1 Bami 22
22
Ba-Israyeli mbubakalibamba kulwana alwatatu aba-Aramu
1Lino myaka yotatwe ba-Aramu aba-Israyeli bakalikede kabatalwani. 2#2 Mak 18:2,34Pele mumwaka watatu Josafati mwami wa-Juda wakeza kukubona mwami wa-Israyeli. 3#Dt 4:43Mpawo mwami wa-Israyeli wakaambila balanda bakwe kuti, Sa tamuzi kuti Ramoti-Gileadi nguwesu? Nekubaboobo tulikede buyo, tatumunyanzyi mwami wa-Aramu. 4#2 Bam 3:7Lino wakabuzya Josafati kuti, Sa ndakonzya kwiinka ayebo kuyoolwisya Ramoti-Gileadi? Nkabela Josafati wakavwiila mwami wa-Israyeli kuti, Tuleelene mebo ayebo, bantu bangu abantu bako, mabbiza aangu amabbiza aako.
Basinsimi babeji mbubakasinsima
5Pele Josafati wakaambila mwami wa-Israyeli kuti, Taanguna kubuzya makani kuli-Jehova, 6#1 Bam 18:19; Jer 28:1-17; Ezk 13:1-23Lino mwami wa-Israyeli wakabunganya basinsimi, bakati be myanda yone, wababuzya kuti, Sa njiinke kuyoolwisya RamotiGileadi, na ndeke? Bakati, Koya, nkaambo Mwami uyooaba munzi mumaanza aako. 7#2 Bam 3:11Mpawo Josafati wakabuzya kuti, Sa takusyeede aumwi musinsimi wa-Jehova, kuti tubuzye kumulomo wakwe? 8#1 Bam 19:10; 20:43Mwami waIsrayeli wakavwiila Josafati kuti, Kwasyaala muntu omwe ngutukonzya kubuzya ijwi lya-Jehova kumulomo wakwe, pele ndimusulide, nkaambo tasinsimi aandime makani mabotu pe, ulasinsima makani mabi luzutu. Ngu-Mikaya mwana wa-Yimla. Pele Josafati wakaamba kuti, Mwami ataambi obo pe, 9Mpawo mwami wa-Israyeli wakaita silutwe, wamulailila kuti, Fwambaana kuleta okuno Mikaya mwana wa-Yimla. 10Lino mwami wa-Israyeli a-Josafati mwami wa-Juda bakalikede umwi aumwi acuuno cakwe cabwami, kabasamine zikobela zyabo, kucipolelo cakumulyango waSamariya, alimwi basinsimi boonse bakali kusinsima kumeso aabo. 11Nkabela Zedekiya mwana wa-Kenana kalicitilide meja aabutale, elyo wakati, Mbuboobu mbwaamba Jehova. Aya ngaakutonsya ba-Aramu mane bakanyonyooke. 12#Jer 23:25-32Abalo basinsimi boonse bakasinsima mbubonya. Bakati, Koya ukalwane ku-Ramoti-Gileadi, ukacite kabotu, nkaambo Jehova wauaba mumaanza aamwami.
Mikaya mbwaakasinsima
13Lino mutumwa wakaya kuyooita Mikaya wakamwaambila kuti, Bona! Majwi aabasinsimi boonse alazuminana kukwaamba makani mabotu aamwami. Ijwi lyako libe mbubonya mbuli majwi aabo. Amba kabotu. 14#My 22:38; Int 118:6; Tus 28:1; Jer 1:7-19; Ezk 2:3-8; Inc 4:13-31; 9:29; Rom 8:31; 2 Kor 3:12; Gal 1:9,10; Ef 6:19,20; Flp 1:20; 1 Tes 2:2-6; 1 Tim 3:13; Tit 1:9,10; Heb 13:5,6Pele Mikaya wakavuwa kuti, Ncobeni Jehova mbali muumi, kufumbwa cintu Jehova ncandaambila, ncencico ncenti ambe. 15Lino naakasika kumwami, mwami wakamwaambila kuti, Mikaya, sa twiinke ku-Ramoti-Gileadi kuyoolwisya, na tuleke? Wakati, Koya, ukacite kabotu, nkaambo Jehova wauaba mumaanza aamwami. 16Pele mwami wakamwaambila kuti, Ziindi zili zyongae nzendeelede kukulailila kuti undaambile lusinizyo luzutu muzina lya-Jehova 17#Mt 9:36Elyo wakati, Ndakabona ba-Israyeli boonse balimwaikide azilundu mbubonya mbuli imbelele zitakwe mweembeli, lino Jehova wakati, Aba tabajisi mweembeli, bapiluke kulimbabo caluumuno. 