GÉNESIS 29
29
Jacob Harán pe
1Jacob jekuae oguata ye jare ojo kuaraɨ oëa kotɨgua reta iɨvɨ pe.
2Oecha joko pe ɨkua jare mboapɨ atɨ vecha reta oputuu ñogüɨnoi, echa joko güi mɨmba reta oɨu. Jare ita tuicha vae oï ɨkua jöke re, 3joko pe opareve ma yatɨ mɨmba reta yave, vecha iyangarekoa reta ombosɨrɨ ita guasu, jare opa ma oɨu mɨmba reta yave oñono reta ye ita guasu ɨkua jöke re. 4Jacob oparandu vecha iyangarekoa reta pe:
—¿Kia pegua pa pe reta?
—Ore ko Harán pegua —jei reta.
5Jae jei ye chupe reta:
—¿Peikuaa pa Labán Nacor taɨ?
—Roikuaa ko —jei reta.
6Jayave Jacob jei ye:
—¿Ikaviño pa oï?
—Ikaviño. Mase ko ou Raquel, Labán tayɨ vecha reta ndive —jei reta chupe.
7Jare jae jei:
—Mase, ndei ave kaaru ete peyokenda vaerä mɨmba reta jókai pe, pemboɨu jare peraja ye tokaru.
8Jae reta jei:
—Mbaetɨ orepuere echa roärota ko ïru vecha iyangarekoa reta opa yatɨ regua, ita rombosɨrɨ vaerä ɨkua jöke güi romboɨu vaerä vecha reta.
9Jacob imiari oï ramboeve jae reta ndive, Raquel ou oväe tu Labán ivecha reta ndive, echa jae yepe tu ivecha iyangarekoa. 10Jacob oecha rupive Raquel güeru tu Labán ivecha reta ojo ombosɨrɨ ita ɨkua jöke güi jare omboɨu vecha reta. Jacob ichɨ ikɨvɨ jae ko Labán; 11jare Jacob oovapɨte Raquel jare jäse oyaeo. 12Jacob imiari Raquel pe, jae ko Rebeca, Labán jeindɨ imembɨraɨe; jare Raquel oendu yave kuae, osɨi ojo jo kotɨ omombeu tu pe.
13Labán oendu yave Jacob regua jeindɨ imembɨraɨe, oë osɨi ojo oövaiti, oiküava jare oovapɨte jare güeru jo pe; jare jae imiari Labán pe opaete mbaembae oasa jae ndive vae. 14Labán jei chupe: “Añetete nde jae ko chekägüe jare chesoo ïru.”
Jacob oparavɨkɨ Raquel jare Lea regua
Jacob opɨta Labán pɨri metei yasɨ. 15Jayave Labán jei Jacob pe:
—Agüɨye eparavɨkɨiño cheve cheriɨrä reiko güiño. Emombeu cheve mbovɨ amboepɨta ndeve ndeparavɨkɨ.
16Labán güɨnoi mókoi tayɨ reta; tenondegua jee Lea jare taɨkuegua Raquel. 17Lea jesa jëogüe, ërei Raquel jesäɨäta kavi yae jare maepöra yae. 18Jare Jacob iporopota omae Raquel re, jare jei:
—Che tayeokuai ndeve chiu año Raquel nderayɨ taɨkuegua re.
19Labán jei chupe:
—Ikavi yae ko amee vaerä ndeveño, ïru kuimbae pe amee vaerägüe. Epɨta che ndive.
20Jökorai Jacob oyeokuai Raquel regua chiu año jare mbaetɨecha puku chupe ara reta, echa oaɨu yae. 21Jare oasa ma chiu año yave, Jacob jei Labán pe:
—Emee cheve cherembirekorä vae, echa oväe ma ara amenda vaerä jae ndive.
22Jayave Labán oyapo arete jare oparea opaete jëta-ɨpɨ rupigua pe, yogüeru vaerä mendaa pe. 23Jare pɨ̈tu yave Labán güeru tayɨ Lea jare omee Jacob pe, jare jae oke jae ndive. 24Labán omee vi jembiokuai kuña Zilpa jee vae tayɨ jembiokuairä. 25Jare köe ma yave Jacob oecha Lea ndive yepe oke, jare jei Labán pe:
—¿Mbae jei vae pa ko kuae reyapo cheve? ¿Ayeokuaiä pa ko ndeve Raquel regua? ¿Maera pa chembotavɨ? 26Labán jei chupe:
—Kuae orerëta pe mbaetɨi taɨkuegua räri romomenda tenondegua güi. 27Emboapɨ räri arete menda pegua semana vae, javoi tamee ndeve Raquel, reyeokuaita yave ïru chiu año jesegua.
28Jare Jacob jökorai oyapo, omboapɨ yave semana vae menda, Labán omee Raquel Jacob jembirekorä. 29Labán omee vi metei jembiokuai kuña Bilha jee vae Raquel jembiokuairä. 30Güɨroke vi Raquel jare oaɨu yae Lea güi; jare oyeokuai ye Labán pe ïru chiu año.
Jacob taɨ reta
31Jare yandeYa oecha yave Lea oñereröɨrouka, omee chupe imembɨ vaerä; ërei Raquel imembɨmbae ko. 32Lea ipurúa jare oa imembɨ jare ombojee Rubén, echa jei: “YandeYa oecha chepɨatɨtɨ vae; añave kuae re cheraɨuta cheme.”
33Jaɨkue rupi Lea ipurúa ye jare oa imembɨ, jare jei: “Echa yandeYa oendu che añereröɨrouka vae jare omee ye cheve kuae.” Jare ombojee Simeón.
34Jekuae ipurúa ye jare oa imembɨ, jare jei: “Añave cheme oikota che ndive, echa kuae re mboapɨ ma chemembɨ chupe.” Jare ombojee Leví.
35Jekuae ipurúa ye jare oa imembɨ, jare jei: “Kuae re amboeteta cheYa.” Jare ombojee Judá. Jare imembɨ poi.
Currently Selected:
GÉNESIS 29: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
