GÉNESIS 39

José jare Potifar jembireko

1Jare güɨraja reta ma güɨroväe José Egipto pe yave, Potifar ogua Ismael iñemuña reta güi; Potifar jae ko mburuvicha guasu Faraón Egipto pegua isundaro reta juvicha. 2Ërei yandeYa oï José ndive,#Hch 7.9. jare José ko jae kuimbae opaete jembiapo reta oë kavi chupe vae; jare oiko iya Egiptoɨgua jo pe.

3Jare iya oecha kërai yandeYa etei oï José ndive vae, jare oecha vi kërai opaete jembiapo reta rupi yandeYa omborɨ vae. 4Jökorai iya oyerovia katu omae José re, jare oyeokuai avei chupe. Jare jae oñono jo pe opaete imbaembae iyangarekoarä, omee chupe mbaepuere opaete imbaembae re. 5Jare kuae Egiptoɨgua omee güire José ipo pe opaete imbaembae, ou yandeYa iporerekua José rupi kuae Egiptoɨgua jo re; yandeYa etei oyangareko imbaembae jo pegua re, jɨmba reta jare iko reta re. 6Oeya opaete mbaembae güɨnoi vae José ipo pe, jökorai mbaetɨ oyemoambeko mbaembae re, jaeño ma tembíu jou vae re.

Jare José ko kunumi kavi, 7jare metei ara iya jembireko iporopota José re, jare jei chupe:

—Eyu eyapakua che ndive.

8Jare jae mbaetɨ oipota, jare jei iya jembireko pe:

—Mase, cheya mbaetɨ ko oyemoambeko jo pegua reta re, jare oeya ko chepo pe opaete imbaembae. 9Mbaetɨ ye kia tenondegua chegüi kuae o pe, jare cheya mbaetɨ mbae oyopia chegüi; jaeño ma nde, echa nde ko jae jembireko. ¿Këraita pa che ayapo kuae mbae ikavimbae yae vae, jare cheyoa Tumpa kotɨ?

10Ara ñavo jae omoñera José, ërei José mbaetɨ oyeapɨsaka jese ou vaerä oyapakua ipoe, oï vaerä jae ndive. 11Jökorai metei ara oike o pe oyapo vaerä iparavɨkɨ, jare mbaetɨ ñogüɨnoi joko pe jókuae o pegua reta yave, 12jae oipɨɨ José jemimonde pe jare jei chupe:

—Eke che ndive.

Jayave jae oeya jemimonde ipo pe, jare oë osɨi. 13Jare jae oecha ma oeya ko jemimonde ipo pe, jare otekuarai ikatu kotɨ yave, 14oenɨi jo pegua reta jare jei chupe reta:

—Mase, cheme güeru yandeve kuae hebreo, oyuvanga katu yanderé vaerä. Ou cheve, oyapakua vaerä chepoe, ërei che täta cheräse; 15jare oecha ma täta cheräse yave, oeya jemimonde cheɨpɨ pe jare oë osɨi.

16Jayave jae oñovatu José jemimondegüe, ime ou regua oike jo pe. 17Jayave imiari chupe tenonde jei rami etei:

—Tembiokuai hebreo reru yandeve vae, ou oipota oyapakua chepoe, 18jare che cheräse yave, jae oeya jemimonde cheve, jare oë osɨi ikatu kotɨ. 19Jayave José iya oendu yave jembireko imiari chupe vae, echa jei: “Körai cheapo nderembiokuai.”

Kuae omboarasɨ yae José iya. 20Jare oipɨɨ oñono tembipɨɨrɨru pe, mburuvicha guasu jembipɨɨ reta ñogüɨnoia pe; jare jókuae tembipɨɨrɨru pe oiko, 21ërei yandeYa oï José ndive,#Hch 7.9. jare iporerekua jese, omboeko kavi tembipɨɨ reta iyangarekoa jesa róvai. 22Jare jókuae mburuvicha tembipɨɨrɨru pegua omee José ipo pe, oyangareko vaerä opaete tembipɨɨ reta ñogüɨnoi jókuae o pe jae ndive vae re, jae oyapouka opaete mbaembae joko pe oyeapota vae. 23Jökorai jókuae mburuvicha mbaetɨ ma oyemoambeko jókuae tembipɨɨ reta ñogüɨnoi José ipo pe vae re, echa yandeYa oï José ndive, jare opaete jae oyapo vae, yandeYa etei omborɨ jese.

Currently Selected:

GÉNESIS 39: GUABD

Highlight

Copy