18Mpawo mwami wa-Israyeli wakaambila Josafati kuti, Sa teendakakulwiida kuti takonzyi kusinsima aandime makani mabotu, pele makani mabi luzutu? 19#Is 6:1; Dan 7:9,10; Job 1:6; 2:1; Int 103:20; Zek 1:10; Mt 18:10; Heb 1:7,14Lumwi Mikaya wakati, Mbubo! Koswiilila ijwi Iya-Jehova. Ndakabona Jehova ulikede acuuno cakwe cabwami amakamu oonse aakujulu aliimvwi kunembo lyakwe, kululyo akulumwensi. 20Lino Jehova wakabuzya kuti, Ino nguni uukonzya koongelezya Ahabu, kuti ainke kuyoonyonyooka kuRamoti-Gileadi? Nkabela boonse bakapambukana mukwaamba kwabo, 21mane lumwi kwakeza muuya akwiimikana kubusyu bwa-Jehova, wakati, Mebo ndakonzya kumoongelezya. Jehova wakamubuzya kuti, Uyoomoongelezya buti? 22#Bab 9:23; Job 12:16; Ezk 14:9; 2 Tes 2:11Wakavuwa kuti, Njooinka akuba muuya wabubeji mumilomo yabasinsimi bakwe boonse. Wakati, Ncobeni uyoomoongelezya, uyookonzya. Koya, ukacite obo. 23#Ezk 14:9Lino bona! Jehova wabika muuya wabubeji mumilomo yabasinsimi bako boonse, pele makani Jehova ngaamba aanduwe mabi.
24 #
Jer 28:16; 2 Mak 18:23 Mpawo Zedekiya mwana wa-Kenana wakaswenenena kuli-Mikaya, wamuuma kuseya, wati, Muuya wa-Jehova wandisiya buti kuyooambila nduwe? 25#1 Bam 20:30Mikaya wakavuwa kuti, Uyoobona mubuzuba obo mboyoonjila muŋanda yamukati kukuyuba. 26Lino mwami wa-Israyeli wakati, Amujate Mikaya, mumutole kuli-Amoni mweendelezi wamunzi akuli-Joasi mwana wamwami, 27ubaambile kuti, Mbuboobu mbwaamba mwami, Amubike muntu oyu muntolongo, mumusanizye insima yaku buya amaanzi luzutu mane nkaboole caluumuno. 28#My 16:29; Dt 18:20Pele Mikaya wakati, Na ncobeni ulaboola caluumuno, teensi Jehova iwakaamba kumulomo wangu. Alimwi wakati, Amuswiilile nubantu nyoonse.
Ahabu mbwaakafwa munkondo yaku-Ramoti-Gileadi
29Lino mwami wa-Israyeli a-Josafati mwami wa-Juda bakainka kuRamoti-Gileadi. 30#2 Mak 35:22Nkabela mwami wa-Israyeli wakaambila Josafati kuti, Mebo ndalyeenenya akunjila munkondo, pele webo kosama zikobela zyako. Aboobo mwami wa-Israyeli wakanjila munkondo cakulyeenenya. 31Lino mwami wa-Aramu wakalailila basilutwe bankalaki zyakwe bali makumi otatwe ababili kuti, Mutalwisyi muntu naba omwe naba muniini naba mupati, cita mwami wa-Israyeli alike. 32#2 Mak 18:31; Tus 13:20Mpawo basilutwe bankalaki nibakabona Josafati, bakayeeya kuti ngonguwe mwami wa-Israyeli, aboobo bakaleya kumulwisya, mane josafati wakalila. 33Elyo basilutwe bankalaki nibakabona kuti engwe mwami wa-Israyeli bakaleka kumutobela. 34#2 Sam 15:11Pele umwi muntu wakafusya buta bwakwe cakutaziba, wayasa mwami wa-Israyeli akati kazikwabilizyo zyacikungu azyacamba. Elyo, wakaambila sinkalaki wakwe kuti, Piluka, undigwisye munkondo, nkaambo ndiyasidwe. 35Nkabela inkondo yakavuta buzuba obo, amwami wakalitabilidwe munka-laki yakwe kalangide aba-Aramu, mane wakafwa ciindi camabbililo aazuba, abulowa bwakali kuzwa mpaakayasidwe akukunkila atako lyankalaki. 36Lino izuba nilyakaamba kubbila kwakamvwigwa mubila muzilao wakuti, Boonse bapiluke, umwi aumwi kumunzi wakwe akucisi cakwe.
