Tavaꞌu 21

Sala Mivo'onu Aisaki

1Xe ili'i la IAUE mune'e sou musu'uline Sala aloxo anu mulemolu tei, 2#Eva 11:11la sou ane opoone. Xe ili'i la sou ane mivo'onu 'ilie mulu no mine momu Avalaamu ne anu itema tila maninanu. Mivo'onu ne no voxo ane anu Lataua molu musosovosou lexe nenu ivo'onu no anu. 3Xe momu muavuti la mumoxo'u ualasou lexe Aisaki, 4#Tav 17:12; Apo 7:8xe voxo sou muxatele tatalu mukalu, la sou xooxoo mungaasou aloxo Lataua mulemolu lamana tei. 5No voxo ane Avalaamu tauu iexu loxo itemaxu ta'uve, la Aisaki nenu mivo'onu. 6Xe nenu miavuti la mivikala aloxo 'o, “Lataua molu mulosilo 'osa'ila mo keke. Ta mitema ane ilomusou a'alosou mii ane muxali noxilo 'o, la ane'i kalumo i'osa mo ikeke.” 7Xe miavuti la mivikala aloxo 'o, “Evile uvikalanu Avalaamu lexe ulai ili'i la semau ne ipalaa ta 'ilie uasi. Ia Avalaamu anu soxu ane, itema tila mukalu 'o, eni evo'onu iu keakea mulu 'o.”

8Aisaki muleme tatila mupasipaa loxo. Xe no voxo ane anu mu'italonu susu, la momu mu'oxonu la'ilali toxoxa'a.

Sala Mikusai'a Axali Ilou 'Ilie Isimaeli

9No voxo vile, la Isimaeli e Axali semasie Aixiputo, Avalaamu mulai noxie la mivo'onu, muvikala masua mulai noxou Aisaki, Sala 'ilie. 10#Xal 4:29-30Xe Sala milomusou la mivikalanu Avalaamu aloxo 'o, “Napalusi'a Axali ilou 'ilie ne mo ilai. 'Ilie ne umomomo sou ualasou utelo no anu mimii se'i noxine uasi. Mimii ne eni 'alixe Aisaki miumiu ukalusi.”

11Avalaamu mulomusou vaikala ane ne, la uai laixe no opo uasi, xo Isimaeli ne anu 'olu kalumo. 12#Rom 9:7; Eva 11:18Ia Lataua muavuti la muvikalanu Avalaamu, “Taneni utamasi'a 'iline ilee nenu ne mamu. Namuli vaikalaie Salasi, xo ulai ili'i, la ta xasixasine mo ta 'ilusulusuneni ixali tavu'alo ane noxou Aisaki 'osi, aloxo eni epala'alixu noxine ne. 13Isimaeli kalumo ne eni axalixa'a ta 'olu mo ta xasoxasou mo ta 'ilusulusunu tavu'alo aso vile, mo sou ane'i mata ane ne ixali tavu'alo. Anu Isimaeli ne nini 'iline kalumo.”

14Miai xe mitulu no kakau ne la, Avalaamu muno'u la'ilali se'i sou mulai mulosie Axali ilou lexa mutavulenu no anu mee sosou. Xe mulutu vaxa la muvo'onu 'olu Isimaeli sou mu'italonu vaxa noxie nenu tumalie, io sou mupalusi'a ilou milai. Ane'i ilou 'ilie soxu milutu mole milai. Milai mixixaoxao mivaxa mine'e ne Beru-seva. Xalee lia ane ne, xalee vitanisi. Ovuovu ilou ia'eia'e ne uleme u'oki uasi, vilevilesi. Xalee se'i la tani taxulunusi. Lavolavo'o mo io'iio'isi. Lexa kalumo uasi. 15Xe no voxo ane lexaxa'a ilou mukalu la, ane milai mi'italonu 'ilie ne no ovu soxo vile maimaixu, 16ia ane milai mixolu no paxa sevile, io ane mixavuxavutala, la mivikala aloxo 'o, “Eni elavu lexe umomomo sou eni amaisou 'alixeni usoli uasi.” Ane mixolu sou mixavuxavutala aloxo ne la mitatama. 17'Ilie kalumo ne mutatama xe Lataua mulomusou mine ane itatama, la sou angelo noxou Lataua teitexi no opoonu loxotolo mutali'isie Axali aloxo 'o, “Ma'ia ane nini oponeni uai no anu laixe uasi ne, Axali? Na'ume mamu, xo Lataua mulomusou molomolo e utatama ne. 18Natulu mo nalai mo navo'onu, mo naxolixolinu. Xo ulai ili'i la eni axalixa'a ta 'olu mo ta xasoxasou mo ta 'ilusulusunu ixali tavu'alo sou ixali ta mitema sou mata vile toxoxa'a.” 19Xe Lataua musu'uline la sou ane iei mukaa lamana laixe, la sou ane mimaisou lexa iou uopuopu utetelo no taxasou. Ane milutu milai sou mitau no anu tavulu e Avalaamu mulosi'a ilou sou miienu Isimaeli.

