SAN MARCOS 12

Ko iporúa ipɨapochɨ vae reta

(Mt 21.33-46; Lc 20.9-19)

1Jayave Jesús omboɨpɨ imiari chupe reta ombojaanga reve: “Metei kuimbae oikëse ikorä jare oñotɨ pɨpe jeta uva,#Is 5.1-2. oyapo vi uva oñetɨami pɨpe vaerä. Oyapo vi metei oɨvate omae vaerä joko güi opaete kó re. Javoi oiporuka iko ïru vae reta pe, jare ojo mombɨrɨ. 2Jare uva yagüɨye ma yave, uvarupa iya ombou metei jembiokuai kó iporúa reta pe, jae güɨraja vaerä tëi uva omboyaogüe chupe. 3Ërei jae reta oipɨɨ oinupa uvarupa iya jembiokuai, jare omondo ye ipogüɨraiño. 4Jayave uvarupa iya ombou ye ïru jembiokuai. Ërei kó iporúa reta oyapi ita pe ombopere iñäka rupi, jare ikaviä etei omondo ye. 5Jayave uvarupa iya jekuae ombou ye ïru jembiokuai. Ërei kó iporúa reta oyuka kuae. Jare jökorai oyapo reta jeta ïru kó iya jembiokuai reta pe, oinupa reta amogüe jare oyuka ïru vae.

6Taɨkue ete ombou taɨ oaɨu yae vae, ko iporúa reta pe. Uvarupa iya jei reve iyeupe: ‘Omboete retata ko cheraɨ.’ 7Ërei kó iporúa reta jei oyoupe: ‘Kuae ko jae iyarä vae. Peyu yayuka, jare kó topɨta yandembaerä.’ 8Jayave jae reta oipɨɨ uvarupa iya taɨ, jare oyuka omombo kó güi ikatu pe. 9¿Mbae ra oyapota uvarupa iya? Outa, opa oyuka vaerä jókuae kó iporúa reta, jare oiporukata iuvarupa ambuae vae reta pe. 10¿Mbaetɨ pa pemongeta Tumpa Iñee pe oyekuatía oï vae?:

‘O iyapoa reta güɨröɨro ita vae,

ou opɨta o ekina iguapɨkarä.

11YandeYa ko oyapo kuae,

yaecha ma, jare ñanemopɨakañɨ.’ ”#Sal 118.22-23.

12Jayave jókuae oyeapɨsaka jese vae reta oipota tëi oipɨɨ Jesús. Echa oikuaa reta, jókuae ombojaanga reve jei vae ikotɨ reta ko jei. Ërei okɨɨye reta tëta guasu pegua reta güi. Jáeramo oeyaño, jare yogüɨraja.

¿Jupi pa yamboepɨ vaerä César pe?

(Mt 22.15-22; Lc 20.20-26)

13Jayave jae reta ombou amogüe fariseo reta jare herodiano reta,#12.13 Emae Glosario pe. oyavɨuka vaerä chupe iñee rupi aeño. 14Jare yogüeru oväe yave, jei Jesús pe:

—Oporomboe vae, roikuaa nde rere vae añete ko. Nde mbaetɨ reipoɨu kia güi ave, echa nde mbaetɨ remae kuimbae jova reño. Nde reporomboe kavi Tumpa jemimbota re. ¿César okovara vae jupi pa yamboepɨ vaerä?, ani ¿mbaetɨ pa? ¿Yamboepɨta pa chupe?, ani ¿mbaetɨta pa?

15Ërei Jesús oikuaa jae reta oipota ko ombotavɨ ramo, jei chupe reta:

—¿Maera pa peipota peyavɨuka cheve? Peru taecha metei korepoti reare.

16Jae reta güeru chupe. Jayave Jesús oparandu chupe reta:

—¿Kia iä pa kuae?, jare ¿kia jee pa kuae oyekuatía oï jese vae?

Jae reta jei chupe:

—César iä ko.

17Jayave Jesús jei chupe reta:

—Pemee César pe César imbae, jare pemee Tumpa pe Tumpa imbae.

Jare jae reta ipɨakañɨ jese.

Mbarandu oikove ye vae regua

(Mt 22.23-33; Lc 20.27-40)

18Jayave yogüeru vi Jesús oïa pe amogüe saduceo reta. Jókuae reta mbaetɨ güɨrovia omanogüe reta oikove ye ko vae re.#Hch 23.8. Oparandu reta Jesús pe, jei reve:

19—Oporomboe vae, Moisés oikuatía oeya oreve, kia omano yave imichiambae, tɨvɨ togüɨreko tɨkeɨ amɨri jembirekogüe, jare jókuae kuña imembɨ rupi, tɨkeɨ amɨri oime vaerä iñemuña.#Dt 25.5. 20Oiko metei kuimbae ova tɨvɨ reta güɨnoi vae. Jókuae tenondegua omenda jare omano imichiambae. 21Jare tɨvɨ mokoía omenda tɨkeɨ amiri jembirekogüe ndive, ërei omano vi imichiambae reve. Jökoraiño vi tɨvɨ mboapɨa. 22Opaete chiu reve omenda jókuae kuña ndive, jare opa reve omano reta imichiambae. Taɨkue rupi jókuae kuña omano vi. 23Jayave omanogüe vae reta oikove ye yave, ¿kia nunga vae jembirekorä pa oikota jókuae kuña? Echa opaete chiu reve omenda jae ndive.