37Mbuboobo mwami mbwaakafwa, nkabela naakasika ku-Samariya, bakazika mwami nkukonya ku-Samariya. 38#Dt 32:35; 1 Bam 21:19; 2 Bam 10:10; Int 33:11; 119:89; Is 14:27; 40:8; Nah 1:2; Mt 24:35; 1 Pet 1:25Elyo bakasanzya-sanzya inkalaki kuziba lyaku-Samariya, nkabela ba bwa bakantwakizya bulowa bwakwe, oko basibwaamu nkubakali kusamba, mbubonya mbuli ijwi lya-Jehova mbulyakaambide. 39#Am 3:15Lino makani amwi aa-Ahabu, ancito zyakwe zyoonse, aŋanda yamanyanga njaakayaka, aminzi yoonse njaakayaka, sa taalembedwe mubbuku lyamakani aaciindi aabami ba-Israyeli. 40Elyo Ahabu naakalede mukabanda abasikale bakwe, Ahaziya mwanaakwe wakalya izina lyakwe.
Bwami bwa-Josafati mucisi ca-Juda
41 #
2 Mak 20:31
Lino Josafati mwana wa-Asa wakatalika kweendelezya mucisi ca-Juda mumwaka wane wabwami bwa-Ahabu mwami wa-Israyeli, 42Josafati kajisi myaka iili makumi otatwe amusanu naakalya bwami, nkabela wakeendelezya myaka iili makumi obile amusanu mu-Jerusalemu. Izina lyabanyina bakali Azuba mwana wa-Sili. 43#2 Mak 17:3; 1 Bam 14:23; Dt 12:5-14; 2 Bam 12:3Nkabela wakeenda munzila zyoonse zya-Asa wisi, taakwe naakaleya pe, mukucita ziluleme mumeso aa-Jehova. Pele zipaililo zyakuzilundu teezyakagwisigwa pe. Bantu bakacili kupaila akutenta tununkilizyo omo muzilundu. 44#2 Mak 19:2; 2 Kor 6:14Elyo Josafati wakatangana mulongo amwami wa-Israyeli. 45Lino makani amwi aa-Josafati, anguzu zyakwe nzyaakacita, ankondo nzyaakalwisya, sa taalembedwe mubbuku lyamakani aaciindi aabami ba-Juda? 46#Matl 13:13; 1 Bam 14:24; 15:12; Jud 1:7Alimwi baalumi basibwaamu ibakacisyeede mumazuba aa-Asa wisi, wakabamaninina boonse munyika, 47#Matl 25:23; 2 Sam 8:14; 2 Bam 3:9; 8:20Lino katakwe mwami mucisi ca-Edomu. Ngambela nguwakali kweendelezya. 48#1 Bam 10:22; 9:26; 2 Mak 20:35,37Nkabela Josafati wakapanga maato aa-Tarsisi kuti baye ku-Ofira kuyooleta ingolida, pele teebakainka pe, nkaambo maato akafwa ku-Ezioni-Geberi. 49Mpawo Ahaziya mwana wa-Ahabu wakaambila josafati kuti, Balanda bangu bainke abalanda bako mumaato. Pele Josafati takazumide pe. 50#2 Mak 21:1Elyo Josafati naakafwa akulala mucuumbwe abamawisi, wakazikwa abamawisi mumunzi wa-Davida wisi, nkabela Joramu mwanaakwe wakalya izina lyakwe.
Ahaziya mbwaakalya bwami bwa-Israyeli
51Lino Ahaziya mwana wa-Ahabu mwami wa-Israyeli wakatalika kweendelezya ku-Samariya mumwaka wakumi amusanu aibili wabwami bwa-Josafati mwami wa-Juda, nkabela wakeendelezya ba-Israyeli myaka yobile. 52#1 Bam 15:26Pele wakacita bubi mumeso aa-Jehova, weenda munzila yawisi amunzila yabanyina amunzila ya-Jeroboamu mwana wa-Nebati iwakacitya ba-Israyeli zibi. 53#Bab 2:11; 1 Bam 16:31Wakali kumanina Baala milimo akumukomba, aboobo wakakalazya Jehova Leza wa-Israyeli mbubonya mbwaakacita wisi.
Currently Selected:
1 Bami 22: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
