1 Bami 6

Solomoni mbwaakayaka intempele

1Lino mumwaka wamyanda yone amakumi aali musanu aatatu, bana ba-Israyeli nibakamana kulonga kuzwa ku-Egepita, mumwaka wane wabwami bwa-Solomoni bwaku-Israyeli, mumwezi wa-Zivi (nkukuti mwezi wabili), wakatalika kuyaka iŋanda ya-Jehova. 2#Ezk 41:1Nkabela iŋanda mwami Solomoni njaakayakila Jehova, bulamfu bwayo kabuli tukokola tuli makumi aali musanu alimwi, abwaamba bwayo kabuli tukokola tuli makumi obile, abwiime bwayo kabuli tukokola tuli makumi otatwe. 3Alukonkono lwakunembo lyantempele impati, bulamfu bwalo kabuli tukokola tuli makumi obile mbubonya mbuli bwaamba bwaŋanda, abwaamba bwalo kabuli tukokola tuli ikumi kunembo lyaŋanda. 4#Ezk 40:16Alimwi wakacitila iŋanda zipulo zili azikunguzyo zijisi. 5Nkabela wakayaka lubaya kumbali lyamalambo aaŋanda, lwakuzyungulusya malambo aaŋanda, intempele acikombelo camukati coonse, alimwi wakayaka twaanda kumabazu oonse. 6Twaanda twaansi twakalijisi bwaamba bwatukokola tosanwe, twaanda twaakati twakalijisi bwaamba bwatukokola tuli musanu akamwi, atwaanda twaanze twakalijisi bwaamba bwatukokola tuli musanu atubili, nkaambo anze lyabulambo wakayaka minsende kuti maseketi atagumi mubulambo.

7Lion iŋanda niyakali mukuyakwa, yakayasigwa mabwe aakabambidwe kale nkukonya nkwaasigwa, aboobo katakwe insando nikaba kaleba niciba cibelesyo cimwi calubulo icakamvwigwa muŋanda mukuyakwa kwayo.

8Nkabela mulyango watwaanda twaansi wakali kubbazu lyalulyo lwananda, alimwi kakuli matantilo aaya kutwaanda twaakati, akuzwa oko kuya kutwaanda twakujulu. 9Aboobo wakayaka iŋanda akwiimanisya, alululi lwayo wakaluyasya maseketi amapulanga aakedari. 10Alwalo lubaya lwakuzyunguluka iŋanda yoonse wakaluyaka, lwakalijisi bulamfu bwatukokola tosanwe, alimwi lwakaswaanizigwa aŋanda aziyako zyakedari.

11Mpawo ijwi lya-Jehova lyakasikila Solomoni, lyakati, 12Swiilila makani aaŋanda eyi njoli mukuyaka. Na uende munzila zyangu akubamba imbeta zyangu akulemeka milazyo yangu akweenda mulinjiyo, lino njookuzuzikizya cisyomezyo cangu ncindakasyomezya Davida uso. 13#Kul 25:8; 29:45; Lev 26:11; Int 132:13,14; Ezk 37:26-28; 2 Kor 6:16; Heb 3:6; 13:5; Ciy 21:3; Dt 31:6Njookala akati kabana ba-Israyeli, nsikooyoobatakata bantu bangu ba-Israyeli pe.

14Aboobo Solomoni wakayaka iŋanda lumwi waimana. 15Nkabela malambo aaŋanda aamukati wakaayasya zisamu zyakedari. Kuzwa ansi akusikila kumaseketi aalululi, moonse mukati wakamuvumbya zisamu, alimwi ansi wakaavumbya zisamu zyamulombe. 16#Kul 26:33; Lev 7:6; 16:2; My 18:10; 1 Bam 8:6; 2 Mak 3:8; Ezk 45:3; Heb 9:3Akwalo kusule lyaŋanda wakayaka tukokola tuli makumi obile azisamu zyakedari, kuzwa ansi kusikila kumaseketi, kube cikombelo camukati, busena busalalisya loko. 17Nkabela iŋanda ini, nkukuti intempele iyakali kunembo lyacikombelo cisalalisya camukati, kejisi bulamfu bwatukokola tuli makumi one. 18Azyalo zisamu zyakedari zyamukati zyakalibezedwe mbuli myuungu ambuli malubaluba aasyuuka, Zyoonse zyakali zyakedari, katakwe mabwe aaboneka pe. 19#Kul 40:20; 1 Bam 8:6-10Acikombelo cisalalisya wakacibamba mukati kaŋanda, kuti abike mulincico ibbokesi lyacizuminano ca-Jehova. 20Nkabela cikombelo camukati cakalijisi bulamfu bwatukokola tuli makumi obile abwaamba bwatukokela tuli makumi obile abwiime bwatukokola tuli makumi obile, alimwi wakaciziluluzya ingolida loko, akucita cipaililo cazisamu zyakedari. 21Amoonse mukati kaŋanda Solomoni wakamuziluluzya ingolida loko, alimwi wakabika inkeetani zyangolida kunembo lyacikombelo cisalalisya, acikombelo eco acalo wakaciziluluzya ingolida. 22#Kul 30:1Iŋanda yoonse wakaiziluluzya ingolida lumwi wakamana iŋanda yoonse, acalo cipaililo camucikombelo camukati wakaciziluluzya ingolida.

