SAN LUCAS 20

Jesús imbaepuere

(Mt 21.23-27; Mc 11.27-33)

1Jare metei ara Jesús oporomboe oï tupao pe, jare omombeu joko pe ñogüɨnoi vae reta pe ñee ikavi vae. Jayave yogüeru vi joko pe sacerdote reta itenondegua reta jare mborookuai re oporomboe vae reta jare tëta guasu pegua reta itenondegua reta ndive. 2Jayave jae reta jei Jesús pe:

—Emombeu oreve, ¿mbae nunga mbaepuere ndive pa kuae mbaembae reyapo?, ani ¿kia pa omee ndeve kuae mbaepuere?

3Jayave Jesús jei chupe reta:

—Che vi taparandu peve mbae re. Pemombeu cheve: 4¿Kia pa ombou Juan oporombobautisa vaerä? ¿Tumpa pa ombou?, ani ¿ɨvɨ pegua reta pa ombou?

5Jayave jae reta oyoaka oyoupii jei reve: “Yae yave: ‘Tumpa ko ombou’, jae jeita yandeve: ‘¿Maera pa mbaetɨ perovia?’ 6Ani yae yave: ‘Ɨvɨ pegua reta ko ombou’, opaete vae reta yandeapita ita pe yandeyuka. Echa jae reta güɨrovia Juan ko jae metei ñeemombeúa.”

7Jáeramo jei reta Jesús pe, mbaetɨ oikuaa reta kia ra ombou vae.

8Jayave Jesús jei chupe reta:

—Che vi ngaraa amombeu peve mbae nunga mbaepuere ndive ko ayapo kuae mbaembae reta vae.

Ko iporúa ipɨapochɨ vae reta

(Mt 21.33-44; Mc 12.1-11)

9Jayave Jesús omboɨpɨ imiari opaete vae reta pe ombojaanga reve: “Metei kuimbae oñotɨ jeta uva.#Is 5.1. Javoi oiporuka iko ïru vae reta pe, jare ojo mombɨrɨ ɨma pegua. 10Jare uva yagüɨye ma yave, uvarupa iya ombou metei jembiokuai kó iporúa reta pe, jae reta omee vaerä tëi uva chupe. Ërei kó iporúa reta oinupa kó iya jembiokuai, jare omondo ye ipogüɨraiño. 11Jayave uvarupa iya ombou ye ïru jembiokuai. Ërei kó iporúa reta oinupa jare oyapo ikavimbae vae chupe, jare omondo ye ipogüɨraiño. 12Jayave uvarupa iya ombou ye jembiokuai mboapɨa ma. Ërei kó iporúa reta ombopere jare güɨnoe reta omombo kó güi ikatu pe.

13Jayave uvarupa iya jei iyeupe: ‘¿Mbae ra ayapota? Tamondo cheraɨ aaɨu yae vae. Güɨramoi oecha reta yave oipoɨuta chugüi.’ 14Ërei kó iporúa reta oecha yave kó iya taɨ, oyoaka reta oyoupii jei reve: ‘Kuae kó jae iyarä vae. Peyu yayuka, jare yande yaikota kó iyarä.’ 15Jayave jae reta güɨnoe omombo uvarupa güi ikatu pe, jare oyuka.

Jáeramo ¿mbae ra oyapota uvarupa iya jókuae kó iporúa reta pe? 16Outa, opa oyuka vaerä jókuae kó iporúa reta, jare oiporukata iuvarupa ambuae vae reta pe.”

Kuae oendu reta yave, jei reta:

—Tumpa tiyandereepɨ.

17Jayave Jesús omae ngatu jese reta jare jei:

—¿Mbae pa oipota jei Tumpa Iñee pe oyekuatía oï vae:

“O iyapoa reta güɨröɨro ita vae,

ou opɨta o ekina iguapɨkarä”?#Sal 118.22.

18Oime kia nunga vae jókuae ita re ipɨ̈sa-yeyuka yave, oñemopëta ko. Jare kia re jókuae ita oa yave, opata omonguruvi.

19Jayave jupivei sacerdote reta itenondegua reta jare mborookuai re oporomboe vae reta oipota tëi oipɨɨ Jesús. Echa oikuaa jókuae ombojaanga reve jei vae ikotɨ reta ko jei. Ërei okɨɨye tëta guasu pegua reta güi.

¿Jupi pa yamboepɨ vaerä César pe?

(Mt 22.15-22; Mc 12.13-17)

20Jare oipïaro reta Jesús. Jáeramo omondo vi ïru vae reta oipïaro vaerä Jesús; jae reta oyeapo jupi vae rami oyavɨuka vaerä chupe iñee rupi aeño, ipuere vaerä omboeterenga mburuvicha ipo pe. 21Jayave jae reta jei Jesús pe:

—Oporomboe vae, roikuaa nde rere jare reporomboe vae añete ko. Nde mbaetɨ remboyoavɨ metei ave ïru vae güi. Nde reporomboe jupi rupi kavi Tumpa jemimbota re. 22¿Jupi pa yamboepɨ vaerä César okovara vae?, ani ¿mbaetɨ pa?