24Ërei Jesús jei chupe reta:

—Peyavɨ ko. Echa mbaetɨ peikuaa kavi Tumpa Iñee jare Tumpa imbaepuere. 25Echa omanogüe reta oikove reta ye yave, ngaraa ma omenda reta ani oyomomenda reta. Echa araɨgua reta ramita ko. 26Omanogüe reta oikove yeta vae regua ¿mbaetɨ pa pemongeta Moisés oikuatiagüe pe?, kërai Tumpa jei Moisés pe jókuae yai jendɨ vae güi: “Che ko jae, Abraham, Isaac jare Jacob iTumpa.”#Ex 3.6. 27Tumpa mbaetɨ ko omanogüe vae reta iTumpa. Jae ko oikove vae reta iTumpa. Jayave tuicha ko peyavɨ.

Mborookuai tuichagüe vae

(Mt 22.34-40)

28Oyakatu vi Jesús re metei mborookuai re oporomboe vae. Jae oendu oyoaka vae, jare oikuaa Jesús omombeu kavi chupe reta iparandu. Jayave jae oparandu Jesús pe:

—¿Mbae nunga mborookuai pa ko jae tenondegua ete?

29Jesús jei chupe:

—Mborookuai tenondegua ete jae ko kuae: “Israel, eyeapɨsaka. YandeYa Tumpa, jaeño ko Tumpa. 30Eaɨu ndeYa Tumpa opaete ndepɨa reve, opaete nderekove ndive, opaete ndeyemongeta ndive jare opaete nepɨ̈rata ndive. Kuae ko jae mborookuai tenondegua ete.”#Dt 6.4-5. 31Jare mokoía jökorai etei vi: “Eaɨu nderapicha nde reyeaɨu rami.” Mbaetɨ ïru mborookuai tuichagüe kuae reta güi vae.#Lv 19.18.

32Jayave mborookuai re oporomboe vae jei Jesús pe:

—Añete ko, oporomboe vae. Ikavi rere Tumpa meteiño ko jare mbaetɨ yé ïru.#Dt 4.35. 33Jare yaaɨu yave Tumpa opaete yandepɨa ndive, opaete yanderekove ndive, opaete yandeyemongeta ndive jare opaete ñanepɨ̈rata ndive, jare yaaɨu yave yanderapicha yande yayeaɨu rami, jókuae ikavi opaete mɨmba oyeyuka opaetei oyeapɨ vae jare ïru mɨmba reta oyeyuka Tumpa pe oñemee vae güi.#Os 6.6.

34Jare Jesús oendu yave jei arakuaa rupi kavi, jei chupe:

—Köi yae reiko tëi Tumpa iporookuaía güi.

Jare mbaetɨ ma kia oipota oparandu chupe mbae re.#Lc 10.25-28.

¿Kia iñemuña reta pegua pa ko Cristo?

(Mt 22.41-46; Lc 20.41-44)

35Jare Jesús oporomboe oï tupao pe, jei:

—¿Maera pa jei mborookuai re oporomboe vae reta Cristo ko jae David iñemuña pegua? 36Echa David etei jei Espíritu Santo rupi körai:

“YandeYa jei cheYa pe:

Eguapɨ cheakatu kotɨ,

nderovaicho reta opa regua añono ndepɨ igüɨ pe.”#Sal 110.1.

37David etei “CheYa” jei chupe. ¿Kërai pa ipuere oiko David iñemuñarä?

Jare jeta vae oyeapɨsaka ñogüɨnoi Jesús re ikɨ̈reɨ ngatu reve.

Jesús omboeko mborookuai re oporomboe vae reta

(Mt 23.1-36; Lc 11.37-54; 20.45-47)

38Jare Jesús iporomboe rupi, jei chupe reta: “Peyeandu mborookuai re oporomboe vae reta güi. Echa jae reta omomora oguata jemimonde puku reve, jare omomora ïru vae reta oyapo vaerä chupe reta maraetei oka guasu rupi, 39omomora reta judío reta itupao pe jare mbareaa pe, tenonde oguapɨ vaerä. 40Jare jae reta opɨ̈ro imemano vae reta güi opaete imbaembae, jare oyereroviauka vaerä puku oyerure reta Tumpa pe añetegüe nunga. Jáeramo Tumpa oiporarauka yaeta chupe reta.”

Imemano vae omee korepoti Tumpa pe vae regua

(Lc 21.1-4)

41Metei ara Jesús oguapɨ oï korepoti jɨru jóvai tupao pe, jare oecha kërai jeta yogüeru vae reta oñono korepoti pɨpe. Jare oikokatu vae reta oñono jeta rupi korepoti. 42Jare ou vi metei imemano vae paravete vae. Jae oñono mókoi reare. Jókuae michi yae jepɨ vae. 43Jare Jesús oenɨi jemimboe reta jare jei chupe reta:

—Añete che jae peve, kuae imemano vae paravete vae oñono jeta opaete ïru oñono vae reta güi. 44Echa opaete ïru reta güeru oñono jembɨre chupegüe. Ërei kuae kuña, yepe tëi iparavete, oñono opaete güɨnoi vae. Jókuae jembíu jepɨrä tëi vae.

Currently Selected:

SAN MARCOS 12: GUABD

Highlight

Copy