-Jeremiya. Akaba obo mane nyika yakapumuna masabata aayo. Mazuba oonse aakusaalwa, nyika yakalyokezya, mane kusikila myaka iili makumi aali musanu aabili.
22Lino mumwaka mutaanzi wabwami bwa-Koresi mwami wa-Persia, kuti lizuzigwe ijwi lya-Jehova ndyaakaamba kumulomo wa-Jeremiya, Jehova wakabusya moyo wa-Koresi mwami wa-Persia, nkabela wakatuma majwi mubwami bwakwe boonse, alimwi wakaalemba, aakuti, 23Mbuboobu mbwaamba Koresi mwami wa-Persia. Zisi zyoonse zyaansi, Jehova Leza wakujulu wazyaaba mumaanza aangu. Alimwi wandilailila kumuyakila iŋanda mu-Jerusalemu mucisi ca-Juda, Lino nguni akati kanu wabantu bakwe? Jehova Leza wakwe abe awe. Anyamuke, ainke kulimbabo.
Currently Selected:
2 Makani 36: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
