GÉNESIS 38

Judá jare Tamar

1Jókuae ara rupi, Judá osɨrɨ tɨkeɨ reta güi jare ojo oiko metei kuimbae Hira jee vae Adulam pegua pɨri. 2Jare Judá oecha joko pe kuimbae Canaán pegua Súa jee vae tayɨ; oipɨɨ jare omenda jae ndive, 3jae ipurúa jare oa imembɨ, jare ombojee Er. 4Jekuae ipurúa ye, oa imembɨ jare ombojee Onán. 5Jókuae güire jekuae ipurúa ye, oa imembɨ jare ombojee Sela. Quezib pe oï yave oyekuaku.

6Jare Judá omomenda taɨrɨpɨ Er, kuña Tamar jee vae ndive. 7Jare Er, Judá taɨrɨpɨ jeko kaviä yae yandeYa jesa róvai, jare oekɨ chugüi jekove. 8Jayave Judá jei Onán pe:

—Emenda nderɨkeɨ jembirekogüe ndive,#Dt 25.5-6. nderɨkeɨ iñemuña oime vaerä nderupi.

9Ërei Onán oikuaa jókuae ñemuña mbaetɨta imbae. Jáeramo tɨkeɨ jembirekogüe güɨroke ñavo ñäteɨ omomburúa ramo omoë taɨgüe ɨvɨ pei, echa mbaetɨ oipota oyapo tɨkeɨ iñemuñarä. 10Jare yandeYa pe mbaetɨ ipöra jókuae oyapogüe, jare oekɨ chugüi jekove. 11Jayave Judá jei taɨtatɨ Tamar pe:

—Imemano vae ekua eiko nderu jo pe, cheraɨ Sela okuakuaa regua.

Echa Judá oyemongeta güɨramoi omanota vi taɨ Sela tɨkeɨ reta rami. Jare Tamar ojo oiko tu jo pe.

12Oasa ɨma ara jare omano Súa tayɨ, jae ko Judá jembireko; jare Judá ipɨatɨtɨ poi ma yave ojo vecha iñapía reta kotɨ, Timnat pe. Ojo jae jare ichëi Hira, Adulam pegua ndive. 13Jare oikuaauka reta Tamar pe ime amɨri tu ojo oñapi ivecha Timnat pe yave, 14omboi jemimonde mbɨatɨtɨ pegua, jare oñeäka-soi äka-soya pe jare oñeapeva pɨpe, jare ojo tëta Enaim jöke pe oguapɨ, tape Timnat kotɨ ojo vae rupi oï vae pe, kuae oyapo oecha okuakuaa ma Sela jare mbaetɨño omomenda jae ndive.

15Judá oecha yave, oyemongeta jae ko iyaguasa pota vae, echa jae oñova jova. 16Jare opia tape güi ojo ikotɨ, jare jei chupe:

—Emaeño tayapakua nde ndive.

Echa mbaetɨ oikuaa jae taɨtatɨgüe ko vae, jare jae jei chupe:

—¿Mbae pa remeeta cheve reyapakua che ndive yave?

17Jare jae jei:

—Ambouta ndeve kavara raɨ chekavara pɨte güi.

Jare kuña jei:

—Jayave eeya mbae cheve rembou regua.

18Jayave Judá jei:

—¿Mbae pa reipota aeya ndeve?

Kuña jei:

—Eeya nepoäka-vera iïcha ndive jare ndepopoka.

Judá omee chupe, oyapakua jae ndive jare ipurúa opɨta. 19Jaɨkue rupi jae opüa jare ojo oekɨ iyeugüi äka-soya, jare omonde ye jemimonde mbɨatɨtɨ pegua.

20Jare Judá ombou kavara raɨ ikavara pɨte güi, ichëi Adulam pegua ndive, jare jae oipɨɨ ye vaerä Judá imbae oeyagüe; ërei mbaetɨ ma oväe chupe. 21Jare oparandu kuimbae reta joko pegua pe, jei reve:

—¿Ketɨ pa oime oï jókuae kuña iyaguasa pota vae Enaim pegua; tape jembeɨ pe oïse vae?

Jare jae reta jei chupe:

—Kuae pe mbaetɨ etei kuña iyaguasa pota vae.

22Jayave jae ou ye Judá pɨri, jare jei:

—Mbaetɨ aväe chupe kuña; jare kuimbae reta jókuae tëta pegua omombeu cheve, mbaetɨ ko joko pe kuña iyaguasa pota vae.

23Jare Judá jei:

—Topɨta jókuae mbaembae ndive, agüɨye vaerä kia opuka yandekotɨ che amondo tëi ma kavara raɨ chupe jare nde mbaetɨ reväe chupe.

24Jare mboapɨ yasɨ jaɨkue rupi omombeu reta Judá pe, jei reve:

—Tamar, nderaɨ amɨri jembirekogüe iyaguasa, jáeramo ipurúa añave kuae oyapo jeko pegua.

Judá jei:

—¡Penoe jare peapɨ!

25Ërei güɨnoe reta ma yave, jae omondo jei ime amɨri tu pe: “Kuae mbaembae anoi vae iya ko chemomburúa. Pemae kuae moäka-vera iïcha re jare popoka re, ¿kia imbae pa?” 26Jayave Judá oikuaa imbae ko vae, jare jei: “Jae oyapo jupi vae chegüi, echa mbaetɨ amee Sela chupe.” Jare mbaetɨ ye oyapakua jae ndive.

27Jare Tamar oyekuaku yave imembɨ chaguakiri yepe. 28Oata ma yave metei omoë ipo, jare oporomboyekuaku vae oipɨɨ ipo jare oñapɨti ipoapɨ re inimbo pɨ̈ta vae, jei reve: “Kuae tenonde oë.” 29Ërei ngatu omoinge ye ipo, jare tɨvɨ oa tenonde; jare jae jei: ¿Kërai pa reipea nderaperä? Jare ombojee Fares. 30Jaɨkue rupi oë tɨkeɨ ipoapɨ re güɨnoi inimbo vae, jare ombojee Zara.

Currently Selected:

GÉNESIS 38: GUABD

Highlight

Copy