Tavaꞌu 20

Avalaamu Ilou Avimeleki

1Avalaamu muavuti la muvulasou tuala ne Mamule sou mulai ili'i no xalee ne Kanani. Mulai muxolu no nixi ne Kadesi xe ne Suru. Xe ili'i, la sou ilou misuku milai mixolu ne Xelalu. 2#Tav 12:13; 26:7La anu muvikalane'i lexe Sala ne anu vimou sema. La sou tatananu tuala ne Xelalu ualasou lexe Avimeleki muno'e Sala milai noxou. 3Xe no 'olovoxo la anu muaipiepiena lexe Lataua muxali noxou la muvikalanu aloxo 'o, “Maasi la nini nasoli, xo nini neno'e sema ane ne, ane mitaula'i.” 4Xe Avimeleki muavuti la muvikalanu Lataua aloxo 'o, “IAUE, eni asusu uasi, ia loxovaa ane nakalusixe noxi'a ta mitema noxilo ane ane'i isusu uasi? 5Anu Avalaamu molu muvikala lexe anu vimou ane, mo ane kalumo mivikala aloxo ne. Eni xavutalaxeni muvikala lexe anu mii vile masua no anu uasi, la sou eni eno'e semau, ia eni a'oxo 'ilixo vile masua noxie uasi.” 6Xe Lataua muavuti la mukolinu vaikalau aloxo 'o, “Ani, manina. Eni elavusou xavutalameni la sou ane eni e'oxo xavutalameni ne mutulu pekia'u mo sou mamu nini nasusu no ieli. Mole ane nini nalai 'alai noxie sou na'oxonu 'ilixo vile masua noxie ua. 7Ia maasi 'o, nano'e sema ne mo nalivulixe ilai noxou mulue. Mulue ne, anu itema sou usova vaikala noxou Lataua. Anu umaisine lexe nini nalivulixe semau ne, la sou anu ulingaine mo sou mamu nini nasoli. Ia lexe nini nalivulixe uasi, la eni avikalaneni lamana aloxo 'o, nini mo ta mitema noxine ne, ngongi'a ngasoisoli manina.”

8Xe no kakau no mine loxo taai tatutulu 'o la anu Avimeleki mupasipaa la mu'avali'a ta mitema sou xaixai noxou sou muvikalane'ixu vaivaikala e Lataua muvikalanuxu no anu aipiepiena noxou no 'olovoxo. Ane'i milomusou la mimama'u misevile. 9Xe muavuti la mu'avalou Avalaamu sou mutali'isou, “'Ilixo mii ma'ia ane nini ne'oxo mune'e noxixe loxo 'o? Susu ma'ia ane eni e'oxo mulai noxine la sou ane nini ne'oxo tu'umaxu ano 'o muxali noxixe noxi'a ta mitema noxilo 'o? Evile ulavusou u'oxo 'ilixo vile aloxo 'o une'e noxilo uasi. 10Ia loxovaa la nini ne'oxo loxo 'o?”

11Xe Avalaamu muavuti la mukolinu tali'i noxou Avimeleki aloxo 'o, “Eni eloxomale lexe ta mitema lai 'o ne itoxonu Lataua uasisi manina, la loxo io ivelo asoli io sou ane'i i'umene semaxeni. 12Xe, Sala ne ane vivilo sema manina, mamixe noxie vilesisi. Ia ane nenie vile mo, la sou ane eni e'uluxe ne. 13No voxo ane Lataua mupalusilo sou e'umesou mamilo taasou sou elai no tuala va'axu, la eni e'unaa noxie Sala aloxo 'o, ‘Lexe nini namasaxailo manina, la nini namaxa'u taneni noxilo aloxo 'o, lexe nenge nengei ta muamua'i xe ta mitema itali'isine, la nini navikalane'i lexe nini vivine ane eni.’”

14Xe Avimeleki muavuti la mulivulixe Sala milai noxou Avalaamu. Xe mukalu la muitiu ta sipsip, ta kau xe ta mitema sou upalupalusi'a. 15Xe muavuti la muvikalanu Avalaamu aloxo 'o, “Namaisou, lialia ano 'o ne noxilo mukalusi, namasaxa lexe nalai na'iliisine tuala sou naxolu no anu a ne'ei ne la, mii noxinesi.” 16Xe muavuti la muvikalane Sala, “Vaimomo 'o, eni alosou vivine Avalaamu lamoli siliva itemaxu mavulovexa ta'uve (1,000). Anu umomomo no anu tu'umaxu ane muxali noxine. Ta mitema imaisou la ilavu lexe uasi manina, nini nasusu uasi. Ane'i latala ne, ilavu aloxo ne lexe nini na'oxo 'ilixo vile masua uasi.”

17-18Ioxe, tava'u xo anu Avimeleki muno'e Sala milai noxou, la sou IAUE mumasikalane Avimeleki semau ilo'a ta sema sou upalupalusi'a noxou no tuala ne mole vile noxi'a ne umomomo sou upalaa uasi. Ioxe, Avalaamu muavuti, la mulinga sou Avimeleki, la sou Lataua mupamaulinu. Lataua mupamauline semau mo ta sema sou upalupalusi'a noxi'a ilee semau, sou ipalaa ta 'ili'a.

Currently Selected:

Tavaꞌu 20: ataNTpo

Highlight

Copy