Tavaꞌu 22

Lataua Mutovonu Avalaamu

1#Eva 11:17-19Mixoxoo ne, xe alaxu vile la Lataua mutovonu Avalaamu, la mu'avalou, “Avalaamu!” La Avalaamu mukolinu, “Ma'ia, eni 'a!” 2#2A'a 3:1 “Nano'u 'iline soxu vilesisi e Aisaki, nini tanetanenixu mo namasaxau misevile, mo ngongou ngalai no xalee lia e ilemolu lexe Moria. Ngalai ne la sou eni alosiengixu laxa'ilu vile lai ne, sou nini navau mo na'elaxu Aisaki ukalusi une'e noxilo.”

3Ioxe, no kakau no mine uao sivosivo se 'o, la Avalaamu mutulu sou muvalavala ovu sou ulai u'elaxu 'olu Aisaki loxo Lataua muvikalanuxu. Muvotunu ovu e musiasia'u ne, ka muiti mutelo noxou donki, xe mukalu la sou muno'a Aisaki ilo'a ta mitema sou xaixai noxou tamei sou ilo'a milai ne Moria loxo Lataua mupela'uxu. 4Ilo'a mimuamua'i voxo vile mo tamei xe tatalusou, la Avalaamu iou mulai mutukumusou laxa'ilu e Lataua muvikalanuxu 'ole. 5Xe muavuti la muvikalane'i ta mitema sou xaixai noxou aloxo 'o, “Donki a, mo ngongi'a ngaxoxoolu 'o, ia nexi noxou soxu 'o talai 'ole mo, ka sou nexi noxou talivu une'e noxinge.”

6Avalaamu muvikalanu Aisaki sou mutavule ovu tavalanu, xe anu sou muno'u viso ilou navu mu'ani'ani no totou sou anu umuxaxu navu iou sou utauxu no anu. 7Ilou mimuamua'i mikei milai xoo, xe Aisaki muavuti la muvikala momu, “Mamilo,” la momu mukolinu, “Ma'ia, 'alixeni?” Aisaki muavuti la mutali'isou momu aloxo 'o, “Eni emaisou lexe nini ovu tavalanu mo navu mo momoiou ano 'o, ia sipsip 'ilie sou ta'elaxu ukalusi uali noxou Lataua 'ava?” 8Momu muavuti la mukolinu aloxo 'o, “Lataua molu ukamuli vile la sou ulosinge.” Ilou mivivikala aloxo ne la, ane'i ilou mimuamua'i mikei milalai. 9#Iak 2:21Ilou mimuamua'i xe mixali no laxa'ilu e Lataua mupela'uxu Avalaamu, la sou anu Avalaamu muta'olunu lavo'o musokou no lia mulai muxali teitexi sou muxali loxo valovalo. Xe mukalu la muta'olunu ovu vaxa. Xe muavuti la mukasi vaxa noxou 'olu ka musakisakii. Mukalu la mu'itinu sou mumuxaxu vaxa no ovu latanu e muta'olunu vaxa. 10Xe mukasi vaxa no viso sou lexe uvau usoli, la ua. 11Angelo noxou IAUE mu'ava teitexi molu no opo loxotolo mulu'e noxou sou muvikalanu aloxo 'o, “Avalaamu, Avalaamu!” Avalaamu mukolinu, “Ma'ia, eni 'a.” 12“Navila'isou 'iline sou navau usoli mamu. Vaimomo 'o, eni elavusou lexe lolomu a muxoo noxine maninanu mo nini netaxaa Lataua manina, la sou ane nini tanenixu 'iline soxu e vilesisi 'o mo na'apisou noxou uasi.”

13Xe Avalaamu muavuti la iou muxixao laxa'ilu kulutitinoxu se anu ututulu no anu ne la iou mulai mutukumusou sipsip 'ilie mulu vile ne sikiliu mu'oso no ovu soxo vile avoavolu. Aliku 'o mupasipaa 'o la mulai muno'u sou muvau musoli, ka sou mu'elaxu mukalusi. Ia 'olu ne, Avalaamu uvau usoli uasi, xo anu muvau sipsip 'ilie mulu vile. 14Xe Avalaamu muavuti la mumoxo'u laxa'ilu kulutitinoxu se ne lexe, “IAUE Ulosinge”. Vaimomo 'o ne, ta mitema ilemolu lia xalee se ne lexe, “No laxa'ilu noxou Lataua e anu ulosinge.”

15Xe angelo noxou IAUE muavuti la muvikala molu no opo loxotolo alaxu tameisou mulai noxou Avalaamu aloxo 'o, 16#Eva 6:13-14 “No ualasilo, eni avikalaneni manina lexe, eni IAUE ane avivikala 'o, tava'u xo nini na'apisou 'iline soxu vilesisi ne uasi. 17#Eva 11:12Nelomuxosi, la eni aalusine. Eni evikala lamana noxine mo epala'alixu masaxa noxilo lexe eni axalixa'a ta xasixasine mo ta 'ilusulusuneni tavu'alo mo ixali i'oki'oki loxo ta oto no loxotolo 'o mo loxo io'iio'i no tasi'i. Mo ulai ili'i la ta mitema sou 'oto'oto imomomo sou italoxolixa'a uasi manina. 18#Apo 3:25Eni aalusi'a ta mitema no xalexalee tuatuala ukalusi no anu vote'i vilesisi. Vote'i ane ne, nini ta xasixasine ilo'a ta 'ilu'ilusuneni ane. Xo nini nelomuxu vaikala noxilo manina misevile.”

19Ilou mivikala mukalu, la Avalaamu ilou 'olu Aisaki milivu milai noxi'a ta mitema sou xaixai noxou e ilo'a mine'e sou ilo'a milivu milai ne Beru-seva xe muxolu no anu.

Naolu ta 'Olu

20Avalaamu muxoxoo xe ili'i la mulomu lexe, “Milika a mipalaa mo ta 'ilie se'i. Milika ne eiae Naola semau. Anu Naola ne nini vivine. 21Naola ilee Milika ta 'ili'a ualaualasi'a ano 'o, Usu, anu laposalaxu. Vusu mo Kemueli eiae Alamu momu. 22Mo Keseti mo Kaso mo Piludasi mo Itilapu mo eiae Betueli.” 23Betueli ne Liveka mamie. Milika ilou Naola mipalaane'i ta 'ili'a ta mulu ane muxatele tatalu ne. 24Xe Leuma mipalaane'i ane eiae Teva ilou Xaamu mo Taasi mo Maaka. Leuma ne eiae Naola semau ane ili'i ane.

Currently Selected:

Tavaꞌu 22: ataNTpo

Highlight

Copy