ROMANOS 5
5
Yembojupi rupi ñanoi vae
1Tumpa yandembojupi yandeporogüɨrovia vae rupi, ñanoi ma mbɨakatu jae ndive, yandeYa Jesucristo rupi; 2jare yandeporogüɨrovia rupi, yaike ma Tumpa ipɨakavi pe Jesucristo rupi; pɨpe ñanepɨ̈rata ma ñaï jare yayerovia reve ñaäro Tumpa iyemboetea. 3Jare mbaetɨ kuaeño, yayerovia vi yaiporara yave. Echa yaikuaa kërai yaiporara vae rupi, ñanoi mbɨaguasu; 4jare yandepɨaguasu yave, yaikuaa ñanepɨ̈rata ma ko vae. Jare yaikuaa yave ñanepɨ̈rata ma, ñaäro yayerovia reve. 5Jare jókuae ñaäro yayerovia reve vae, ngaraa yandembotavɨ. Echa Tumpa iporoaɨu oime ma yandepɨa Espíritu Santo oñemee yandeve vae rupi.
6Echa yande yandepuereä etei yayemboasa vaerä iara pe etei, Cristo omano iyoa vae reta re. 7Añetete, ngaraa ndipo kia oipota omano metei jupi vae jekovia pe. Ërei güɨramoi kia ikɨ̈reɨta omano metei ipɨakavi vae jekovia pe. 8Ërei Tumpa oechauka ma iporoaɨu yandekotɨ vae, yepe tëi yande ko jae iyoa vae reta, ërei Cristo omano yanderé. 9Vɨtei pa yayembojupi ma Jesucristo jugüɨ rupi yave, jae rupi yaasayepeta Tumpa iyarasɨ güi. 10Echa yepe tëi yande yayovaichose Tumpa ndive, ërei oyapo yembopɨakatu yandeve Taɨ imano rupi. Vɨtei pa yandembopɨakatu ma yave, yandemboasata Taɨ oikove ye vae rupi. 11Jare mbaetɨ kuaeño, yayerovia vi Tumpa re yandeYa Jesucristo rupi, echa Cristo rupi yamboresive yembopɨakatu.
Adán jare Cristo
12Jáeramo, mbaeyoa oike kuae ɨvɨ pe metei kuimbae rupi. Jare mano oike jókuae mbaeyoa rupi.#Gn 3.6-19. Jökorai mano ou opaete vae pe. Echa opaete vae iyoa. 13Ndei mborookuai oime mbove, mbaeyoa oimeño mai ɨvɨ pe. Ërei mbaetɨ mborookuaía pe, mbaetɨ kia oyemboeko mbaeyoa re. 14Ërei, mano güɨnoi mbaepuere Adán güive Moisés pe, yepe tëi jae reta mbaetɨ iyoa Adán oyapo rami etei.#Gn 2.16-17; 3.11-12. Jare Adán oyembojaanga ko outa vae re.
15Ërei Tumpa omee yandeve vae mbaetɨ omboyovake Adán oyapo vae. Echa jókuae metei vae iyoa vae rupi, jeta vae omano. Ërei Tumpa omee yandeve ipɨakavi jókuae metei rupi vae, tuicha yae ko kuae güi opaete vae peguarä vae, jae ko Jesucristo. 16Jókuae metei kuimbae iyoa mbaetɨ omboyovake, Tumpa omee yandeve vae. Echa jókuae metei mbaeyoa jeko pegua Tumpa ojäa opaete vae. Ërei jókuae Tumpa omee yandeve vae ou jeta mbaeyoa jeko pegua, yayembojupi vaerä. 17Echa mano güɨnoi mbaepuere opaete vae re metei kuimbae iyoa jeko pegua, ërei omboresive ipɨakavi jare oyembojupiuka vae reta oasa ete yeta güɨnoi mbaepuere tekove pɨau pe Jesucristo rupi.
18Jáeramo metei vae iyoa jeko pegua Tumpa ojäa opaete vae. Jaeramiño vi metei vae jupi vae oyapo vae jeko pegua Tumpa ombojupi opaete vae tekove opambae vae peguarä. 19Metei kuimbae mbaetɨ oyapo Tumpa jei vae jeko pegua, opaete vae iyoa ma. Jökoraiño vi metei kuimbae oyapo Tumpa jei vae jeko pegua, Tumpa ombojupita jeta vae.
20Echa mborookuai oyeapo, mbaeyoa omboyekuaa kavi yae vaerä. Ërei mbaeyoa reta jeta yae oyekuaa yave, oasa ete ye Tumpa ipɨakavi. 21Mbaeyoa güɨnoi mbaepuere opaete vae re mano peguarä, jökorai Tumpa ipɨakavi güɨnoi mbaepuere yanderé yandembojupi vaerä, tekove opambae vae peguarä yandeYa Jesucristo rupi.
Currently Selected:
ROMANOS 5: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
