1 Bami 19

Eliya mbwaakacija Jezebeli

1 # 1 Bam 18:40 Lino Ahabu naakalwiida Jezebeli zyoonse Eliya nzyaakacitide, ambwaakajayide basinsimi boonse apanga, 2#Rut 1:17; 1 Bam 2:23; 20:10; 2 Bam 6:31; Tus 27:1jezebeli wakatuma mutumwa kuli-Eliya, wati, Leza andicitile mbubonya akwiinda, na ndabula kucita kuti buumi bwako ayebo bube mbuli buumi bwaumwi wabaaba, mbuli eno junza. 3Elyo naakamvwa, wakabuka, wacija lufu, lumwi wakasika ku-Beeriseba mucisi ca-Juda, elyo wakasia mulanda wakwe nkuko, 4#My 11:15; Jer 26:14-18; Joh 4:3-8; Flp 1:21-24pele walo mwini wakeenda lweendo lwabuzuba bomwe musokwe, wakasika, waakukala munsi lyakasamu, wakakumbila kuti afwe, Wakati, Cazulila, Kondinyanzya buumi bwangu, O Jehova, nkaambo nsili mubotu kwiinda bamatata. 5#Int 34:7; Inc 12:7; Heb 1:14Lino wakalala, woona mpawo ansi lyakasamu. Nkabela kwakasika angelo, wakamwaampa, wamwaambila kuti, Buka, ulye. 6Elyo naakalanga, wakabona kuti kufwaafwi kumutwe wakwe kakuli cibunge acinkuli camaanzi, Mpawo wakalya, wanywa, walala, woona. 7Nkabela angelo wa-Jehova wakaboola alwabili, wamwaampa, wati, Buka, ulye, nkaambo lweendo lwakukacila. 8#Kul 24:18; 34:28; Dt 9:9,18; Mt 4:2; Lk 4:2; Kul 3:1Elyo wakabuka, walya, wanywa, lino mukukuta kwazilyo ezyo nzizyonya wakeenda mazuba aali makumi one, isikati amasiku, mane kusikila ku-Horebu cilundu ca-Leza.

Leza mbwaakalibonya kuli-Eliya ku-Horebu

9 # Kul 33:21; Heb 11:38 Oko wakajana impangala akukala mulindilyo, Mpawo ijwi lya-Jehova lyakamusikila, lyakati, Ucitanzi okuno, Eliya? 10#Rom 11:3; Kul 20:5; My 20:5,11; Int 69:9; 119:139; 1 Bam 18:4,22; Mt 23:31-35Wakati, Ndasungwaalila Jehova Leza wamakamu abusungu bupati, nkaambo bana ba-Israyeli basowa cizuminano cako, bamwaya zipaililo zyako, bajaya basinsimi bako apanga, lino mebo ndasyaala endike, abwalo buumi bwangu balayandaula kubunyonyoona. 11#Kul 24:12; Ezk 1:4; 37:7Wakati, Koya, ukaime acilundu kubusyu bwa-Jehova. Elyo Jehova wakainda, nkabela muuwo uungisya wakapwaya zilundu akuvwinyauna mandomba kubusyu bwa-Jehova, pele Jehova takakali mumuuwo pe. Kusule lyamuuwo kwakasika muzuzumo wanyika, pele amwalo mumuzuzumo Jehova katamo. 12#My 14:18; Neh 9:17; Job 4:16; Int 86:15; 145:8; Jak 5:11Kusule lyamuzuzumo kwakasika mulilo, pele Jehova katamo mumulilo. Lino kusule lyamulilo kwakamvwigwa ijwi lyaluumuno wi. 13#Kul 3:6; Is 6:2Elyo Eliya naakamvwa, wakalivumba kubusyu acibaki cakwe, waya anze, waima kumulyango wampangala, Mpawo wakamvwa ijwi, lyakati, Ucitanzi okuno, Eliya? 14Wakati, Ndasungwaalila Jehova Leza wamakamu abusungu bupati, nkaambo bana ba-Israyeli basowa cizuminano cako, bamwaya zipaililo zyako, bajaya basinsimi bako apanga, lino mebo ndasyaala endike, abwalo buumi bwangu balayandaula kubunyonyoona. 15#2 Bam 8:12,13Lino Jehova wakamwaambila kuti, Koya, upiluke munzila iiya kunkanda ya-Damasko, Was ika buyo, nanika Hazaeli, abe mwami wa-Aramu, 16#2 Bam 9:1; Lk 4:27aJehu mwana wa-Nimsi komunanika abe mwami wa-Israyeli, alakwe Elisha mwana wa-Safati waku-Abelimehola komunanika kuti abe musinsimi mucimanga cako. 17#2 Bam 8:12; 9:14; 10:6; 13:3; Am 2:14; 2 Bam 2:23,24; Is 11:4; Hos 6:5; Ciy 19:21Lino kufumbwa muntu uucija ipanga lya-Hazaeli, Jehu ulamujaya, ayooyo uucija ipanga lya-Jehu, Elisha ulamujaya. 18#Is 1:9; Ezk 6:8; 14:22; Joel 2:32; Rom 11:4; Job 31:27; Hos 13:2Pele ndasyaazya mucisi ca-Israyeli bantu bali zyuulu zili musanu azibili, nkukuti mazwi oonse aatana kufugamina Baala, amilomo yoonse iitana kumumyonta.

Elisha mbwaakanjila mumilimo

19Lino wakazwa oko, wakaakujana Elisha mwana wa-Safati, uli mukulimya basune maamba aali ikumi aabili, ajamba lyakumi aabili walo mwini nguwakali kulilimya. Nkabela Eliya wakainda nkwaakabede, wamuvumbya cibaki cakwe. 20Mpawo wakasia basune, weza buzuzaana kuli-Eliya, wati, Ntaangune kulaya taata abama, elyo ndakutobela. Wakavuwa kuti, Koya, upiluke. Ndakucitilanzi? 21#2 Sam 24:22; Mt 4:18-22; Lk 5:27,28; Kul 24:13Lino wakapiluka, wabweza basune bobile mbaakali kulimya, wabajaya, wajika nyama azibelesyo zyaŋombe, waabila bantu kuti balye, Mpawo wakanyamuka, watobela Eliya, akumukutaukila.

Currently Selected:

1 Bami 19: Ibbaib63

Highlight

Copy