SAN MARCOS 11

Jesús oike Jerusalén pe

(Mt 21.1-11; Lc 19.28-40; Jn 12.12-19)

1Jesús jare jemimboe reta köiño ma Jerusalén güi ñogüɨnoi yave, tëta raɨ reta Betfagé jare Betania iyɨpɨ pe, ɨvɨtɨ Olivo jóvai. Jayave omondo mókoi jemimboe reta, 2jei reve chupe reta:

—Pekua pea tëta raɨ yanderóvai oïa pe. Peo peväe yave, peväeta metei mburika kuimbae taɨrusu oñeapɨti oï vae. Ndei ave etei oyepo jese vae, peyora peru. 3Jare oime yave kia jei peve: ¿Maera pa kuae peyapo?, pere chupe: OreYa oipota oiporu, ërei ɨmambae güeruruka yeta kuae pe.

4Jayave Jesús jemimboe reta yogüɨraja, jare oväe mburika kuimbae taɨrusu vae, oñeapɨti oï tape pe öke jóvai. Jayave jae reta oyora.

5Jare amogüe joko pe ñogüɨnoi vae jei Jesús jemimboe reta pe:

—¿Maera pa peyora peï mburika kuimbae taɨrusu vae?

6Jayave Jesús jemimboe reta jei chupe reta jae oyókuai reta rami. Javoi omaeño güɨraja reta. 7Jayave güeru mburika kuimbae taɨrusu vae Jesús oïa pe. Jare Jesús jemimboe reta oñono iñeapevaka mburika ikupe re, jare Jesús opo jese. 8Jare jeta vae reta oipɨso vi iñeapevaka tape rupi, jare ïru vae reta oyasɨa ñana-rokɨ jare oñono tape rupi. 9Jare Jesús jenonde yogüɨraja vae reta jare jaɨkue yogüɨraja vae reta osapúkai reve jei reta:

—¡Hosanna! ¡Toyemboeteuka yandeYa jee re ou vae!#Sal 118.25-26. 10Toyemboeteuka ñaneñemuñagüe David iporookuaía ou oväe vae. ¡Hosanna! ¡Toyemboete ara pe!

11Jare Jesús ojo oväe Jerusalén pe, jare oike tupao pe, omae opaete mbaembae re jare kaaruasɨ ma yave, ojo Betania pe jókuae doce jemimboe reta ndive.

Ɨva iambae vae

(Mt 21.18-19)

12Pɨareve pe, yogüɨraja ye Betania güi yave, Jesús iyɨmbɨaɨ. 13Jare mombɨrɨ güi oecha metei ɨva jokɨ katu vae, jare ojo omae jese oime ra ia. Ërei mbaetɨ oväe ia jese, joo katuaiño. Echa ndei oväe ɨva ia vaerä. 14Jayave Jesús jei ɨva pe:

—Ngaraa ye ma kia jou ndeía.

Jare jemimboe reta oendu.

Jesús oitɨo tupao

(Mt 21.12-17; Lc 19.45-48; Jn 2.13-22)

15Jare yogüɨraja oväe Jerusalén pe. Jayave Jesús oike tupao pe, jare omboɨpɨ omoë omombo joko güi omaemee vae reta jare ombaegua vae reta, jare omboyapara korepoti oipoepɨ vae reta imesa reta jare pɨkasu reta omee vae reta jenda reta. 16Jare mbaetɨ omaeño kia re oguata vaerä ivoɨta reve tupao rupi. 17Jare jei joko pe ñogüɨnoi vae reta pe:

—Tumpa Iñee pe oyekuatía oï körai: “Chero oyembojeeta o yerure pegua opaete ɨvɨ pegua reta#Is 56.7. peguarä.” Ërei pe reta peyapo ma imonda vae reta iñemía rami.#Jer 7.11.

18Jayave mborookuai re oporomboe vae reta jare sacerdote reta itenondegua reta kuae oendu yave, oeka reta kërai oyuka vaerä Jesús. Echa jae reta okɨɨye chugüi, opaete vae ipɨakañɨ iporomboe re ramo. 19Jare pɨ̈tu ma yave, Jesús jare jemimboe reta yogüɨraja ye Jerusalén güi.

Ɨva yɨpi vae

(Mt 21.20-22)

20Ndeimbove yave oasa ye ɨva oïa rupi yave, oecha reta opa yɨpi iyɨpɨ güive. 21Jayave Pedro imaendúa jese, jare jei Jesús pe:

—¡Mase, oporomboe vae! Ɨva reyepopeyu jese vae, opa yɨpi.

22Jesús jei jemimboe reta pe:

—Perovia Tumpa re. 23Añete che jae peve, kia jei yave kuae ɨvɨtɨ pe: “Esɨrɨ kuae güi, ea ɨguasu pe”, güɨrovia reve ipɨa pe vae pe, oyeapota ko. Oipotagüe mbae jei vae oyeapota ko chupe.#Mt 17.20; 1 Co 13.2. 24Jáeramo che jae peve, oime yave mbae re peyerure Tumpa pe perovia reve vae, oñemeeta ko peve, penoita ko. 25Jare peyerure peï Tumpa pe yave, peɨ̈ro ïru vae pe, oime yave maratu, peRu ara pe oï vae iñɨ̈ro vaerä vi peve peyoa reta re.#Mt 6.14-15. 26Ërei mbaetɨ peɨ̈ro yave, peRu ara pe oï vae ngaraa vi iñɨ̈ro peve peyoa reta re.

Jesús imbaepuere

(Mt 21.23-27; Lc 20.1-8)

27Jesús jare jemimboe reta yogüɨraja oväe ye Jerusalén pe. Jare oguata ramboeve tupao rupi, yogüeru jae oïa pe sacerdote reta itenondegua reta, mborookuai re oporomboe vae reta, jare tëta guasu pegua reta itenondegua reta. 28Jae reta oparandu chupe:

—¿Mbae nunga mbaepuere ndive pa kuae mbaembae reyapo? ¿Kia pa omee ndeve mbaepuere kuae mbaembae reyapo vaerä?

29Jayave Jesús jei chupe reta:

—Che vi taparandu peve mbae re. Pemombeu yave cheve, che vi amombeuta peve mbae nunga mbaepuere ndive ko ayapo kuae mbaembae. 30¿Kia pa ombou Juan oporombobautisa vaerä? ¿Tumpa pa ombou?, ani ¿kuimbae reta pa ombou? Pemombeu cheve.

31Jayave jae reta oyoaka oyoupii jei reve:

—Yae yave: “Tumpa ko ombou”, jae jeita yandeve: “¿Maera pa mbaetɨ perovia?” 32Ani yae yave: “Kuimbae reta ko ombou…” Ërei jae reta okɨɨye tëta guasu pegua reta güi. Echa opaete vae güɨrovia Juan jae ko añetete ñeemombeúa. 33Jáeramo jei reta Jesús pe:

—Mbaetɨ roikuaa.

Jesús jei vi chupe reta:

—Che vi ngaraa amombeu peve mbae nunga mbaepuere ndive ko ayapo kuae mbaembae reta vae.

Currently Selected:

SAN MARCOS 11: GUABD

Highlight

Copy