20Lataua muxolu noxou Isimaeli la sou anu muleme toxoxa'a. Ilee nenu mixolu no xalee lia vitanisi ne Paran mole anu muxali itema vile sou uvau mii manina no anu pasiko ilou tavi. 21Xe nenu miavuti la milai mino'e semasie Aixiputo vile sou mine'e mu'uluxe.

Avalaamu Ilou Avimeleki Misakii Xavutalai'a

22 # Tav 26:26 No tauu ie ane ne, la Avimeleki ilou Pikolu itema tila sou uulaxune'i ta mitema sou 'oto'oto noxou anu Avimeleki milai mixali noxou Avalaamu, la mivikalanu aloxo 'o, “Lataua a uxoo noxine mo no anu xaixai noxine ukalusi, 23anu aloxo ne la sou alalae 'o, eni amasaxa lexe nini napala'alixu taneni no iou Lataua mo navikala lamana lexe nini ulai la nini namomomo sou nakalavoinexi noxi'a ta 'ali'alixeni mo ta xasixasilo mo ta 'ilu'ilusuleli uasi. Xo eni esu'ulineni mo asusu no anu 'ilixo vile masua no ieni uasi. Ia lexe nini kalumo napala'alixu taneni lexe nini kalumo nini tanenixo mo nasu'ulileli no xalee tuala ane nini nene'e naxoxoo no anu 'o.” 24Xe Avalaamu muavuti la muvikala aloxo 'o, “Eni a'oxo aloxo nini nelemolu ne.” 25Xe muavuti la, la musolo vaivaikalau mulai noxou Avimeleki sou mukalapuusou lexa iou anu mu'asou lexe anu ilo'a ta minuminu na'a, ia ta mitema sou xaixai noxou anu Avimeleki mivukosou lexe ane'i lexaxa'a iou ane. 26Xe Avimeleki muavuti la muvikalanu aloxo 'o, “Eni alavu no anu mii ane nini nalemolu 'o uasi. Mo alavusi'a ta mitema ane mi'oxo 'ilixo ane ne uasi. Nini navikalalelixu lamana uasi, ia uao eni alomusou 'o.”

27Xe Avalaamu muavuti la muitiu Avimeleki ta sipsip ilo'a ta kau se'i xe mukalu la sou ane'i ilou misakiinu xavutalai'a ilou lexe, ane'i ilou maasi, la xoluxoluxa'a ilou ne vilesisi, ia mii vile loxo 'oto'oto la uasi. 28Xe Avalaamu mulutu la mulai no taasi'a ta sipsip noxou sou mukalipala'ane'i ta sipsip ta 'ili'ili'a ane ta sema sou muno'a muxatele tamei no nano no la'oluxa'a sou mulai muta'olune'i va'axu. 29Avimeleki muavuti la mutali'isou, “Loxovaa ane nini ne'oxo loxo ne?” 30Xe Avalaamu muavuti la mukolinu aloxo 'o, “Maasi 'o la oponeni u'osasi, mo nano'a ta sipsip ta 'ili'ili'a muxatele tamei 'o. Nini nano'a mo sou nini napala'alixu lexe eni amoosou lexa iou e'asou ano.”

31La sou lia xalee se ne ane'i mipotongalelee lexe Beru-seva.#21:31 Beru-seva laaxu lexe lexa iou muxatele tamei. Xo ane'i ilou misakiinu xavuxavutalai'a ane. 32Mukalu la sou anu Avimeleki ilou Pikolu milivu milai no tualasi'a ne Pilistia. 33Xe ili'i la sou Avalaamu mutounu ovu vile ne Beru-seva ne sou mulotu mulai noxou IAUE anu Lataua kaluxu uasi. 34Avalaamu muxolu no xalesi'a ta Pilistia ne, maxuvee misevile.

Currently Selected:

Tavaꞌu 21: ataNTpo

Highlight

Copy