GÉNESIS 44

José ikopa

1José oyókuai imbaembae iyangarekoa, jei reve:

—Kuae kuimbae reta ivoɨtarɨru emotɨnɨe tembíu pe, ipuereta güɨraja rupi, jare eñono ikorepoti reta ivoɨtarɨru iyuru ñavo pe. 2Reñonota chekopa korepoti pegua taɨkuegua ete ivoɨtarɨru iyuru pe, jare vi ikorepoti trigo jepɨrä tëi vae.

Jókuae tembiokuai oyapo José jei chupe rami. 3Köe ma yave opa omoë omondo imburika reta ndive. 4Jare tëta guasu güi ndeiño mombɨrɨ yogüɨraja mbove, José jei imbaembae iyangarekoa pe:

—Epüa jare eaɨkuemoña jókuae kuimbae reta jare reupitɨ yave ere chupe reta: “¿Maera pa pemboekovia ikavimbae vae pe, mbae ikavi ayapo peve vae? ¿Maera pa peñomi chekopa korepoti pegua? 5Echa cheya pɨpe ko oɨu, jare pɨpe vi oikuaa mbaembae outa vae. ¡Mbaetɨ ko ikavi kuae peyapo vae!”

6Jókuae ñee jei chupe reta ojo oupitɨ yave. 7Jare jae reta jei:

—¿Maera pa oreya jei oreve kuae reta? ¡Ore nderembiokuai reta ngaraai royapo kuae nunga! 8Mase, jókuae korepoti roväe orevoɨtarɨru iyuru pe vae, rogüeru ye ndeve mombɨrɨ oreɨvɨ Canaán güi; ¿këraiägua pa roñomita ndeya jo güi korepoti ani oro? 9Ërei kia nunga vae re oñeväe yave jókuae kopa, ¡tomano! jare ore reta ave toroiko oreya jembiokuairä. 10Jare jókuae tembiokuai jei:

—Toyeapo pe reta pere rami; ërei jókuae oñeväe kopa jese vae toiko cherembiokuairä; jare ïru reta mbaetɨta jeko. 11Jayave jae reta jaɨai ombogüeyɨ reta ivoɨta ɨvɨ pe, jare metei ñavo oipea ivoɨtarɨru ae. 12Jare omboɨpɨ oeka tenondegua güive taɨkuegua kotɨ; jare kopa oväe Benjamín ivoɨtarɨru pe. 13Jayave jae reta omondoro jemimonde, jare ombovoɨta reta imburika jare opa oyerova ye tëta guasu kotɨ. 14Judá ou oväe tɨvɨ reta ndive José oïa pe yave, jae oimeño oï joko pe, jare oyetavatɨka reta itindɨasɨ ɨvɨ re jae jóvai. 15José jei chupe reta:

—¿Maera pa kuae peyapo? ¿Mbaetɨ pa peikuaa metei kuimbae che rami vae, oecha ko opaete mbaembae regua vae?

16Jayave Judá jei:

—¿Mbae ye pa roeta ndeve oreya? ¿Mbae re ye pa oremiarita, mbae re ye pa royeepɨta? Tumpa oreväe mbaeyoa royapogüe pe; añave nderembiokuai ma ko ore, ore jare jókuae kopa oñeväe jese vae vi.

17Ërei José jei:

—Ngaraa jókuae che ayapo. Jókuae kuimbae ivoɨtarɨru pe oñeväe kopa vae oikota cherembiokuairä; pe reta pekua kavi mbɨakatu ndive peru oïa pe.

Judá omoñera José tɨvɨ Benjamín re

18Jayave Judá oya katu jese jare jei chupe:

—Tataɨ cheya, romoñera chemiari vaerä ndeve mbovɨ ndeapɨsa pe, jare agüɨye ndearasɨ chekotɨ, echa mburuvicha guasu Faraón rami ko nde. 19Nde cheya, reparandu oreve; oime ra oreru jare ïru orerɨvɨ vae re, 20jare ore romombeu ndeve cheya, roe: “Oime ko oreru indechi yae ma, jare metei orerɨvɨ taɨrusuasɨ yae vɨteri vae, oreru indechi ma yave oa chupe vae. Oime tëi ko tɨkeɨ, ërei omano. Jaeño opɨta tɨkeɨ ndive metei ichɨ vae güi jare tu oaɨu yae ko.” 21Jayave nde rere oreve: “Peru tamae jese jare taikuaa.” 22Jare roe ndeve oreya: “Jókuae kunumi mbaetɨ ipuere oeya tu, echa oeya yave, tu omanota ko.” 23Jayave rere oreve: “Perɨvɨ taɨkuegua ete mbaetɨ yave ou perupíe, agüɨye ye mo peike cheróvai.”

24“Jare rojo roväe ye oreru oïa pe yave oremiari chupe jókuae neñee re. 25Jayave oreru jei ye oreve yave: ‘Pekua pegua ye yandeve mbovɨ trigo’; 26ore reta roe chupe: ‘Mbaetɨta orepuere rojo, ërei orerɨvɨ ojo orerupíe yave rojota; echa mbaetɨta orepuere roike jókuae kuimbae jóvai mbaetɨ yave ojo orerupíe orerɨvɨ taɨkuegua ete.’ 27Jayave cheru nderembiokuai jei oreve: ‘Pe reta peikuaa ko cherembireko Raquel mókoi ko imembɨ cheve vae; 28jare metei mbaetɨve ma oiko che ndive, jare ayemongeta jókuae cheraɨ, opa mbae jou, echa mbaetɨ ye ma chepuere aecha. 29Jare añave peraja kuae cheraɨ vi chegüi yave, jare maratu oasa yave, pe reta cheyukaukata mbɨatɨtɨ pei.’ ”

30“Echa cheru ovɨa yae ko jae ndiveño; jayave aja ye yave cheru jëta kotɨ jökoraiño; 31jare oecha yave kunumi mbaetɨ ojo cherupíe, omanota ko. Jökorai oreru indechi yae ma vae mbɨatɨtɨ oyukata ko orereko pegua aeño. 32Echa che añererökuavee cheru pe araja ye vaerä kuae kunumi chupe, jae reve: ‘Mbaetɨ yave aru ye kuae kunumi ndeve, che tapɨta teko pe nderóvai, aikove aiko ramboeve.’ 33Jáeramo añave romoñera che tapɨta kuae kunumi jekovia pe nderembiokuairä, jare kuae kunumi tojo ye tɨkeɨ reta ndive. 34Echa, ¿këraita pa ayerova ye cheru kotɨ kuae kunumi mbaetɨ yave ojo ye cherupíe? Mbaetɨta chepuere aja aecha vaerä mbɨatɨtɨ tuichagüe cheru oiporarata vae.”

Currently Selected:

GÉNESIS 44: GUABD

Highlight

Copy