Iona 2
2
Iona Mukilaka
1No nano noxou sinana opoonu, la anu muvikala lamana noxou Lataua IAUE noxou aloxo 'o,
2“Auo! IAUE o, eni e'ava noxine sou mii tu'umaxu ane muxalisilo 'o.
La nini nelomusou 'ava noxilo.
Eni elai exolu 'alai no tuala masua noxi'a ta mitema sou soli.
Eni elinga sou su'uli, la nini nelomusou linga noxilo.
3Nini nesu'aleli, la eni elu'elai no lia no luaki tanu.
Luaki mutaasilo mukalusi mo xaviinu mukikatukatusilo
mo nini ne'oxonu xasi tatatila kisou uluxu mukavukavulasi no lataleli.
4Eni evikala aloxo 'o,
‘Nini nekusailo.
Ia, eni emuxamuxaxu taleli lexe amaisou tani tavuna noxine la.’
5Xasi tatila kisou uluxu mukavukavulasi no lataleli,
la mu'otusou muaxo, xo luaki mutaasilo mukalusi.
Ia'eia'e sou luaki muausou kisilo kalumo.
6Eni elu'elai manina no tavatava'u laxalaxa'ilu no lia no luaki tanu.
Tuala noxi'a ta mitema sou soli ne mutatuxo pekia'u avile.
Ia IAUE, nini Lataua noxilo, nini nepamaulileli,
la sou eni e'umesou tuala ane masua mole ane eni eno'u mauli laixe 'o.
7Auo! IAUE, eni examuli lexe eni xavileli la ua,
aloxo ne la sou eni exavutalaneni
la 'ava noxilo mulai muxali noxine no tani tavuna.
8Ta mitema ilavusou imuxamuxaxu tane'i noxi'a ta maliavai'a sou kalavoi
mole mixovulaunu.
Muamua'i laixe ane noxine mo mixiunu tumali'a,
ia imulineni la ua.
9Ia eni amasaxa lexe alexe lexe sou a'iti ualasine,
mo a'elaxu sipsip ulai noxine mo amulinu aloxo eni epala'alixu ne.
IAUE, ninisi namitema sou pamauli la sou nexi temauli laixe.”
10Ioxe ili'i, la sou IAUE muvikalanu sinana sou mulai muexinu Iona no tasi'i.
Currently Selected:
Iona 2: ataNTpo
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
