SAN LUCAS 21

Imemano vae omee korepoti Tumpa pe vae regua

(Mc 12.41-44)

1Jare Jesús omopüa iñäka yave, oecha oikokatu vae reta oñono ñogüɨnoi ikorepoti korepoti jɨru pe. 2Jare oecha vi metei imemano vae paravete yae vae oñono mókoi reare korepoti jɨru pe. 3Jayave Jesús jei:

—Añete che jae peve, kuae imemano vae paravete vae oñono jeta opaete ïru reta güi. 4Echa opaete ïru reta güeru Tumpa peguarä jembɨre chupegüe. Ërei kuae kuña, yepe tëi paravete, oñono opaete güɨnoi vae. Jókuae ko jembíu jepɨrä tëi vae.

Tumpa jo oyemboaita vae regua

(Mt 24.1-2; Mc 13.1-2)

5Jare amogüe vae imiari ñogüɨnoi tupao re, kërai oñemopöra yae ko ita reta ipöragüe pe, jare mbota reta pe. Jayave Jesús jei:

6—Oväeta ara kuae opaete añave peecha vae opa vaerä oyemboai. Ngaraa opɨta metei ave ita ïru ita iárambo.

Kañɨmaa reta kañɨtei regua

(Mt 24.3-28; Mc 13.3-23)

7Jayave Jesús jemimboe reta oparandu chupe:

—Oporomboe vae, ¿kërai yave pa kuae oyeapota? Jare opaete kuae oyeapota ma yave, ¿këraita pa roikuaa?

8Jayave Jesús jei chupe reta: “Peyeandu, agüɨye vaerä petavɨ. Echa yogüeruta jeta cheree re jei reve: ‘Che ko jae Cristo.’ ‘Ou ma ara oväe.’ Ërei agüɨye pekua jupíe. 9Peendu ñeraro reta jare mburuvicha re oñemopüa vae yave, agüɨye pekɨɨye. Kuae susere reta oime ñotai ko tenonde. Ërei ngatu ndei vɨteri ko oväe kañɨtei.

10Opüata oyoe tëtaguasu ïru tëtaguasu ndive, jare mborookuaía ïru mborookuaía ndive. 11Oimeta ɨvɨkana tuichagüe. Oimeta karuai reta jare mbaerasɨ reta oipota rupi; oimeta kɨɨye jare mbaembae yavaetegüe oyekuaa ara re.

12Ërei ndei kuaekuae reta oasa mbove, ïru vae reta pepɨɨta jare oyapota ikavimbae vae peve, pereraja retata itupao reta pe jare peñonota tembipɨɨrɨru pe, jare pererajata mburuvicha guasu reta jare ïru mburuvicha reta jóvai chereko pegua. 13Ërei jókuae rupi jëguata peve pemombeu vaerä cheregua. 14Agüɨye pepɨa pe peyemongeta voi mbae ra pereta peyeepɨ vaerä. 15Echa che ameeta peve ñee jare arakuaa, metei ave perovaicho reta mbaetɨta ipuere peré#Lc 12.11-12. ani peaka. 16Jare peru reta, perɨkeɨ reta ani perɨvɨ reta, perëtara reta jare pevɨa-ïru reta pemeeta perovaicho reta pe, jare amogüe pegüi reta peyeyukaukata ko. 17Jare opaete vae peñemotareɨta chereko pegua. 18Ërei ngaraa metei ave pea okañɨtei. 19Jare pepɨaguasu rupi peyemboasaukata ko.

20Jare peecha jeta sundaro reta Jerusalén oñova yave, peikuaata ou ma ko oväe Jerusalén oyemboai vaerä. 21Jayave Judea pegua reta totekuarai ɨvɨtɨ guasu kotɨ. Jare Jerusalén pe ñogüɨnoi vae reta toë totekuarai joko güi. Jare iko pe ñogüɨnoi vae agüɨye toyerova Jerusalén pe. 22Echa jókuae ara reta pe ɨvɨ pegua reta oiporara yaeta,#Os 9.6. jeko ae re, opaete Tumpa Iñee pe oyekuatía oï vae oyembopo vaerä. 23¡Paravete!, oiporara yaeta jókuae ara reta pe ipurúa vae reta jare imembɨ ndei raɨ vae reta. Echa oimeta susere tuichagüe kuae ɨvɨ pe jare oiporara yaeta ko. 24Jare oimeta oyeyukauka kɨsepuku pe vae. Jare oyererajata tembiokuairä opaete tëtaguasu reta rupi, jare judiombae vae reta omboaita Jerusalén, jae reta iara opa regua.”

Kuimbaerä oyeapo vae ou yeta vae regua

(Mt 24.29-44; Mc 13.24-37)

25“Jayave oimeta oyekuaa mbae kuaraɨ re, yasɨ re jare yasɨtata reta re.#Is 13.10; Ez 32.7; Jl 2.31; Ap 6.12-13. Jare tëtaguasu reta oiporarata, ɨguasu reta jɨapu jare ɨaparúa reta jeko pegua. 26Jare ɨvɨ pegua reta ipɨa jëogüeta okɨɨye güi, ɨvɨ pe mbae oasa vae güi. Jare opaete ara rupi ñogüɨnoi vae reta okanata. 27Jayave ɨvɨ pegua reta chereechata ayu amapɨtu re.#Dn 7.13; Ap 1.7. Che Kuimbaerä ayeapo vae chembaepuere yae reve jare cheyemboetea reve. 28Jare opaete kuae mbaembae omboɨpɨ oasa yave, peñemoäta ngatu. Echa köi yae ma Tumpa pereepɨ vaerä.”

29Jayave Jesús jei vi chupe reta ombojaanga reve: “Pemae ɨva jare opaete ɨvɨra reta re. 30Oyemboɨpɨ ma jokɨ yave, peikuaa ko oyearo ma ama iara. 31Jaeramiño vi pe reta peecha yave kuae mbaembae oasa yave, peikuaata köiño ma ko ou Tumpa iporookuaía.

32Añete che jae peve, kuae ɨvɨ pe añave yogüɨreko vae reta, ngaraa opa omano ndei opaete kuae mbaembae oasa mbove. 33Ara jare ɨvɨ opata ko, ërei cheñee ngaraa opa.

34Peyeandu, agüɨye vaerä pekaru reteiño jare pesavaɨpo, jare agüɨye vaerä peyemoambaeko mbaembae ɨvɨ pegua re. Agüɨye vaerä peparanoe ou oväe peve jókuae ara ikavimbae. 35Echa jókuae ara oipokouta opaete ɨvɨ pegua reta, ñuai oporomboa rami. 36Jáeramo peyeandu, jare peyerure avei ara ñavo Tumpa iporoaɨu rupi peasayepe vaerä opaete kuae mbaembae outa vae güi, peyemboɨ vaerä che Kuimbaerä oyeapo vae jóvai.”

37Jare opa ara rupi Jesús oporomboe tupao pe.#Lc 19.47. Ërei pɨ̈tu ma yave ojo joko güi opɨta ɨvɨtɨ Olivo pe. 38Jare opaete vae reta yogüeru ndeimbove ñavo tupao pe oyeapɨsaka vaerä Jesús re.

Currently Selected:

SAN LUCAS 21: GUABD

Highlight

Copy