Iona 3
3
Iona Mulai ne Ninive
1IAUE muvikalanu Iona la, 2“Nalutu mo nalai no tuala tila ne Ninive mo napala'alixu taleli ulai noxi'a.”
3Iona mulomuxu vaikalau, la mulai. Ninive ne, anu tuala tatila manina. Itema vile umasaxa lexe ulutu no iou xalenga vile mo ulai uxali xalee vile la umuamua'i voxo tatalu. 4Ioxe, Iona mulutu la mulai no nano la mumuamua'i voxo vile. Anu mu'ava noxi'a aloxo 'o, “Ili'i lexe voxo itemaxu tamei ukalu, la sou IAUE ukalusinge ngingi ta mitema ne Ninive.” 5Xe ane'i milomusou vaikala noxou Lataua ne, la mimuxamuxaxu tane'i no anu, la sou mivikala aloxo 'o, “Nenge ta'ani mamu. Taxolu loxo nesi. Nenge latala 'o, nenge tatelo tokolomo su'inu sou tama ukalusi. Usoko noxi'a ta tatila mo ulai utalo noxi'a ta mitema vitanisi sou tamaxainge lexe nenge a texiunu oponenge.”
6Tatananu tuala ne Ninive mulomusou a'alo ane ne, la mu'umesou puloulou noxou. Mu'umesou mukalu, la muxexeenu tokolomou laixe ia mutelo tokolomo su'inu sou tama sou mulai muxolu no lia no lomulo. 7Anu mukalaa anaxu mulai noxi'a ta mitema ne Ninive, la muvikala aloxo 'o, “Nexi noxi'a ta tatila sou xaixai noxilo temasaxa lexe evile umomomo sou u'ani uasi. Ngingi ta mitema ngongi'a ta kau mo ta sipsip mengi nga'ani mo ngaie mamu. Ngingi latala ne ngaxolu loxo nesi. 8Ngatelo tokolomo su'inu sou tama noxinge mo noxi'a ta kau ilo'a ta sipsip ukalusi mo ngingi ngatama pekia'u ulai noxou Lataua. Ngalulusou 'ili'ilixo masumasua noxinge mo ngave'a ta mitema isoli uasi. 9Lexe nenge ta'oxo aloxo ne, la male anu uxiunu xavutalau la nenge taulua uasi.”
10Lataua mumaisou lexe ane'i milulusou 'ili'ilixo masumasua ane ane'i mi'oxo'oxonu. La sou anu muxiunu xavutalau, la ukalusi'a ta mitema loxo mulemolu tei ua.
Currently Selected:
Iona 3: ataNTpo
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
