1 CORINTIOS 2
2
Oñemoërakua Cristo omano kurusu re vae re
1Cherɨvɨ reta, aja pépɨri amombeu vaerä peve añete vae Tumpa regua yave. Mbaetɨ chemiari peve ñee tuichagüe rupi ani arakuaa rupi. 2Echa pepɨte pe aï ramboeve, añeñono mbaetɨ oikuaa vaerä ïru mbae re jaeño amombeu vaerä peve Jesucristo kërai omano kurusu re vae regua. 3Jare pepɨte pe aï yave, ayembopɨtu jare arɨrɨi akɨɨye güi;#Hch 18.9. 4jare chemiari peve ani añemoñee peve yave, mbaetɨ aiporu ñee reta arakuaa pegua, jaeño Espíritu imbaepuere rupi vae, 5peporogüɨrovia agüɨye vaerä oï kuimbae reta iyarakuaa re, jaeño Tumpa imbaepuere re.
Tumpa oikuaauka yandeve Espíritu Santo rupi vae
6Ërei ore roiporu ñee arakuaa pegua ipɨ̈rata ma iporogüɨrovia pe vae reta ipɨte pe. Ërei mbaetɨ roiporu arakuaa ɨvɨ pegua ani ɨvɨ pegua mburuvicha reta iyarakuaa. Echa kuae mburuvicha reta opata ko. 7Ërei oremiari ko Tumpa iyarakuaa yaikuaa rapembae vae, arakuaa oñemi vae; kuae ko Tumpa ombosɨrɨ ndei ɨvɨ oyeapo mbove, yayemboeteuka vaerä. 8Ërei mbaetɨ metei ave ɨvɨ pegua mburuvicha reta oikuaa kuae arakuaa. Echa oikuaa reta yave mona, ngaraa tëi ko oyuka kurusu re yandeYa imboetea yae vae. 9Ërei oyekuatía oï:
“Mbaetɨ kia oecha jare mbaetɨ kia oendu vae,
mbaetɨ vi kia oyemongeta jese vae,
jókuae mbaembae omokätɨro ma
Tumpa oaɨu vae reta pe vae.”#Is 64.4.
10Ërei Tumpa oikuaauka yandeve Espíritu Santo rupi. Echa Espíritu Santo oikuaa opaete mbae. Oikuaa vi opaete Tumpa regua yavai yae yaikuaa vaerä vae.
11Kia mbaetɨ ipuere oikuaa ïru vae ipɨa pe. Jae eteiño oikuaa. Jökoraiño vi mbaetɨ kia ave oikuaa Tumpa ipɨa. Jaeño Tumpa iEspíritu. 12Jare yande mbaetɨ yamboresive espíritu kuae ɨvɨ pegua. Jaeño Espíritu Santo Tumpa güi ou vae, yaikuaa vaerä mbaembae Tumpa omee yandeve vae. 13Kuae re oremiari, mbaetɨ roiporu kuimbae reta iyarakuaa re royemboe vae rupi. Jaeño Espíritu Santo oremboe jese vae rupi: roikuaauka ïru vae reta pe mbaembae Espíritu regua Espíritu Santo ipɨa pe oiko vae reta pe.
14Ërei oporogüɨroviambae mbaetɨ oikuaa mbaembae Tumpa iEspíritu regua, echa mbokere ko chupeguarä. Ipuereä oikuaa. Echa jaeño Espíritu Santo rupi ipuere oikuaa. 15Echa Espíritu Santo oiko ipɨa pe vae ipuere oikuaa kavi opaete kuae mbaembae. Ërei mbaetɨ kia ipuere oyangao vae. 16Echa “¿kia pa oikuaa yandeYa iyemongeta? ¿Kia pa ipuereta omboe?”#Is 40.13; Ro 11.34. Ërei yande ñanoi Cristo iyemongeta.
Currently Selected:
1 CORINTIOS 2: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
