GÉNESIS 28
28
1Jayave Isaac oenɨi taɨ Jacob jare jei ñee kavi ikotɨ; jare oyókuai jei reve chupe: “Agüɨye eipɨɨ nderembirekorä kuimbae reta Canaán pegua tayɨ. 2Epüa ekua Padan-aram kotɨ, Betuel jëta pe, jae ko ndesɨ tu, jare emenda joko pe Labán tayɨ ndive. Labán jae ko ndesɨ ikɨvɨ. 3Tumpa imbaepuere yae ete vae tiporerekua nderé jare tanemoñemuña jeta, reyeapo regua tëta tuicha yae vaerä. 4Jare tomee ndeve mborerekua Abraham pe güɨrökuavee vae,#Gn 17.4-8. jökoraiño vi neñemuña reta pe, reiko vaerä kuae ɨvɨ yaiko pɨpe vae iyarä, Tumpa omee Abraham pe vae.”
5Jökorai Isaac omondo Jacob jare jae ojo Labán pɨri Padan-aram pe, Rebeca ikɨvɨ jëta pe; Rebeca jae ko Jacob jare Esaú ichɨ. Labán jae ko arameo Betuel taɨ.
Esaú omenda
6Esaú oecha kërai Isaac jei ñee kavi Jacob kotɨ vae jare omondo Padan-aram kotɨ omenda vaerä joko pegua kuña ndive; jare jei ñee kavi ikotɨ yave oyókuai vi agüɨye vaerä omenda Canaán pegua kuña ndive; 7Jacob oyapo tu jare ichɨ jei vae, jare ojo Padan-aram kotɨ. 8Jökorai Esaú oikuaa, Canaán pegua kuña reta jeko mbaetɨ yepe ikavi tu Isaac pe vae; 9jáeramo Esaú ojo omenda Mahalat ndive. Mahalat jae ko Ismael, Abraham taɨ tayɨ, Nebaiot jeindɨ; kuae ko Canaán pegua kuña reta güɨreko güire ma.
Bet-el pe Tumpa oyekuaa Jacob pe
10Jacob oë Beerseba güi jare ojo Harán kotɨ. 11Ojo kaaru chupea pe opɨta, echa kuaraɨ oa ma chupe; jare oñono ita iñäkandɨtarä jókuae opɨtaa pe, jare oyapakua joko pe. 12Jare opaɨu: Ipaɨu pe oecha metei yeupika ɨvɨ güi ojoi ara re oya vae; jare Tumpa iaraɨgua reta jeta oyeupi jare jekuae ogüeyɨ reta#Jn 1.51. jokoropi. 13Oecha vi yeupika iyapɨteasɨ re oï yandeYa. Jare jae jei: “Che ko ndeYa, neramɨi Abraham iTumpa, jare nderu Isaac iTumpa; kuae ɨvɨ reyapakua reï jese vae#Gn 13.14-15. ameeta ndeve jare neñemuña reta pe. 14Neñemuña reta jeta yaeta ɨvɨkúi rami, reñemoaita kuaraɨ oikea kotɨ, jare kuaraɨ oëa kotɨ, ɨvɨtuguasu kotɨ jare arayevɨ kotɨ; jare opaete ɨvɨ pegua reta oyekouta nderupi jare neñemuña rupi.#Gn 12.3; 22.18. 15Añave, ko aï nde ndive jare ayangarekota nderé reoa rupi, jare rogüeru yeta kuae ɨvɨ pe; ngaraa roeya, ayapo regua ndeve jae ndeve vae.”
16Javoi Jacob osareko ipaɨu güi, jare jei: “Añetete, cheYa Tumpa etei yepe oï kuae pe, jare che mbaetɨ aikuaa.” 17Jare ou okɨɨye yae, jare jei: “Ikɨambae yae vae yepe kuae ɨvɨ aï pɨpe vae; ¡Tumpa jëta etei yepe, jare ara jöke yepe!”
18Opüa ndeimbove yave oipɨɨ jókuae ita oñono iñäkandɨtarä vae, jare omopüa oñono joko pe oporomomaendúa avei vaerä jare opɨyere jese olivo iasaite. 19Jare jókuae opɨtaa ombojee Bet-el,#28.19 Bet-el, oipota jei: Tumpa jo. tenonde yave jókuae tëta jee yepi Luz.#28.19 Luz, oipota jei: Ɨvɨra almendra jee vae.
20Jacob oñererökuavee jei reve: “Tumpa ojo yave che ndive, jare cheñovatu yave kuae cheguata pe omee reve cherembiurä, jare temimonde omee yave amonde vaerä; 21jare ayu ye yave mbɨakatu pe cheru jëta pe, jökorai yave cheYa toiko cheTumparä. 22Kuae ita añono kuae pe vae topɨta oporomomaendúa avei vaerä, toiko Tumpa jo rami; jare opaete mbaembae remeeta cheve vae güi ambosɨrɨta payandepo güi metei ndeveguarä.”
Currently Selected:
GÉNESIS 28: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