23 # Kul 25:20; 37:7-9; 2 Mak 3:10-12; 5:8 Nkabela mucikombelo camukati wakapanga baangelo bakerebimu bobile. Wakabapanzya zisamu zyaolifa. Umwi aumwi kajisi bwiime bwatukokola tuli ikumi. 24Ibbaba limwi lyakeribu lyakali tukokola tosanwe mubulamfu, abbaba limwi lyakali tukokola tosanwe mubulamfu, nkukuti bulamfu boonse kuzwa kumagolelo aabbaba limwi kusikila kumagolelo aabbaba alimwi bwakali tukokola tuli ikumi. 25Aangelo wabili alakwe kajisi bulamfu bwatukokola tuli ikumi. Bakerebimu boonse bobile bakeelene mubulamfu bwabo amuziimo zyabo. 26Bwiime bwakerebimu umwi bwakali tukokola tuli ikumi, abwiime bwakerebimunyina abwalo bwakali tukokola tuli ikumi. 27#Kul 25:20; 37:9; 2 Mak 5:8Nkabela wakabika baangelo abakerebimu mucikombelo camukati. Lino nibakatandabika mababa aabo, ibbaba lyakerebimu umwi lyakaguma kubulambo, abbaba lyakerebimunyina alyalo lyakaguma kubulambo bwabili, alimwi akati kaŋanda mababa aabo akali kugumana. 28Abalo bakerebimu wakabaziluluzya ingolida.

29Lino amalambo oonse aaŋanda aazyungulukide wakabeza zikozyano zyabakerebimu azyamikunka azyamalubaluba aasyuuka, mukati aanze oonse. 30Aalo ansi aaŋanda wakaaziluluzya ingolida, mukati aanze oonse.

31 # Joh 10:7 Kumulyango wacikombelo cisalalisya camukati wakapanga makoma aazisamu zyaolifa. Zikunguzyo zyoonse zyakoma zyakali mumabazu osanwe. 32Amakoma ayo obile aazisamu zyaolifa, oonse wakaabezela zikozyano zyabakerebimu azyamikunka azyamalubaluba aasyuuka, alimwi wakaaziluluzya ingolida. Aalo abakerebimu aamikunka wakaaziluluzya ingolida.

33Amulyango wantempele yaanze, awalo wakaucitila mbubonya makoma aazisamu zyaolifa, aakali amabazu one, 34#Ezk 41:23amakoma obile aazisamu zyamulombe. Zipanzi zyobile zyakoma limwi zyakali kuswanaana, azipanzi zyobile zyakoma limwi zyakali kuswanaana. 35Zyoonse wakazibezela zikozyano zyabakerebimu azyamikunka azyamalubaluba aasyuuka, alimwi wakaziziluluzya ingolida iyakayalidwe cakweelana oonse abubeze. 36Alubaya lwamukati wakaluyasya mindando yotatwe yamabwe aabezedwe amundando omwe wazisamu zyakedari.

37Intalisyo yaŋanda ya-Jehova yakabikwa mumwaka wane, mumwezi wa-Zivi, 38elyo mumwaka wakumi aumwi, mumwezi wa-Buli (nkukuti mwezi wamusanu aitatu) iŋanda yakamana kuyakwa kumabazu oonse mbubonya mbuyakayeeyegwa. Aboobo kuyakwa kwayo kwakatola myaka iili musanu aibili.

Currently Selected:

1 Bami 6: Ibbaib63

Highlight

Copy