23Ërei Jesús oikuaa jae reta ipoki reve oeka kërai ombotavɨ vaerä ramo, jei chupe reta:

—¿Maera pa peipota peyavɨuka cheve? 24Peechauka cheve metei korepoti reare. ¿Kia iä pa kuae?, jare ¿kia jee pa kuae oyekuatía oï jese vae?

Jae reta jei chupe:

—César iä ko.

25Jayave Jesús jei chupe reta:

—Pemee César pe César imbae, jare pemee Tumpa pe Tumpa imbae.

26Jare jae reta mbaetɨ ipuere omboeko Jesús mbae jei vae rupi, jeta vae reta jóvai. Jaeño ipɨakañɨ reta Jesús jei chupe reta vae re, jare kïrii reta.

Mbarandu oikove ye vae regua

(Mt 22.23-33; Mc 12.18-27)

27Jayave yogüeru Jesús oïa pe amogüe saduceo reta. Kuae reta mbaetɨ güɨrovia oikove ye ko omanogüe reta vae,#Hch 23.8. jei reta Jesús pe:

28—Oporomboe vae, Moisés oikuatía oreve körai: Kia omano yave imichiambae, tɨvɨ togüɨreko tɨkeɨ amɨri jembirekogüe, jare jókuae kuña imembɨ rupi, tɨkeɨ amɨri oime vaerä iñemuña.#Dt 25.5. 29Oiko metei kuimbae ova tɨvɨ reta güɨnoi vae. Jókuae tenondegua omenda, jare omano imichiambae. 30Jare tɨvɨ mokoía omenda tɨkeɨ amɨri jembirekogüe ndive, ërei omano vi imichiambae reve. 31Jökoraiño vi tɨvɨ mboapɨa. Jare opaete chiu reve omenda jókuae kuña ndive, jare opa reve omano reta imichiambae. 32Taɨkue ete jókuae kuña omano vi. 33Jayave omanogüe reta oikove ye yave, ¿kia nunga vae jembirekorä pa oikota jókuae kuña? Echa opaete chiu reve omenda jae ndive.

34Jayave Jesús jei chupe reta:

—Ɨvɨ pegua reta omenda jare oyomomenda reta; 35ërei Tumpa omoingove ye amogüe reta ipɨte güi vae reta, ngaraa omenda reta ani oyomomenda reta. 36Ngaraa ye ma omano reta. Echa araɨgua reta ramita ko. Jae ko Tumpa taɨ reta. Echa Tumpa omoingovegüe reta ko. 37Omanogüe reta oikove yeta vae regua, Moisés oikuaauka vi jókuae yai jendɨ vae regua oikuatía vae rupi. Echa jei, yandeYa jae ko Abraham, Isaac jare Jacob iTumpa.#Ex 3.6. 38Echa Tumpa mbaetɨ ko omanogüe vae reta iTumpa. Jae ko oikove vae reta iTumpa, echa chupeguarä opaete vae oikove ko ñogüɨnoi.

39Jayave amogüe mborookuai re oporomboe vae reta jei Jesús pe:

—Oporomboe vae, jaekavi yae rere.

40Jare mbaetɨ ye ma ikɨ̈reɨ oparandu reta mbae re chupe.

¿Kia iñemuña reta pegua pa ko Cristo?

(Mt 22.41-46; Mc 12.35-37)

41Jayave Jesús oparandu joko pe ñogüɨnoi vae reta pe:

—¿Maera pa jei reta Cristo ko jae David iñemuña pegua? 42Echa David etei jei tembikuatía Salmo reta pe körai:

“YandeYa jei cheYa pe:

Eguapɨ cheakatu kotɨ,

43nderovaicho reta opa regua añono ndepɨ igüɨ pe.”#Sal 110.1.

44David etei jei yave chupe “cheYa”, ¿kërai pa ipuere oiko David iñemuñarä?

Jesús omboeko mborookuai re oporomboe vae reta

(Mt 23.1-36; Mc 12.38-40; Lc 11.37-54)

45Jayave Jesús jei jemimboe reta pe opaete vae reta jovake: 46“Peyeandu, mborookuai re oporomboe vae reta güi. Echa jae reta omomora oguata jemimonde puku reve, jare omomora ïru vae reta oyapo vaerä chupe reta maraetei oka guasu rupi, omomora reta judío reta itupao pe jare mbareaa pe tenonde oguapɨ vaerä. 47Jare jae reta opɨ̈ro imemano vae reta güi opaete imbaembae, jare oyereroviauka vaerä puku oyerure reta Tumpa pe añetegüe nunga. Jáeramo oiporara yae retata ko.”

Currently Selected:

SAN LUCAS 20: GUABD

Highlight

Copy